Kavaleŭski pra pajezdku ŭ Kijeŭ: Ekanamičnyja adnosiny pamiž Biełaruśsiu i Ukrainaj spynieny, Łukašenka dla Kijeva skončany
Pradstaŭnik pa mižnarodnych spravach Śviatłany Cichanoŭskaj Valer Kavaleŭski ścisła raskazaŭ «Našaj Nivie» pra vyniki pajezdki ŭ Kijeŭ, jaki jon naviedaŭ užo druhi raz. Kavaleŭski padkreślivaje važnaść dapamohi biełaruskim dabraachvotnikam, a taksama faktyčnaje spynieńnie ekanamičnych i palityčnych adnosin pamiž Kijevam i režymam Łukašenki.
«Heta była svaječasovaja i praktyčnaja pajezdka. Hałoŭnyja zadačy byli dźvie: dastavić dapamohu dla «kalinoŭcaŭ», a taksama razabracca z pašyreńniem prysutnaści demakratyčnych siłaŭ u Kijevie, — dzielicca jon. —
Byŭ šerah sustreč: z dyjasparaj, dabraachvotnikami, uładami. Usio raskazvać nie budu. Biełaruskich dabraachvotnikaŭ cikavili pytańni našych palityčnych aryjentyraŭ, nas — jak my možam dapamahać. I hetaja dapamoha budzie akazvacca — i dabraachvotnikam, i dyjaspary».
Kamanda Cichanoŭskaj abmiarkoŭvała z ukrainskimi ŭładami pytańni ŭzajemadziejańnia ŭ źniešniaj i infarmacyjnaj palitycy, prablemy biełarusaŭ va Ukrainie.
«Vyrašana, što demakratyčnyja siły buduć pracavać va Ukrainie šyrej, ź pierachodam na stałuju prysutnaść biełaruskich palityčnych struktur. My dumajem pra budučyniu.
Ciapier važna, što pamiž Ukrainaj i Biełaruśsiu spynienyja lubyja handlovyja i ekanamičnyja adnosiny. Ahulnaja reakcyja ŭkraincaŭ takaja: u Łukašenki ŭžo niama budučyni ŭ adnosinach z Ukrainaj, usie svaje šansy jon vykarystaŭ i pierakročyŭ niedapuščalnyja čyrvonyja rysy. Jaho sproby padać siabie jak miratvorca — śmiechatvorny, dla Kijeva jon skončany.
Adnačasova, ukraincy bačać, jakim sajuźnikam dla ich vyjaviłasia demakratyčnaje biełaruskaje hramadstva. Indykatary sapraŭdnych sajuźnikaŭ — heta ŭdzieł dabraachvotnikaŭ u vajnie, dyviersii na čyhuncy, humanitarnaja i finansavaja dapamoha ludziej i hetak dalej. Vidavočna, što režym Łukašenki — heta nie Biełaruś, tamu ŭkraincy ciapier, ubačyŭšy dziejańni biełarusaŭ, reahujuć na dziejańni režymu i jasna admiažoŭvajuć jaho ad narodu», — skazaŭ Kavaleŭski.
Stała viadoma, chto žanich byłoj deputatki Maryi Vasilevič25
Kamientary