Były ministr unutranych spraŭ Biełarusi hienierał Juryj Zacharanka biasśledna źnik 7 maja 1999 hoda. Na toj momant jamu było 47 hadoŭ.
Čym viadomy Zacharanka?
Juryj Zacharanka ŭvachodziŭ u kamandu Alaksandra Łukašenki na vybarach pieršaha prezidenta Biełarusi. U lipieni 1994 hoda, adrazu paśla vybrańnia Łukašenki, Zacharanku pryznačyli ministram ŭnutranych spraŭ. U kastryčniku 1995-ha Łukašenka adpraviŭ Zacharanku ŭ adstaŭku. A ŭ krasaviku 1996 hoda byłoha ministra ŭkazam Łukašenki panizili ŭ zvańni da pałkoŭnika milicyi i zvolnili z MUS nibyta za hrubyja finansavyja parušeńni i chiby ŭ pracy.
Chutka paśla hetaha Juryj Zacharanka pierajšoŭ na bok apazicyi. U lutym 1998 hoda jon uznačaliŭ kamitet pa biaśpiecy ŭ składzie cieniavoha ŭrada. Viasnoj 1999-ha były paplečnik Łukašenki braŭ aktyŭny ŭdzieł u arhanizavanaj apazicyjaj kampanii pa vybarach prezidenta, uvachodziŭ u kamandu byłoha premjer-ministra Michaiła Čyhira, jeździŭ pa krainie, arhanizoŭvaŭ hrupy pa zbory podpisaŭ.
Što viadoma pra źniknieńnie Zacharanki?
Viečaram 7 maja 1999 hoda Zacharanka źnik pa darozie dadomu. Spravu pa fakcie jaho zabojstva była raspačatali 7 vieraśnia 1999 hoda na padstavie artykuła«Naŭmysnaje zabojstva». Śledstva prypynili ŭ 2013 hodzie.
Viersija Juryja Haraŭskaha
16 śniežnia 2019 hodu Deutsche Welle apublikavała intervju, u jakim Jury Haraŭski, jaki nazvaŭ siabie bajcom biełaruskaha «eskadronu śmierci», raskazaŭ, jak udzielničaŭ u vykradańni i zabojstvie praciŭnikaŭ Alaksandra Łukašenki 20 hadoŭ tamu pad kamandavańniem Dźmitryja Paŭličenki.
Pavodle Haraŭskaha, 7 maja 1999 hoda bajcy śpiecyjalnaha atradu chutkaha reahavańnia Unutranych vojskaŭ MUS Biełarusi vykrali Zacharanku. Na vusny zahad Dźmitryja Paŭličenki pierad vykradańniem za Zacharankam pryblizna paŭtra tydni sačyła hrupa z vaśmi čałaviek. Jany viedali dzie Zacharanka pastavić svaju mašynu i kolki mietraŭ jamu iści ad stajanki da chaty. Čatyry bajcy atradu spynili pa darozie dadomu Zacharanku, jaki byŭ adzin, biez achovy, pradstaviŭšysia supracoŭnikami milicyi. Zacharanka nie supraciŭlaŭsia, tolki skazaŭ vykradalnikam u mašynie, kab zrabiła tak, kab nie było baluča. U mašynie Zacharanku nibyta nadzieli na hałavu «bałdachin», jaki zakryvaŭ vočy.
Zacharanku pryvieźli na vučebnuju bazu ŭnutranych vojskaŭ u rajonie Vałoŭščyny pad Minskam. Jaho zabili sa śpiecyjalnaha pistaleta z hłušylnikam, jaki vykarystoŭvajecca dla vykanańnia śmiarotnych prysudaŭ u Biełarusi. U intervju Haraŭski śćviardžaje, što stralaŭ asabista Paŭličenka, jon nibyta zrabiŭ dva streły ŭ rajon serca. Paśla zabojstva cieła pavieźli ŭ Minsk, na MKADzie mašyna zaviarnuła ŭ bok Paŭnočnych mohiłak. Kamandzir atradu Dźmitryj Paŭličenka zavioz cieła ŭ krematoryj. Što adbyłosia ź ciełam dalej, Haraŭski nie viedaje.
Reakcyja Łukašenki
Paśla pryznańnia Haraŭskaha, Łukašenka 24 śniežnia 2019 hodu zajaviŭ, što nichto akramia jaho nie moh dać kamandu ab vykradańni i zabojstvie palitykaŭ, a jon «nikoli ŭ žyćci nie addavaŭ takuju kamandu» i nie daść ciapier.
Chto taja prafsajuznaja aktyvistka z MAZa, jakaja paprasiła Łukašenku razabracca ŭ jutubie z «biehłymi»?16
Kamientary