Džej Ło i Bien Aflek narešcie ažanilisia! Zhadvajem ich historyju kachańnia
Śpiavačka Dženifier Łopies i akcior Bien Aflek pabralisia šlubam. Praz 20 hadoŭ adna z samych lehiendarnych par nulavych narešcie razam. Zhadvajem usie detali hetaj kultavaj historyi kachańnia.
Łopies i Aflek upieršyniu sustrelisia ŭ śniežni 2001 hoda na zdymkach ramantyčnaj kamiedyi «Džylji». U stužcy jany hrali złačyncaŭ, jakija «pracujuć» nad adnoj spravaj, i z taho času pačali siabravać u sapraŭdnym žyćci. Što da filma, to jon atrymaŭsia nie samym udałym — na cyrymonii «Załataja malina» 2005 hoda stužka była pryznanaja horšaj kamiedyjaj za pieršyja 25 hadoŭ isnavańnia premii.
U krasaviku 2002 hoda papaŭźli čutki pra toje, što pamiž Łopies i jaje partnioram pa filmu niešta jość. U toj čas Bien apublikavaŭ u presie paviedamleńnie dla Dženifier, dzie chvaliŭ aktrysu i škadavaŭ, što nie źniaŭsia va ŭsich filmach ź jaje ŭdziełam. Podpis pad paviedamleńniem śviedčyŭ: «Ź luboŭju, pavahaj i ŭdziačnaściu, Bien Aflek». Tady tabłoidy zahavaryli pra toje, što hetaje pryznańnie vyhladaje bolš čym siabroŭskim.
24 lipienia 2002 hoda Džej Ło pradstaviła Afleka svaim rodnym i praz dva dni padała na razvod z tancoram Krysam Džadam, jaki tady byŭ jaje mužam. Sam Džad nikoli nie kazaŭ pra toje, nibyta Aflek adyhraŭ rolu ŭ jaho rasstańni z Łopies, tamu, vierahodna, jašče i da Biena zorny šlub daŭ treščynu.
Chutčej za ŭsio, za paŭtara hoda šlubu Džad tak i nie zdoleŭ zvyknucca z uvahaj tabłoidaŭ i paparacy, ad jakich nie schavacca, kali žyvieš z zorkaj nakštałt Džej Ło. Dženifier, u svaju čarhu, chacieła ad muža sapraŭdnych dasiahnieńniaŭ, a nie prahi da tusovak.
Za ramanam Džen i Biena sačyŭ uvieś śviet. U žniŭni 2002 hoda časopis People zapłaciŭ 75 tysiač dalaraŭ za dzieviać fota Łopies i Aflek u kabryjalecie, na adnym z hetych fota jany całavalisia. A ŭ listapadzie vyjšaŭ klip Džej Ło Jenny from the block, u jakim jaje paŭsiul supravadžaŭ Bien.
Para była takoj papularnaj, što joj navat prydumali asobnuju nazvu — Bienifier. Zaraz z anałahičnych «mianušak» chiba možna ŭspomnić nazvu Brandžalina — tak nazyvali sajuz Breda Pita i Andžaliny Džali.
U kancy 2002 hoda, usiaho praź niekalki miesiacaŭ paśla razvodu Džej Ło, kachanyja zaručylisia. Bien zrabiŭ Dženifier prapanovu ŭ domie svajoj maci ŭ Bostanie. Paźniej śpiavačka ŭzhadvała, što ŭvieś dom byŭ usypany pialostkami ružaŭ, paŭsiul stajali vazy z kvietkami i zapalenyja śviečki, dla atmaśfiery Bien uklučyŭ pieśniu Łopies Glad. Tak na palcy Džen źjaviŭsia piarścionak ź vielizarnym ružovym bryljantam u 6,1 karat koštam amal u 2,4 miljony dalaraŭ.
A potym pačalisia vyprabavańni. U lipieni 2003 hoda Aflek vyrašyŭ naviedać stryp-kłub u Vankuviery, dzie zdymaŭsia ŭ stužcy «Čas raspłaty». Miedyja pisali, što toj nočču Aflek zradziŭ niavieście jak minimum z adnoj žančynaj i što zdrada mahła być zafiksavanaja na videa. Ale ž paźniej źjavilisia źviestki, nibyta akcior toj nočču piŭ tolki vadu i nie dakranuŭsia ni da adnoj sa stryptyziorak.
