«Čakajem bolš surjoznych krokaŭ». Krynicy ŭ dypkorpusie pra list Makieja
Učora stała viadoma pra list Uładzimira Makieja da jeŭrapiejskich krain, u jakim ministr zamiežnych spraŭ Biełarusi abiacaje, što naša kraina nie budzie ŭciahnutaja ŭ vajnu va Ukrainie i havoryć pra «nieščaślivuju čaradu padziej paśla 2020 hoda». Jak heta ŭsio uspryniała metavaja aŭdytoryja pasłańnia?
«Čakajem bolš surjoznych krokaŭ. Kali havorycca, što vy ŭ vajnie nie ŭdzielničajecie, to rasijskija vojski pavinny być vyviedzienyja», — tak adkazaŭ «Našaj Nivie» jeŭrapiejski dypłamat, jaki daŭno zajmajecca Biełaruśsiu i ŭdzielničaje ŭ vyznačeńni kirunkaŭ palityki adnosna Biełarusi.
Jak źbirajecca adkazać na list Jeŭropa?
«My ničoha nie budziem rabić. Pačytali, cikava. Čakajem dalej», — kaža jon.
«Pakul nijakich krokaŭ Minsk nie zrabiŭ, tamu my pracujem nad jašče adnym pakietam sankcyj. Heta znoŭ buduć istotnyja miery. Raz Łukašenka i Makiej nas nie čujuć, my budziem rabić tak, kab jany narešcie pačuli», — dadaje jon.
«Vyvad rasijskich vojskaŭ ź Biełarusi — heta abaviazkovaja ŭmova dla peŭnaha pasłableńnia režymu sankcyj, — kaža dypłamat. — Druhaja ŭmova — vyzvaleńnie palitviaźniaŭ. A dla poŭnaha źniaćcia sankcyj patrebny płan demakratyzacyi. Pakul nie budzie realizoŭvacca płan demakratyzacyi, častka sankcyj zastaniecca», — dadaje dypłamat.
U hetym trecim punkcie — adroźnieńnie ad 2015 hoda, tady takoha punktu nie było.
«U liście spadara Makieja šmat chłuśni i absurdu, z adnaho boku, ale heta taksama sproba ŭvajści ŭ kantakt ź niekatorymi krainami ES, — kaža dypłamat z adnoj ź vialikich jeŭrapiejskich krain. — Heta moža być jak sproba padarvać adzinstva krain ES pa biełaruskim pytańni, tak i prajava surjoznaj zaniepakojenaści tym, u jakoj situacyi Biełaruś apynułasia adnosna Rasii», — dadaje jon.
Jakaja budzie reakcyja na list?
«Da toj pary, pakul aficyjny Minsk hłyboka ŭciahnuty ŭ niezakonnuju vajnu Rasii suprać Ukrainy — a Minsk uciahnuty! — asabista ja nie baču nijakaj prastory dla manieŭru dla nikoha adnosna aficyjnaha Minska, — kaža dypłamat i z dolaj sarkazmu dadaje. — Łukašenka z Pucinym u aŭtorak znachodzilisia na kasmadromie «Vostočnyj». Tady ad imia kaho havoryć u svaim liście Makiej? Adnak, ja taksama liču, što i my, i hramadzianie Biełarusi zacikaŭlenyja ŭ zachavańni taho, što ad suvierenitetu Biełarusi zastałosia», — dadaje jon.
Dypłamaty adznačajuć, što list źjaviŭsia na fonie razhułu antyzachodniaj prapahandy ŭ Biełarusi i ŭsio novych aryštaŭ. «Pačakajcie, my ŭviali sankcyi, bo vy pasadzili 200 palitviaźniaŭ. Ciapier u vas ich 1200. Vy dumajecie, što 200 nas tryvožyli, a pra 1200 my skažam «nu, ciapier ok»? Vy nas ličycie idyjotami abo ŭ vas samich niešta nie tak z łohikaj?» — iranizuje adzin z surazmoŭcaŭ «Našaj Nivy».
«Hety list — pustaja rakavina. Ty biareš jaje ŭ ruki, a tam ničoha niama: Makiej ničoha nie prapanuje», — kaža jašče adzin dypłamat.
«Listy dyjałohu nie dapamohuć. Patrebnyja kankretnyja kroki: vyvad vojskaŭ, vyzvaleńnie palityčnych źniavolenych, usio skazana sto razoŭ. Ale nabirać listy praściej, čym realna rabić», — dumka pradstaŭnika adnoj z bałtyjskich krain.
Pavodle infarmacyi «Našaj Nivy», pad šosty pakiet sankcyj, jaki budzie pryniaty, kali Minsk praciahnie varožyja dziejańni, padpadzie, u pryvatnaści, častka dziaržaŭnych pradpryjemstvaŭ chimičnaj haliny, a taksama fizičnyja asoby — naprykład, dzieci łukašenkaŭskaha favaryta Aleksina.
«My sprabavali pa-dobramu, Minsk hetym nie skarystaŭsia. Łukašenka nie razumieje Zachadu i nie choča razumieć. Što ž, jaho vybar», — dadaje vysokapastaŭleny dypłamat, jaki raniej byŭ pasłom u Biełarusi.
Usie apytanyja jeŭrapiejcy sychodziacca ŭ mierkavańni, što da vyvadu rasijskich vojskaŭ z terytoryi Biełarusi z łukašenkaŭcami havaryć nichto nie budzie.
«Tania, my z taboj!» Ułady zapuścili fłešmob u padtrymku žančyny ŭ čyrvona-zialonym VIDEA21
Kamientary