«Zatrymanaje raźvićcio»: usio bolš maładych ludziej adkładaje darosłaje žyćcio na śviatoha nikoli

Jak piša The Wall Street Jornal, amierykancy, jakim da 30 hadoŭ — i taja samaja tendencyja charakternaja dla ŭsiaho śvietu — usio mienš padobnyja da darosłych.

Va ŭmovach rezkaha źnižeńnia pakazčykaŭ vałodańnia žyllom, šlubaŭ i naradžalnaści ekanamisty papiaredžvajuć, što moładź adčuvaje ciažkaści z dasiahnieńniem zvykłych markieraŭ darosłaha žyćcia. Adny 30-hadovyja śviadoma vybirajuć mienš tradycyjny šlach, inšyja i chacieli b «pastaleć», ale pryznajuć, što dla ich takoje ščaście niedasiažna.

Ciapier, kali spałučeńnie sacyjalnych i ekanamičnych faktaraŭ strymlivaje cełaje pakaleńnie, toje, što raniej daśledčyki nazyvali zatrymkaj, pačynaje vyhladać jak pastajanny stan zatrymanaha raźvićcia.

Heta bolš nie pytańnie «paźniej», a chutčej «nikoli».

Pavodle prahnozaŭ analityčnaha centra Institute for Family Studies, tracina ciapierašnich maładych ludziej nikoli nie stvorać siamji, što značna vyšej, čym u minułyja dziesiacihodździ. Taksama, pa danych Pew Research Center, dola ludziej da 50 hadoŭ, jakija nie źbirajucca zavodzić dziaciej, vyrasła na 10 pracentnych punktaŭ tolki za piać hadoŭ z 2018 pa 2023 hod.

Žyć z tatam i mamaj

Zvyčajna hetuju źmienu pryjarytetaŭ tłumačać vysokim koštam žyćcia, asabliva rostam inflacyi i cenaŭ na žyllo.

Sapraŭdy, siońniašnija 30-hadovyja sutyknulisia ź niaprostymi ekanamičnymi ŭmovami: mnohija ź ich uvajšli na rynak pracy ŭ pieryjad recesii i pieražyli pandemiju, u vyniku čaho paśla vučoby jany viarnulisia žyć dadomu da baćkoŭ.

U ZŠA, dzie vyšejšaja adukacyja płatnaja, značna vyrasła zapazyčanaść pa kredytach na navučańnie, a najaŭnaść vyšejšaj adukacyi nie harantuje dobraj pracy. Pracentnyja staŭki na ipateku ŭzraśli, a košt žytła ŭ vialikich haradach i vakoł ich taki, što robić kuplu ŭłasnaha doma amal niemahčymaj dla mnohich maładych ludziej.

Niahledziačy na ​​toje, što siaredni zarobak rabotnikaŭ va ŭzroście 35—44 hadoŭ z 2000 pa 2024 hod vyras na 16%, a ahulny dabrabyt siońniašnich 30-hadovych na 66 % vyšejšy za ich ravieśnikaŭ z 1989 hoda, tolki 21% hetaj katehoryi nasielnictva aceńvajuć stan ekanomiki jak dobry ci vydatny, što śviedčyć ab subjektyŭnym unutranym piesimiźmie i zavyšanych čakańniach.

Siaredni ŭzrost pakupnika pieršaha žylla ŭ ZŠA ŭ 2024 hodzie dasiahnuŭ 38 hadoŭ. Heta značna bolej, čym u 1981 hodzie, kali jon składaŭ 29 hadoŭ. U svaju čarhu, doŭh pa studenckich kredytach bolš čym padvoiŭsia za apošnija 20 hadoŭ, što taksama mocna ŭskładniaje nabyćcio žylla i stvareńnie siamji.

Chočuć dobra žyć

Adnak ekanamisty robiać vysnovy, što ŭ niežadańnia staleć u maładych ludziej jość i bolš hłybokija prablemy, nie źviazanyja vyklučna z ekanamičnaj niestabilnaściu. Pryčyny takoj źmieny lažać u sacyjalnym i kulturnym kantekstach.