U vieraśni 2003 hoda Džen i Bien źbiralisia iści da ałtara, ale za dzień da cyrymonii abviaścili, što adkładajuć viasielle. Kachanyja patłumačyli heta praźmiernaj uvahaj miedyja: maŭlaŭ, «my zaŭvažyli, što surjozna razvažajem pra toje, kab naniać troch roznych niaviestaŭ-padmanak, my zrazumieli, što niešta nie tak».
Tady, u nulavych, Aflek tak i nie pabraŭsia šlubam z Łopies. U studzieni 2004 hoda, praz čatyry miesiacy paśla admienienaha viasiella, para abviaściła, što razryvaje zaručyny.
Im spatrebiłasia 17 hadoŭ, kab zrazumieć, što jany ŭsio-taki žadajuć być razam. U hety čas Džen i Bien padtrymlivali siabroŭskija adnosiny i zaŭsiody z pavahaj vykazvalisia adzin pra adnaho ŭ intervju.
Jany zaviali ŭłasnyja siemji. Džej Ło vyjšła zamuž za śpievaka Marka Entani, ad jakoha naradziła bliźniat Emu i Maksa (zaraz im 14 hadoŭ). Aflek ažaniŭsia na aktrysy Dženifier Harnier, jakaja stała maci jahonych troch dziaciej: Vajalet (16 hadoŭ), Sierafiny (14 hadoŭ) i Samiuela (10 hadoŭ).
Druhi šaniec
Viasnoj 2021 hoda Łopies pieražyvała ciažki razryŭ z byłym biejsbalistam Aleksam Radryhiesam. Mienavita tady, jak ličać, Džen znoŭ pačała sustrakacca ź Bienam. U lipieni taho ž hoda Łopies i Aflek vykłali ŭ Instahramie fota z pacałunkami sa śviatkavańnia 52-hodździa Dženifier, a ŭ vieraśni, na Vieniecyjanskim kinafiestyvali, para ŭpieršyniu za doŭhi čas źjaviłasia razam na čyrvonaj darožcy.
U krasaviku 2022 hoda, kali Dženifier prymała vannu ź pienaj, Aflek znoŭ zrabiŭ joj prapanovu. Pra hety ščaślivy momant Džej Ło raskazvała tak: «Jon zaśpieŭ mianie absalutna źnianacku, ja prosta hladzieła ŭ jaho vočy, uśmichałasia i adnačasova płakała, sprabavała ŭśviadomić, što praz 20 hadoŭ heta adbyvajecca znoŭ, u mianie litaralna adniało movu, i jon skazaŭ: heta «tak»? Ja adkazała: «Tak, kaniešnie, heta tak!».
Paśla bolš čym 20 hadoŭ znajomstva, adnosin i rasstańnia kachanyja narešcie pabralisia šlubam. Adbyłosia heta 16 lipienia ŭ adnoj z kaplic amierykanskaha Łas-Viehasa. Jak apisvaje heta navajaŭlenaja misis Aflek, jana była ŭ sukiency sa staroha filma, a žanich apranuŭ pinžak z ułasnaha škafa. Cyrymoniju Džej Ło nazvała «lepšym mahčymym viasiellem, jakoje my byli zdolnyja ŭjavić».
Kažuć, što kachanyja ŭžo nabyli dla siabie ahulnaje hniaździečka. Košt ich novaha asabniaka składaje 50 miljonaŭ dalaraŭ, tam jość basiejn, 10 spalniaŭ, 17 vannych pakojaŭ, sady, kaminy, vinny sklep i chatni kinateatr. Dom byŭ pabudavany ŭ 1930-ch hadach.
Čytajcie taksama:
Ad kachańnia da skonu da sudovaha pazovu. Historyja składanych adnosin Šakiry i Žerara Pikie
«My razam. My doma». Chto takaja Alena Zialenskaja — pieršaja łedzi Ukrainy
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8282
Kamientary