Ford Escort za $1600, Ford Mustang za $39 000… Kuplajem kabryjalet na leta
U pieršyja vychodnyja leta «Naša Niva» vyrašyła pahladzieć, jakija kabryjalety jość u prodažy.
Ford Escort, jaki nie treba varyć
Dla taho, kab stać uładalnikam aŭto z adkidnym viercham, zusim nie abaviazkova mieć šmat hrošaj. Samyja tannyja kabryjalety z vystaŭlenych na prodaž u Biełarusi kaštujuć mienš za 2000 dalaraŭ.
Tak, naprykład, za 1600 $ pradajecca Ford Escort Cabrio piataj hienieracyi. Aŭtamabil 1993 hoda vypusku, pad kapotam u jaho bienzinavy ruchavik abjemam 1,6 litra. Zajaŭleny prabieh — 200 tysiač kiłamietraŭ. Na žal, aŭtamabil bahaty na elemienty tak zvanaha «ahraciuninhu».
«Pa techničnaj častcy ŭsio ŭ paradku. U afarboŭcy nie maje patreby, varyć nie treba, usie pytańni pa telefonie, torh realnamu kupcu», — havorycca ŭ apisańni.
Taksama pradaviec prosić nie zvanić z prapanovami «kuplu za 600», a pierakupaŭ — jaho nie turbavać.
Kupe-kabryjalet Peugeot
U cenavym siehmiencie 3000—4500 dalaraŭ bolš za ŭsio prapanoŭ siarod Peugeot 206.
Adno z takich aŭto pradajuć u Minsku, za mašynu 2002 hoda vypusku prosiać 4150 $. Kali vieryć apisańniu, to pazbavicca ad aŭto sa składnym dacham ułaśnik vyrašyŭ vyklučna praz toje, što hetaja mašyna ŭ jaho siamji vielmi redka vykarystoŭvajecca.
U paraŭnańni z papiarednim varyjantam, dach u hetaha kabryjaleta ćviordy — takija aŭto jašče nazyvajuć kupe-kabryjaletam.
«Amierykaniec» na hazie
Nastupnaja davoli papularnaja marka i madel kabryjaletaŭ — Chrysler Sebring. Hetyja amierykanskija kabryjalety našmat bolšaha pamieru, tamu dyjapazon vykarystańnia ŭ ich šyrejšy za Peugeot 206.
Zvyčajna kabryjalety vykarystoŭvajuć jak dadatkovy aŭtamabil, tamu i prabiehi ŭ ich mienšyja, ale vyhladaje, što jość i vyklučeńni.
Tak, naprykład, u Žabincy za 3690 dalaraŭ pradajuć Chrysler Sebring z hazavym abstalavańniem. Najaŭnaści HBA i stanu kuzava pradaviec nadaje asablivuju ŭvahu.
«Hazavy bałon zdymali i addavali na aprasoŭku, ciapier jość dazvoł na 3 hady. Kali zdymali bałon, było vidać nišu pad zapasku, ź joj usio dobra, usio ŭ zavadskoj apracoŭcy, biez pytańniaŭ», — apisvaje stan aŭto pradaviec.
Aŭtar abjavy adznačaje, što aŭtamabilem karystajecca žonka.
«Pa aŭto, kaniešna ž, jość drobnyja chiby, nie nastolki važnyja», — dadaje ŭłaśnik u abjavie. Jon hatovy tarhavacca.
Chrysler na «čyrvonych» numarach
Siarod adnosna papsovych Chrysler Sebring pradajecca adzin Chrysler Le Baron 1993 hoda vypusku.
Pad kapotam 3 litry z «aŭtamatam», zajaŭlena 188 000 km prabiehu. Niahledziačy na niemały ŭzrost, u aŭtamabila jość kandycyjanier, paduški biaśpieki, elektrapakiet i kruiz-kantrol.
Z dadatkovaj infarmacyi — tolki toje, što aŭto znachodzicca ŭ vydatnym stanie. Prosiać za kabryjalet rodam z 1990-ch 4750 $. Cikava, što na mašynie da hetaha času zastalisia čyrvonyja numary.
Zvyčajny Mercedes z pantovymi šyldzikami
Roŭna ŭ 5000 dalaraŭ acenieny Mercedes-Benz CLK 2000 hoda vypusku.
Pad kapotam u 22-hadovaha Mercedes 2-litrovy ruchavik, jaki pracuje ŭ pary ź miechaničnaj karobkaj pieradač. Niahledziačy na davoli ścipły ruchavik, na šyldziku paznačana, što heta nie samy zvyčajny CLK z dvuma litrami, a ceły 5,5 dy jašče i AMG.
Zajaŭleny prabieh — 300 tysiač kiłamietraŭ, pry hetym kresła kiroŭca ŭžo pieraciahnuta śviežym materyjałam.
Pradaviec adznačaje, što aŭtamabil absłužany i znachodzicca ŭ dobrym stanie, ale, tym nie mienš, jość maleńkija prablemki.
Redki «švied» u aryhinalnym abviesie
Amatary redkich aŭto mohuć źviarnuć uvahu na Saab 9-3. Za sapraŭdy redki kabryjalet 1999 hoda vypusku prosiać amal 7000 dalaraŭ.
Pradaviec źviartaje ŭvahu na dobry stan aŭtamabila, aryhinalny abvies i skurany sałon firmy Viggen.
Hledziačy pa fota, aŭtamabil sapraŭdy znachodzicca ŭ hodnym stanie. Zajaŭleny prabieh — 241 tysiača kiłamietraŭ. U aŭto novyja šyny i akumulatar.
BMW, ad jakoj zastaŭsia tolki kuzaŭ
Siarod aŭto sa składnym dacham jość i niekalki BMW. Samy tanny ź ich acenieny ŭ 12 tysiač dalaraŭ, pryčym aŭtar abjavy adrazu papiaredžvaje, što źnižka navat nie abmiarkoŭvajecca.
Stolki prosiać za 22-hadovy BMW e46, jaki za 8 hod znachodžańnia ŭ adnych rukach paciarpieŭ šerah dapracovak.
«Vałodaju mašynaj bolš za 8 hadoŭ, za hety čas ad pieršapačatkovaj zastaŭsia tolki kuzaŭ, usio astatniaje było zamieniena / palepšana / dapracavana», — havorycca ŭ apisańni.
Ford Mustang u asartymiencie
Kali my budziem razhladać bolš śviežyja aŭtamabili (2015 hod i maładziejšyja), to sutykniemsia z tym, što amal usie jany kaštujuć ad 20 tysiač dalaraŭ.
Absalutnym lidaram pa kolkaści prapanoŭ źjaŭlajecca Ford Mustang. Z 48 kabryjaletaŭ nie starejšych za 7 hadoŭ 23 składajuć mienavita Ford.
Samyja tannyja Ford Mustang VI u kuzavie kabryjalet pradajucca pa cenach ad 25 tysiač dalaraŭ, u toj čas jak samyja darahija — za 35—39 tysiač. Zaŭvažna, što, niahledziačy na vialikuju roźnicu ŭ cenach, usie Ford Mustang, jakija jość u prodažy ciapier, z ruchavikom abjemam 2,3 litra.
Čytajcie taksama: Ekanomija składaje tysiačy dalaraŭ. Kupla i pryhon aŭto ź Jeŭropy i ZŠA — što varta viedać
Biełarusy zastanucca biez novych Volkswagen?
Kandydat u prezidenty ad kamunistaŭ zaklikaje zabrać i padzialić majomaść apazicyjanieraŭ20
Kamientary