Кавалеўскі пра паездку ў Кіеў: Эканамічныя адносіны паміж Беларуссю і Украінай спынены, Лукашэнка для Кіева скончаны
Прадстаўнік па міжнародных справах Святланы Ціханоўскай Валер Кавалеўскі сцісла расказаў «Нашай Ніве» пра вынікі паездкі ў Кіеў, які ён наведаў ужо другі раз. Кавалеўскі падкрэслівае важнасць дапамогі беларускім дабраахвотнікам, а таксама фактычнае спыненне эканамічных і палітычных адносін паміж Кіевам і рэжымам Лукашэнкі.
«Гэта была сваечасовая і практычная паездка. Галоўныя задачы былі дзве: даставіць дапамогу для «каліноўцаў», а таксама разабрацца з пашырэннем прысутнасці дэмакратычных сілаў у Кіеве, — дзеліцца ён. —
Быў шэраг сустрэч: з дыяспарай, дабраахвотнікамі, уладамі. Усё расказваць не буду. Беларускіх дабраахвотнікаў цікавілі пытанні нашых палітычных арыентыраў, нас — як мы можам дапамагаць. І гэтая дапамога будзе аказвацца — і дабраахвотнікам, і дыяспары».
Каманда Ціханоўскай абмяркоўвала з украінскімі ўладамі пытанні ўзаемадзеяння ў знешняй і інфармацыйнай палітыцы, праблемы беларусаў ва Украіне.
«Вырашана, што дэмакратычныя сілы будуць працаваць ва Украіне шырэй, з пераходам на сталую прысутнасць беларускіх палітычных структур. Мы думаем пра будучыню.
Цяпер важна, што паміж Украінай і Беларуссю спыненыя любыя гандлёвыя і эканамічныя адносіны. Агульная рэакцыя ўкраінцаў такая: у Лукашэнкі ўжо няма будучыні ў адносінах з Украінай, усе свае шансы ён выкарыстаў і перакрочыў недапушчальныя чырвоныя рысы. Яго спробы падаць сябе як міратворца — смехатворны, для Кіева ён скончаны.
Адначасова, украінцы бачаць, якім саюзнікам для іх выявілася дэмакратычнае беларускае грамадства. Індыкатары сапраўдных саюзнікаў — гэта ўдзел дабраахвотнікаў у вайне, дыверсіі на чыгунцы, гуманітарная і фінансавая дапамога людзей і гэтак далей. Відавочна, што рэжым Лукашэнкі — гэта не Беларусь, таму ўкраінцы цяпер, убачыўшы дзеянні беларусаў, рэагуюць на дзеянні рэжыму і ясна адмяжоўваюць яго ад народу», — сказаў Кавалеўскі.
Цяпер чытаюць
Былога міліцыянера асудзілі за жаданне ваяваць у Палку Каліноўскага. Пагражала да 15 гадоў калоніі19
Каментары