36-hadovaja premjerka Finlandyi ŭzarvała internet mini-šortami. Raskazvajem pra jaje
U niadzielu finskaja premjerka Sana Maryn naviedała rok-fiestyval Ruisrock u horadzie Turku. Jana ŭraziła ŭsich svaim łukam — pryjšła ŭ mini-šortach i ŭ kasusie. Pahadziciesia, nie zaŭsiody ŭ takim vobrazie možna ŭbačyć vysokich čynoŭnikaŭ.
Premjer-ministr Finlandyi časta naviedvaje papularnyja mierapryjemstvy, viečarynki i kancerty, siarod jakich i rok-fiestyvali.
Na rok-kancert jana pryjšła z mužam Markusam Rajkanienam, ź jakim zrabiła sełfi padčas vystupu muzyčnych kalektyvaŭ.
Raskazvajem, čym viadomaja 36-hadovaja premjerka Finlandyi.
Nie ŭpieršyniu jana epatuje publiku svaim stylem
U svoj čas Sana Maryn źniałasia dla hlancavaha časopisa Trend u čornym pinžaku z hłybokim vyrazam na hołaje cieła. Zdymak apublikavali na aficyjnaj staroncy tabłoida ŭ instahramie, paśla čaho ŭźnikła chvala krytyki.
Praz masavy chejt sotni jeŭrapiejskich žančyn vyrašyli tady zastupicca za Maryn i zapuścili ŭ siecivie fłešmob, u ramkach jakoha publikavali foty ŭ pinžakach na hołaje cieła. Zdymki ŭ padtrymku premjer-ministra Finlandyi byli z chešteham #imwithsanna. Prychilniki Maryn śćviardžali, što žančyn aceńvajuć pa źniešnim vyhladzie značna čaściej, čym mužčyn.
Inšaje fota, jakoje šyroka abmiarkoŭvali, — Maryn na špacyry ŭ lehinsach u ablipku. Paparacy źniali jaje sa śpiny.
Stała kiraŭnikom urada vielmi maładoj
Sanu Maryn pryznačyli premjer-ministram Finlandyi 10 śniežnia 2019 hoda. Na toj momant joj było 34 hady, i jana stała samym maładym kiraŭnikom urada ŭ śviecie i treciaj žančynaj-premjeram u historyi krainy.
Palityčnuju karjeru Maryn pačała ŭ 20 hadoŭ, nieŭzabavie ŭstupiła ŭ Sacyjał-demakratyčnuju partyju Finlandyi. U 2012 hodzie jaje abrali ŭ haradskuju radu Tampiere. Z 2014 hoda jana była druhim namieśnikam staršyni Sacyjał-demakratyčnaj partyi. U 2015-m, va ŭzroście 30 hadoŭ, jana stała deputatam parłamienta, a ŭ 2019-m atrymała pasadu ministra transpartu i suviazi.
Pryjšła ŭ palityku z samych nizoŭ
Maryn rasła ŭ horadzie Tampiere na poŭdni Finlandyi. Padletkam jana padzarablała ŭ piakarni, była kasirkaj. U 2012 hodzie skončyła miascovy ŭniviersitet pa śpiecyjalnaści «dziaržaŭnaje kiravańnie», a ŭ 2017 hodzie stała mahistram. Sana Maryn stała pieršaj u jaje siamji, chto atrymaŭ vyšejšuju adukacyju.
Matyvam jaje prychodu ŭ palityku było hłabalnaje paciapleńnie.
«Ja dumaju, heta było rasčaravańnie ad taho, što starejšaje pakaleńnie nie razumieła, nakolki heta važna, — kaža jana. — Źmianieńnie klimatu — heta prablema, pra jakuju dumaje kožny pradstaŭnik majho pakaleńnia».
Stała ikonaj levych libierałaŭ
Palityk była dačkoj žančyny, jakaja mieła adnosiny ź inšaj žančynaj. Finski premjer vystupaje za roŭnyja pravy dla ŭsich. Jak sama palityk, tak i Finlandyja stali sapraŭdnymi ikonami dla prahresistaŭ va ŭsim śviecie.
Kali Maryn zaniała pasadu premjer-ministra, jaje dačce nie było i dvuch hadoŭ. Dekretny adpačynak jany raździalili z mužam na dvaich.
Elämämme ihme syntyi sunnuntaina. Äidillä ja pienellä tytöllä kaikki hyvin pic.twitter.com/bZVOVSoMRR
Dačka Sany Maryn
Sana Maryn uziała šlub z Markusam Rajkanienam tolki ŭ 2020 hodzie, chacia adnosiny ŭ ich byli ŭžo daŭno.
Va ŭradzie Maryn — 10 žančyn i 9 mužčyn.
Palityk padtrymlivaje ŁHBT-supolnaść i maryć pra vykaranieńnie seksizmu. Vystupaje za toje, kab Finlandyja stała vuhlarodna niejtralnaj krainaj da 2035 hoda i ahułam padtrymlivaje «zialonuju» palityku. Maryn ličycca adnoj z najbolš levych palitykaŭ siarod finskich sacyjał-demakrataŭ. Roŭnaść i sacyjalnaje zabieśpiačeńnie — adny z hałoŭnych tem u jaje palityčnaj dziejnaści.
Praŭda, u adnym z pytańniaŭ Maryn vymušana była źmianić svaje pohlady. Raniej jana vystupała kateharyčna suprać členstva svajoj krainy ŭ NATA. Navat u pačatku 2022 hoda palityk havaryła, što ŭstupleńnie Finlandyi ŭ NATA — małaimavierny varyjant raźvićcia padziej. A ŭsiaho praź niekalki miesiacaŭ Maryn užo zajaviła:
«Na maju dumku, siabroŭstva ŭ NATA — heta akt miru, havorka idzie ab tym, kab vajna nikoli nie viarnułasia ŭ Finlandyju», — skazała palityk.
Ikona paŭnočnajeŭrapiejskaha libieralizmu i prahresizmu zahavaryła jak sapraŭdny «jastrab». Čarhovy «pośpiech» palityki Uładzimira Pucina.
Finlandyja taksama aktyŭna dapamahaje Ukrainie zbrojaj. Pa stanie na 4 lipienia, Kijeŭ atrymaŭ ad Chielsinki ŭzbrajeńniaŭ i ryštunku jak minimum na 88 miljonaŭ jeŭra.
Kaho z palitviaźniaŭ mohuć vypuścić paśla anonsu Łukašenki?3
Kaho z palitviaźniaŭ mohuć vypuścić paśla anonsu Łukašenki?
«Kadebist u čornych skuranych palčatkach zadavaŭ pytańni, i kali ja nie adkazvała, pačynaŭ mianie dušyć»11
Kamientary