Taniec z šablami

Łukašenka padaryŭ Čavesu šablu, a toj skazaŭ, što abiedźvie krainy musiać trymać ruku na klinku. Piša Alaksandar Kłaskoŭski.

Palityki časta aktorstvujuć, ale hetyja pieramovy pieratvarylisia ŭ ščyraje bratańnie. Dva prezydenty-adnahodki, takija nie padobnyja z vyhladu, časam padavalisia bliźniatami. Ci daŭno Łukašenka zajaŭlaŭ, što Lenin i Stalin – symbali našaha narodu? Čaves, ledźvie syšoŭšy z trapa, pachvaliŭ, što ŭ Biełarusi stali javaju leninskija zapaviety, i naviedaŭ «Liniju Stalina».

Hość prylacieŭ z dalokaha merydyjanu, ale jakija blizkija paraleli! Były aficer Čaves pryjšoŭ da ŭłady pad lozunham zmahańnia z karupcyjaj. Zładziŭ paru referendumaŭ, zamianiŭ apazycyjny parlament kišennym, pierapisaŭ kanstytucyju i staŭ dušyć palityčnyja pratesty. Jon – amatar prastamoŭnaj rytoryki, vajskovych hulniaŭ i sportu.

Dva kiraŭniki idealna syšlisia na hlebie antypatyi da suśvietnaha hiehiemona, «pseŭdaekanamičnych reformaŭ» dy «kalarovych revalucyjaŭ». Ciapier Biełaruś z Venesuełaj, jak zaśviedčana ŭ admysłovym memarandumie, – stratehičnyja partnery. Zrešty, zaznačaje palitolah Valer Karbalevič, Łukašenku zaŭždy stavała abačlivaści, kab nie zahulacca z ahniom. Tak było ŭ stasunkach z Sadamam, Miłošavičam, ciapier – z Achmadynežadam. Naŭrad ci darečy biełaruskamu prezydentu i laŭry suzasnavalnika antyamerykanskaha internacyjanału, aŭtarski prajekt jakoha Čaves nie biez daścipnaści nazyvaje «vośsiu dabra». Venesuelca tut nie pieraplunieš, a poŭchaŭ na mižnarodnaj arenie Miensku i tak staje.

Zastajecca pijar-navar dla svajho elektaratu. Dziaržaŭnyja medyi vyłuzvajucca sa skury, stvarajučy iluziju kipučych mižnarodnych stasunkaŭ. Hladziecie, až ź inšaj pałovy ziamnoj kuli da nas takija zuchi piłujuć!

Naturalna, maŭčok pra toje, čamu nie zazirajuć susiedzi – dziaržaŭnyja lidery ź Vilni, Ryhi, Varšavy... Čamu aficyjny Miensk nia moža palityčna parazumiecca z Eŭropaj, kudy pradaje ŭžo bolej za pałovu svajho ekspartnaha tavaru.

Z Venesuełaj ža tavarazvarot sioleta składaje 6 tysiačaŭ dalaraŭ: za akijanam kuplenyja niekalki zapčastak dy skrynka ekzatyčnaj sadaviny. Niezaležnyja eksperty skieptyčna hladziać na perspektyvy praryvu ŭ ekanamičnych stasunkach. U suśvietnaha rynku svaje zakony, palityčnaja puha tut mała dapamahaje.

Što da imaviernaha zbrojnaha biznesu, to tut nas peŭna ž zatknie za pojas Rasieja. Čaves ź cikavaściu ahledzieŭ biełaruski arsenał, adnak zadavoliŭsia padoranaj kalekcyjnaj šablaj. A miljard dalaraŭ pavioz u Maskvu – navažyŭsia prydbać dla svaich sokałaŭ partyju «Su-30».

Siońnia ŭ jaho staje na heta naftadalaraŭ (ścišana havorać i pra kakainavy tranzyt). Ale jak tolki ceny na «čornaje zołata» pachisnucca, venesuelskaja madel laśniecca, zaznačajuć ekanamisty. I tut vialikaje padabienstva ź «biełaruskaj madellu», što lipić na tannym hazie dy – vo dziva! – taksama naftavaj rencie.

Ačmurełyja ad papulizmu narody rana ci pozna musiać raspłačvacca. Peruanski piśmieńnik Maryjo Varhas Ljosa napisaŭ pra Čavesavu Venesuełu artykuł «Samazabojstva adnaje nacyi».

Zahałovak pracinaje tokam, bo da jaho całkam dapasujecca i pesymistyčny scenar dla Biełarusi. Dziakuj bohu, heta nie adziny scenar.

• 0
• 0
• 0
• 0
• 0
• 0
• 0
• 0