Rasija aficyjna pryznała, što za 7 miesiacaŭ straciła bolš vajskoŭcaŭ, čym za 4 hady Afhanistana i Pieršuju čačenskuju
Ministr abarony Rasii Siarhiej Šajhu padčas svajho zvarotu na telekanale «Rasija 24» ahučyŭ kolkaść strat rasijskaj armii z pačatku vajny. Ličbu niepraŭdzivuju, ale pakazalnuju.
— 5937 čałaviek zahinuli va Uzbrojenych siłach Rasii z pačatku «śpiecyjalnaj vajennaj apieracyi» (vajny suprać Ukrainy — zaŭv. NN), — zajaviŭ rasijski ministr.
Hetaja ličba, vidavočna, źjaŭlajecca zanižanaj.
Resursy, jakija viaduć padlik pa adkrytych krynicach, užo naličyli kala 6300 zahinułych.
Akramia taho, Šajhu zajaviŭ pra 5937 zahinułych tolki ŭ armii. Ale svaje straty jość nie tolki ŭ vajskoŭcaŭ, ale i ŭ MUS, Rashvardyi, pryvatnych vajennych kampanij, «dobraachvotnikaŭ», śpiecsłužbaŭ, armij tak zvanych «ŁNR» i «DNR».
Ukrainskija aficyjnyja asoby i zachodnija ŚMI ŭvohule nazyvajuć u 10 razoŭ bolšyja ličby.
Navat kali ličyć ličby Šajhu praŭdzivymi, jon aficyjna pryznaŭ, što Rasija za niapoŭnyja 7 miesiacaŭ «śpiecapieracyi» straciła ludziej bolš, čym SSSR za pieršyja 4 hady vajny ŭ Afhanistanie i Pieršuju čačenskuju vajnu.
Voś jak vyhladali straty SSSR pavodle aficyjnych danych za pieršyja 4 hady vajny.
| 1979 hod | 86 čałaviek |
| 1980 hod | 1484 čałavieki |
| 1981 hod | 1298 čałaviek |
| 1982 hod | 1948 čałaviek |
U sumie — 4816 čałaviek.
Pavodle aficyjnych danych, u Pieršuju čačenskuju vajnu Rasija straciła 5732 čałaviek z armii i MUS.
Viadoma, i ciapierašnija ličby Šajhu, i spravazdačy savieckich hienierałaŭ, i rasijskaja statystyka za 1994-1996 — chłuślivyja. Ale prynamsi aficyjna Rasija pryznała, što za 7 miesiacaŭ «śpiecapieracyi» jana straciła bolš vajskoŭcaŭ, čym za 4 hady Afhanistana i Pieršuju čačenskuju.
Vajennyja niaŭdačy SSSR u Afhanistanie i niaŭdačy Rasii ŭ Čačni stali mocnymi destabilizujučymi faktarami. Upłyŭ hetych vojnaŭ na rasijskuju palityku, hramadskuju dumku i masavuju kulturu ciažka pieraacanić. Imavierna, upłyŭ rasijska-ŭkrainskaj vajny budzie jašče bolš istotnym i balučym dla rasijskaj dziaržavy.
Ciapier čytajuć
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu1515
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu15
«Ja skazaŭ na videa, što mianie nie katujuć — na toj momant heta było praŭdaj. A praź dźvie hadziny mianie źbili». Ukrainski žurnalist dva hady pravioŭ u rasijskim pałonie — voś što jon pieražyŭ11
Kamientary