Jeŭracajuz zaćvierdziŭ piersanalnyja sankcyi suprać Pucina i Łaŭrova. Na čarzie SWIFT
Ministry finansaŭ Jeŭrasajuza na sustrečy ŭ Paryžy zaćvierdzili piersanalnyja finansavyja sankcyi ŭ dačynieńni da prezidenta Rasii Uładzimira Pucina i ministra zamiežnych spraŭ Siarhieja Łaŭrova, pieradaje delfi.lt. Heta druhi raŭnd jeŭrapiejskich sankcyj, treci ŭžo razhladajecca.
«Siońnia my ŭnieśli ŭ śpisy prezidenta Pucina i ministra Łaŭrova», — skazaŭ kiraŭnik dypłamatyi Jeŭrasajuza Žazep Barel na pres-kanfierencyi paśla sustrečy ministraŭ.
Sustreča ministraŭ finansaŭ 27 krain Jeŭrasajuza ŭ Paryžy praciahvajecca, ministry ŭzhadniajuć treci raŭnd sankcyjnych mieraŭ.
«My dziejničajem tak chutka, jak tolki možam», — zajaviła krynica ahienctva «Rojters» u aparacie Jeŭrasajuza. Treciaja chvala sankcyj zakranie jašče mnohich rasijskich aliharchaŭ, dadała jana.
U ofisie brytanskaha premjera Borysa Džonsana nieŭzabavie paśla pryniaćcia mieraŭ zajavili, što Vialikabrytanija taksama ŭviadzie sankcyi suprać Pucina i Łaŭrova. Takim čynam, usie aktyvy Pucina i Łaŭrova ŭ Jeŭrasajuŭzie i Vialikabrytanii, kali jany majucca, buduć zamarožanyja.
Taksama pryniatyja siektaralnyja sankcyi ŭ dačynieńni da finansavaha, enierhietyčnaha, transpartnaha siektaraŭ i ekspartu ŭ Rasiju pradukcyi padvojnaha pryznačeńnia.
Ciapier na paradku dnia mahčymaść adklučeńnia Rasii ad bankaŭskaj sistemy SWIFT. Ministr finansaŭ Francyi Bruno le Mer u piatnicu vystupiŭ za adklučeńnie. Hetaha patrabuje Ukraina, ale ministry krain Jeŭrasajuza jašče spračajucca, ci ŭžyvać takuju žorstkuju mieru.
«Niekatoryja krainy-ŭdzielnicy ES nie chočuć hetaha rabić, ale Francyi siarod ich niama», — skazaŭ žurnalistam le Mer, jaki paraŭnaŭ adklučeńnie ad SWIFT c jadziernaj zbrojaj.
Ministr finansaŭ Hiermanii Kryścijan Lindner taksama padtrymaŭ adklučeńnie Rasii ad hetaj bankaŭskaj sistemy.
«Ja rekamiendavaŭ navat, kab my razhledzieli bolš žorstkija miery, čym prapanujecca ŭ trecim pakiecie, u jaki ŭvachodzić adklučeńnie ad SWIFT,» — skazaŭ jon.
Taho ž damahajecca i Vialikabrytanija: ministr abarony Ben Uoles zajaviŭ pra heta ŭ hutarcy ź Bi-bi-si.
«Brytanija choča, kab sistemu SWIFT u Rasii adklučyli. Na žal, heta zrabić nialohka, heta nie adnabakovaje rašeńnie», — skazaŭ jon.
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary