Vajskovy ekśpiert Ždanaŭ pra pierśpiektyvy advajavańnia Chiersona: Sučasnaje kontrnastupleńnie — nie abaviazkova ataka ŭ łob
Učora ŭnačy ŭkrainskija vojski nanieśli čarhovy ŭdar pa Antonaŭskim moście ŭ Chiersonie, pa im było vypuščana bolš za dziesiać rakiet z ustanovak HIMARS. Z-za značnych paškodžańniaŭ zaraz most začynieny dla prajezdu navat lehkavoha aŭtatranspartu. Antonaŭski most złučaje pravy bierah Dniapra, na jakim raźmieščany Chierson, ź levabiarežnaj častkaj Chiersonskaj vobłaści. U čym važnaść Antonaŭskaha i dvuch inšych mastoŭ praz Dniapro? I ci moža paśla paškodžańnia mastoŭ amal tysiačnaja hrupoŭka rasijskich vojskaŭ apynucca ŭ akružeńni na pravym bierazie Dniapra? Pra heta Radyjo Svaboda zapytałasia ŭ vajskovaha ekśpierta, pałkoŭnika zapasu Uzbrojenych siłaŭ Ukrainy Aleha Ždanava.
— Chierson znachodzicca na pravym bierazie, i my viadziem havorku pra apieratyŭnaje akružeńnie hrupoŭki vojskaŭ Rasii, to-bok heta kryvarožski i chiersonski napramki. Heta možna ličyć takim apieratyŭnym akružeńniem, tamu što hetyja dva masty, dakładniej, try — adzin čyhunačny i dva aŭtamabilnych, heta adzinyja łancužki, pa jakich možna ažyćciaŭlać usiu łahistyku hrupoŭki rasijskich vojskaŭ na pravym bierazie. Ź ich uziaćciem pad ahniavy kantrol stała zrazumieła, što dalejšaje zabieśpiačeńnie hetych vojskaŭ rasijskich praktyčna niemahčymaje.
— Va ŭmovach, kali rasijskaja armija hublaje kantrol nad stratehična važnymi łahistyčnymi i transpartnymi šlachami, ci možna śćviardžać pra pačatak paśpiachovaha kontrnastupleńnia Uzbrojenych siłaŭ Ukrainy na paŭdniovym kirunku?
— U sučasnaj vajnie kontrnastupleńnie — heta paniaćcie davoli abstraktnaje. Kali my abiaskroŭlivajem hrupoŭku, pazbaŭlajem jaje mahčymaści zabieśpiačeńnia bojeprypasami, palivam, charčavańniem, asabovym składam, technikaj, to heta paraŭnalna z takim, ja b skazaŭ, kambinavanym kontrnastupleńniem. Vojski nie mohuć abaraniacca, tamu buduć vymušanyja adstupać abo zdavacca. Voś heta i možna nazvać sučasnym kontrnastupleńniem. Nie abaviazkova heta pavinna być ataka ŭ łob.
— U vieraśni Maskva płanuje pravieści refierendum ab dałučeńni da Rasii zachoplenych na poŭdni Ukrainy terytoryj. Ci zmoža da hetaha času ŭkrainskaja armija vyzvalić, u pryvatnaści, Chierson?
— Usio budzie zaležać ad intensiŭnaści naniasieńnia ahniavoha paražeńnia hetym vojskam. Kali hrupoŭka budzie rastavać davoli chutka, my budziem intensiŭna nanosić ahniavyja ŭdary, to, u pryncypie, tak. A ź inšaha boku, treba razumieć, što praviadzieńnie refierendumu biez spynieńnia ahniu praktyčna niemahčymaje. Navat u Rasii nielha budzie lehitymizavać hety refierendum, kali jon budzie pravodzicca padčas bajavych dziejańniaŭ. Voś mienavita tamu Rasija ciapier pradprymaje lubyja namahańni dla taho, kab prymusić nas pajści na spynieńnie ahniu.
— Rasijskaje kamandavańnie, pavodle źviestak brytanskaj raźviedki, sutyknułasia z dylemaj: albo zabiaśpiečyć nastupleńnie svaich vojskaŭ u Danieckaj vobłaści, albo ŭzmacnić abaronu na poŭdni Ukrainy. Na vašu dumku, jakim budzie ich rašeńnie?
— Jany ciapier sprabujuć z Kryma vyciahnuć usio, što jość tam, ź Biardzianska, z Maryupala taksama źniać usio, što jość, i chacieli heta pierakinuć u Chierson. My udaram pa Antonaŭskim moście pieraškodzili hetamu pierakidańniu. Ale ja dumaju, što Rasija budzie ciahnuć dva napramki. Jany nie mohuć pakinuć Danieckuju vobłaść, tamu što heta palityčnaja zadača, pastaŭlenaja Pucinym, i tam jany buduć bicca stolki, kolki zmohuć. Ale ŭzmacnić nivodzin z kirunkaŭ jany praktyčna siońnia nie mohuć, tamu što nielha razarvacca i ciahnuć dva napramki adnačasova.
Ja dumaju, u hetym i budzie naša pieravaha, što jany buduć vykonvać u pieršuju čarhu palityčnuju zadaču ŭ Danieckaj vobłaści i buduć niejkimi namahańniami sprabavać vykanać zadaču pa abaronie Chiersona.
Kamientary