Z pačatku vajny rasijski kinaprakat bajkatujuć viadučyja suśvietnyja kinakampanii The Walt Disney Company, Warner Bros, Sony Pictures, Paramount — adpaviedna i Biełaruś pazbaviłasia halivudskich premjer. Što pakazvajuć kinateatry?
Pakazvajuć małaviadomyja amierykanskija stužki
Amierykanskija stužki šmat hadoŭ pryciahvali ŭ kinazały bahata hledačoŭ. Što rabić zaraz, kali topavyja karciny ŭžo niedastupnyja? Miarkujučy pa afišach, prakatčyki sprabujuć vyjści ź situacyi šlacham pakazu karcin, zroblenych taksama ŭ ZŠA, ale ŭ mienš viadomych studyjach.
Naprykład, zaraz vyjšaŭ u prakat tryler «Vyška» (The Fall), źniaty kinošnikami z Brytanii i ZŠA. Na vialikim resursie IMDB stužka nabrała 6,5 bała rejtynhu z 10, što, viadoma, nie ciahnie na rossyp kinaŭznaharod, ale vyhladaje davoli prystojna pa mierkach siońniašniaha biełaruskaha kinaprakatu. Siužet nie nadta składany: dźvie siabroŭki zabirajucca na radyjomačtu, kab raźviejać na vyšyni prach muža adnoj ź ich. Ale zdarajecca niepradbačanaje, i žančyny hublajuć mahčymaść samastojna źleźci z vyški.
Zavalvajuć hledačoŭ rasijskaj pradukcyjaj
Z pačatkam kinabana ŭ prakacie zaŭvažna paboleła rasijskich stužak. Naprykład, zaraz u minskich kinateatrach možna pabačyć turemny tryler «Načny režym» pra toje, jak asudžany na pažyćciovaje źniavoleńnie fatohraf sprabuje dakazać svaju nievinavataść z dapamohaj kamunikacyi ź nieviadomym čałaviekam praz sny.
Leta — čas filmaŭ pra adpačynak, i ŭ Biełarusi zaraz pakazvajuć ažno dźvie takija stužki. «Lehiendy Arlaniaci» i «Artek. Vialikaje padarožža» možna lohka pierabłytać pamiž saboj, bo ŭ abiedźviuch karcinach dziejańnie adbyvajecca ŭ viadomych dziciačych łahierach, dy jašče i ŭ abodvuch vypadkach majuć miesca mahičnyja padarožžy. Rejtynh druhoj stužki na «Kinapošuku» — 6,1 bała, a voś dla taho, kab acanić pieršuju karcinu, na sajcie nie chapiła vodhukaŭ.
Heta nie adzinaje kino ź nizkim rejtynham siarod tych, što pakazvajuć zaraz biełarusam. Uziać, naprykład, prajekt «Chronas», źniaty pa tvorach savieckaha fantasta Kira Bułyčova, jaki maje na «Kinapošuku» anałahičnyja minułaj stužcy 6,3 bała rejtynhu.
Adšukvajuć jeŭrapiejskaje kino
Časam u kinateatrach pakazvajuć sapraŭdy jakasnaje jeŭrapiejskaje kino, i heta, badaj, adna ź niešmatlikich addušyn dla biełaruskich kinamanaŭ. Zaraz, naprykład, možna pabačyć u kino narviežskuju kamiedyju «Usie nienavidziać Jochana» ź niebłahimi 7,1 bała rejtynhu na IMDB ci ispana-arhientynskuju dramu «Hałoŭnaja rola» z takim ža rejtynham dy i z zorkami ŭ hałoŭnaj roli — Pieniełopaj Krus i Antonia Banderasam.
Ale byvajuć i horšyja znachodki. Supiarečlivyja vodhuki sabrała polskaja drama «Eskortnicy» pra maładuju sucieniorku, jakaja nabiraje kamandu dziaŭčat dla arabskich šejchaŭ. Jašče adno kino, jakoje zrazumiejuć nie ŭsie, — heta «Razvod u styli kunh-fu», francuzskaja trahikamiedyja pra žančynu, jakaja vučycca bajavomu mastactvu, kab syści ad muža-abjuziera. Ci «Bojsia ciemry» — film žachaŭ pra mistyčnyja padziei kala hłuchoj vioski.
Paŭtarajuć dobraje staroje kino
Z pačatkam sankcyj u afišach paboleła starych stužak. Jość siarod ich i pryznanyja karciny. Tak, zaraz u minskim prakacie iduć usie try častki «Niastrymnych» — bajevika ź Silviestram Stałone, Mełam Hibsanam i inšymi papularnymi zorkami ekšn-muvi 90-ch.
Na hetych vychadnych u Minsku demanstravali biełaruskuju stužku 2014 hoda pad nazvaj «Kinder-Vilejski pryvid» pra staražytnuju siadzibu ŭ Vilejskim rajonie i zły duch, što žyvie ŭ joj. Žadańnie pakazvać svajo — źjava pachvalnaja, ale ž «Kinder-Vilejski pryvid» maje davoli nievysokija acenki (4,7 z 10 bałaŭ na «Kinapošuku», 5,3 z 10 bałaŭ na mižnarodnym resursie IMDB).
Zdajecca, hledačam było b cikaviej bačyć na kinaekranach bolš viadomaje i pryznanaje biełaruskaje kino. Jak nakont taho, naprykład, kab viarnuć u kinazały «Chrustal»? Nahadajem: hetaja stužka 2018 hoda ad režysiorki Darji Žuk udzielničała ŭ niekalkich jeŭrapiejskich i paŭnočnaamierykanskich kinafiestyvalach i mieła šansy trapić u doŭhi śpis pretendentaŭ na «Oskara» za lepšuju karcinu na zamiežnaj movie.
Jakija stužki prapuskajuć
Naprykancy nazaviem tolki niekatoryja z błakbasteraŭ, jakija biełarusy nie zmahli pabačyć na vialikim ekranie za čas sankcyj. Usie jany mieli šansy źbirać poŭnyja zali:
- «Chutčej za kulu» — kamiedyjny bajavik z Bredam Pitam pra najomnych zabojcaŭ;
- «Top Han: Mevieryk» — vysokabiudžetny praciah sahi 1986 hoda «Lepšy strałok» z Tomam Kruzam;
- «Ełvis» — bijahrafičnaja stužka pra karala rok-n-roła ad hienijalnaha Baza Łurmana;
- «Morbius» — maštabnaja ekranizacyja komiksaŭ z Džaredam Leta ŭ hałoŭnaj roli;
- «Fantastyčnyja stvareńni: Tajamnicy Dambłdora» — fentezi-saha pa siužecie ad Džoan Roulinh.
Kamientary