U Rasii masava błakujuć VPN-siervisy. Što rabić, kali pačnuć i ŭ nas?

Na siońnia ŭ Rasii zabłakavanyja kala dziasiatka servisaŭ dla abychodu błakirovak. Siarod ich takija papularnyja, jak Psiphon, Lantern, Proton VPN i Nord VPN. I jany sapraŭdy pierastali pracavać.

U Biełarusi zabłakavany TOR — i toje ŭmoŭna, bo da jaho lohka atrymać dostup. Ale VPN mohuć zabłakavać u luby momant, technična heta nieskładana. Što tady rabić?

1. Pasprabujcie inšy siervier i «pahulajciesia» z naładami klijenta

Šmat u jakich servisach jość mahčymaść źmianić krainu, ź jakoj vy zachodzicie ŭ sietku, abo tam jość niejki režym, jaki dapamoža abyści błakiroŭku.

2. Napišycie ŭ padtrymku

U vypadku, kali na inšy VPN vy nie chočacie pierachodzić, abo vaš byŭ płatny — źviarniciesia ŭ padtrymku servisu. Mahčyma, jany ŭžo prydumali rašeńnie vašaj prablemy abo, prynamsi, viernuć hrošy.

3. Pašukajcie inšy VPN

Kali vy karystalisia biaspłatnym servisam, to prosta znajdzicie inšy. Da prykładu, z hetaha śpisu.

Isnuje jašče taki paraŭnalny śpis dla 190 roznych servisaŭ. Sprava ŭ tablicy jość hrafa «Free Trial Available» dla tych servisaŭ, u jakich isnuje biaspłatnaja viersija. Siarod cikavych i biaspłatnych — Riseup VPN, jaki robiać aktyvisty z ZŠA za svoj košt.

Ale budźcie ŭvažlivyja — nie ŭsie VPN nadziejnyja. Da prykładu, u kramie Google Play jość proćma biaspłatnych, ale sumniŭnych servisaŭ. Kali vy zachodzicie ŭ VPN, to vy daviarajecie vašy danyja siervisu, i kali jon nienadziejny, to moža źlić vašy danyja, paroli i ŭvieś trafik.

Bolšaść dobrych VPN płatnyja. Śpis płatnych i nadziejnych jość tut.

4. Skarystajciesia inšymi servisami abychodu błakavańniaŭ

Takich isnuje šmat. Samyja viadomyja i nadziejnyja: Tachyon, TOR, Lantern i Psiphon. Heta nie prosta VPN, jany vykarystoŭvajuć šerah technałohijaŭ, jakija pavialičvajuć imaviernaść abychodu cenzury.

Kali sajty servisaŭ zabłakujuć, to jość mahčymaść spampavać klijent praz paštovy zapyt. Dla TOR dašlicie e-mail z nazvaj vašaj apieracyjnaj sistemy (Windows, Android, Mac, Linux) na adras [email protected]. Dla Psiphon dašlicie pusty list na adras [email protected].

Taksama niekamiercyjnaja arhanizacyja Roskamsvaboda raspracavała admysłovy dadatak dla braŭzieraŭ dla abychodu zabaronaŭ. Jon dastupny dla Firefox i Chrome.

Taki ž dadatak stvaryła inšaja kampanija. Jon dastupny dla Firefox, Edge i Chrome.

Kali niama mahčymaści niešta ŭstalavać (naprykład, heta zabaroniena ŭ vas na pracy), to skarystajciesia servisam Wayback Machine. Skapirujcie ŭ adrasny radok adras sajta i, kali ŭ servisie niama jaho kopii, naciśnicie knopku «Save this URL in the Wayback Machine». Paśla hetaha vy atrymajecie spasyłku na lustra staronki zabłakavanaha sajta. Praŭda, kali jon budzie nahružany, heta zojmie šmat času.

Jašče adzin varyjant biez ustaloŭki — zachavanyja staronki ad pošukavych servisaŭ. Dla taho, kab ich ubačyć, uviadzicie ŭ pošukavy radok mierkavany zahałovak artykułu ci resursu abo ichni adras i, chutčej za ŭsio, u vas atrymajecca znajści zachavanuju kopiju.

Minus dvuch apošnich varyjantaŭ u tym, što ŭ vas nie budzie mahčymaści pracavać z «žyvym» sajtam — vy zaŭždy budziecie bačyć bolš ci mienš staruju kopiju.

5. Stvarycie ŭłasny VPN-servis

Dla hetaha vam treba nabyć siervier. Zrabić heta možna tut abo znajści prydatny servis praz pošuk — praŭda, treba, kab čałaviek, jaki kuplaje i afarmlaje na siabie siervier, byŭ nie ŭ Biełarusi, a servis byŭ nadziejny. Arenda sierviera abydziecca ŭ 2-5 jeŭra ŭ miesiac.

Adzin ź cikavych servisaŭ dla stvareńnia ŭłasnaha VPN, zrobleny Google admysłova dla abychodu błakirovak — Outline. Dla taho, kab jon pracavaŭ, treba skarystacca instrukcyjaj.

Taksama jość servis Amnezia VPN, jaki možna źmiaścić na vašym ułasnym sierviery.

Instrukcyja pa tym, jak stvaryć ułasny VPN biez starońnich servisaŭ — tut, ale heta adčuvalna składaniej, bo daviadziecca «hulacca» z Linux.

A voś instrukcyi pa tym, jak dałučycca da takoha VPN dla Android, iPhone, Windows i Mac.

• 131
• 0
• 0
• 3
• 5
• 2
• 6
• 0