U Prydniastroŭi spynienyja pramysłovyja pradpryjemstvy paśla adklučeńnia rasijskaha hazu
Pa słovach miascovych uładaŭ, pracujuć tolki charčovyja pradpryjemstvy.
Vice-premjer i kiraŭnik Minekanamraźvićcia Prydniastroŭja Siarhiej Abałonik raskazaŭ pra enierhietyčny kryzis u niepryznanaj dziaržavie.
Ź im Prydniastroŭje sutyknułasia paśla spynieńnia pastavak rasijskaha hazu z 1 studzienia.
Pa słovach vice-premjera, stajać usie pramysłovyja pradpryjemstvy za vyklučeńniem charčovych,
pišuć «Naviny Prydniastroŭja».
Da 5 studzienia budzie jasna, kolki enierhii spažyvaje bytavy siektar. Bałans pakaža, što možna nakiravać na patreby pradpryjemstvaŭ.
Abałonik zapeŭnivaje, što na biahučy momant situacyja kiravanaja, ale kali nie vyrašyć prablemu z pastaŭkami hazu, pradpryjemstvy straciać mahčymaść pierazapuścicca.
Miascovy navinovy partał paviedamlaje, što z-za hazavaha kryzisu ŭ Prydniastroŭi ad sistemy ciepłazabieśpiačeńnia adklučyli 131 škołu, 147 dziciačych sadkoŭ, 130 administracyjnych budynkaŭ orhanaŭ dziaržaŭnaj ułady i kiravańnia. Studenty Prydniastroŭskaha dziaržuniviersiteta im. T. H. Šaŭčenka buduć zdavać siesiju anłajn. Paśla zimovych kanikuł usie prydniastroŭskija školniki taksama piarojduć na dystancyjnuju formu navučańnia.
Nahadajem, z 1 studzienia 2025 hoda Ukraina spyniła tranzit rasijskaha hazu. Žychary niepryznanaha Prydniastroŭja — prarasijskaj častki Małdovy, niepadkantrolnaj Kišyniovu — zastalisia biez hazu, ciapła i haračaj vady. Vyklučeńnie zroblena dla balnic i sacyjalnych ustanoŭ.
U šmatkvaternych damach Prydniastroŭja haz pakul zastaniecca dastupnym dla pryhatavańnia ježy. Heta budzie mahčyma dziakujučy zapasam u sistemie hazapravodaŭ, pakul cisk u sietcy nie źnizicca da krytyčnaha ŭzroŭniu.
Elektraenierhija ŭ Prydniastroŭi pakul zastajecca. Miarkujecca, što zapasaŭ vuhalu na Małdaŭskaj HRES chopić jašče na 50 dzion pracy.
Jak paśla kanca śvietu. Ahrasiadzibu ŭ Salihorskim rajonie zaniesła ziamloj3
Kamientary