Maładyja ludzi značna bolš piesimistyčna nastrojenyja ŭ adnosinach da budučyni, čym pakaleńni da ich. Jany zakłapočanyja nie tolki ekanamičnymi prablemami, ale i hłabalnymi vyklikami, takimi jak źmiena klimatu, palityčnaja palaryzacyja, raźvićcio štučnaha intelektu i rost upłyvu karparacyj, što stvaraje adčuvańnie niavyznačanaści i tryvohi z nahody budučyni.

Pavodle apytańnia Wall Street Journal/NORCM, praviedzienaha ŭ lipieni 2024 hoda, moładź usio radziej vieryć u mahčymaść dasiahnieńnia «amierykanskaj mary» — pośpiechu dziakujučy pracavitaści, u paraŭnańni z tymi, kamu ciapier bolš za 50 hadoŭ.

I najpieršaja pryčyna hetaha — zavyšanyja čakańni. Siońniašnija pakaleńni imknucca da bolšaha, čym ich papiaredniki. Naprykład, jany chočuć mieć prastornyja damy z asobnymi pakojami dla kožnaha dziciaci i pry hetym adpačyvać niekalki razoŭ štohod, štohod padarožničać, a to i nie raz, i dazvalać sabie darahija kaviarni i inšyja radaści, pra jakija ich baćki navat nie maryli.

Jość niamała siamiej, dzie baćki za svajo žyćcio jeździli ŭ padarožža za miažu raz za žyćcio, a ich 30-hadovyja dzieci ličać za normu vandravać dva razy na hod. 

Moładź, jakaja dasiahnuła 30 hadoŭ, ciapier adčuvaje mienšy cisk z boku siamji i hramadstva prytrymlivacca tradycyjnaha šlachu staleńnia, jaki praduhledžvaŭ karjeru, siamju, žytło i naradžeńnie dziaciej da 35 hadoŭ. Adnak hetaja svaboda vybaru pryviała da pavyšanych čakańniaŭ, pakolki ciapier dla mnohich pośpiech źviazany nie tolki z bazavymi etapami staleńnia, ale i z vysokimi standartami žyćcia.

Charakternaja dla sučasnaj ekanomiki niestabilnaść na rynku pracy i darahoŭla nieruchomaści abciažarvajuć dasiahnieńnie hetych met, što vyklikaje ŭ šmatlikich razhublenaść i niaŭpeŭnienaść u tym, što značyć być paśpiachovym darosłym u sučasnych umovach.

Siońnia moładź značna bolš aryjentujecca na indyvidualnyja kaštoŭnaści.

Mnohija ličać za lepšaje zastavacca adzinokimi, nie zavodzić dziaciej abo adkładać hetyja rašeńni, pakolki adčuvajuć, što jany pavinny spačatku «razabracca z saboj» i svaim žyćciovym vybaram.

Pa danych analizu pierapisu nasielnictva ZŠA, z 1990 hoda dola ludziej va ŭzroście 30-40 hadoŭ, jakija znachodziacca ŭ šlubie, źniziłasia ź dźviuch tracin nasielnictva da trochi bolš za pałovu. Dola žančyn u hetym uzrostavym dyjapazonie, jakija kali-niebudź naradžali, tolki za pieryjad z 2012 pa 2022 hod, adpaviedna danych Current Population Survey, upała na 7 pracentnych punktaŭ — z 78% da 71%.

Navat takaja važnaja padzieja, jak vyjezd z baćkoŭskaha doma, stanovicca ŭsio bolš ciažkaj dla mnohich amierykancaŭ. Siońnia amal 9% ludziej u 30—40 hadoŭ žyvuć z baćkami, što značna bolš, čym u 1990 hodzie, kali hety pakazčyk byŭ na ŭzroŭni 6%.

Takim čynam, ceły šerah faktaraŭ pryvodzić da taho, što mnohija maładyja ludzi zastajucca ŭ stanie niavyznačanaści, nie ŭpeŭnienyja ŭ tym, jak pavinna vyhladać ich žyćcio, i pieražyvajuć kryzis staleńnia, jaki moža pieratvarycca ŭ pastajanny stan «zatrymanaha raźvićcia».

• 17
• 0
• 3
• 2
• 5
• 9
• 2
• 0