Azierbajdžan z Turcyjaj vykarystoŭvajuć pa poŭnaj prahramie ŭkrainski pravał Rasii, Armienija raspłačvajecca za staŭku na Maskvu

Unačy z 12 na 13 vieraśnia Azierbajdžan pačaŭ abstrelvać armianskija pazicyi kala nasielenych punktaŭ Harys, Sotk i Džermuk, heta poŭdzień Armienii, z artyleryi i «Bajraktaraŭ».

U Baku ž zajaŭlajuć, što jany prosta adkazvajuć na dyviersii na miažy.

U Armienii harać kazarmy i składy.

Armianie i azierbajdžancy vajujuć daŭno. Novaje ŭ siońniašnich padziejach toje, što bai ŭpieršyniu iduć nie na terytoryi Nahornaha Karabacha, jaki pavodle mižnarodnaha prava źjaŭlajecca častkaj Azierbajdžana, choć častkova i kantralujecca Armienijaj užo try dziasiatki hadoŭ, a na mižnarodna pryznanaj armianskaj terytoryi. 

Armianie bajacca, što Azierbajdžan i Turcyja vyrašyli prabić suchaputny kalidor u tak zvanym Zanhiezury. Hetyja malaŭničyja hory ŭ Armienii adździalajuć ad Azierbajdžana jaje častku, Nachičevań. 

Rasija maje ŭ Armienii vajskovuju bazu i navat miežy krainy achoŭvajuć rasijskija pamiežniki. Ale rasijskija vojski ciapier jak tryškin kaftan. Šajhu i Hierasimaŭ pierakidvajuć svaje redkija reziervy z Danbasa pad Chierson i nazad.

Voś čamu siońnia ŭnačy premjer-ministr Armienii Nikoł Pašynian telefanavaŭ nie tolki prezidentu Rasii Uładzimiru Pucinu, ale taksama prezidentu Francyi Emaniuelu Makronu. 

Tolki Makron nie maje ŭpłyvu na Turcyju, turki samadastatkovyja ŭ vajennym płanie. A Azierbajdžan — blizki sajuźnik Turcyi, jany ličać siabie bratnimi narodami. I Francyja, i ZŠA buduć uhavorvać Ankaru i Baku spynicca, ale ci pasłuchajuć tyja? 

Armienija ŭvachodzić u Arhanizacyju damovy ab kalektyŭnaj biaśpiecy naroŭni ź Biełaruśsiu, Rasijaj, Kazachstanam, Kyrhyzstanam, Tadžykistanam i Uźbiekistanam. U adpaviednaści z umovami damovy inšyja členy arhanizacyi pavinny prychodzić na dapamohu, kali niechta napadzie na Armieniju. Ale ADKB zaŭsiody było jak lebiedź, ščupak i rak, kožny sa svaimi intaresami. Adziny raz, kali krainy ADKB dziejničali zładžana, było ŭ Kazachstanie ŭzimku. Dyk tam byŭ škurny intares dyktataraŭ, a Armienija — akurat adzinaja demakratyčnaja kraina ŭ tym ADKB. Paradaksalna budzie, kali za Armieniju ŭstupicca nie ADKB, a Iran, jaki maje svaje intaresy.

Armienija płacić strašnuju canu za toje, što apošni čas padtrymlivała Rasiju. Ciapier, kali Rasija zaviazła va Ukrainie, u Maskvy prosta niama siłaŭ, kab abaranić svaju kaŭkazskuju sajuźnicu. I heta tolki pieršy zvanočak taho, jak asłabiła Rasija svaje pazicyi ŭ śviecie haniebnaj ahresijaj suprać Ukrainy.

• 145
• 0
• 17
• 5
• 9
• 18
• 8
• 0