Mabilizacyja niepaźbiežnaja i ŭ Biełarusi? Tłumačać śpiecyjalisty
Ci budzie abvieščanaja mabilizacyja i ŭ Biełarusi? Takoje pytańnie ŭźnikaje paśla zajavy Uładzimira Pucina ab «častkovaj mabilizacyi» ŭ Rasii. Alaksandr Łukašenka stvaryŭ z Rasijaj «Sajuznuju dziaržavu». Ci zmoža zaraz Biełaruś uchilicca ad praviadzieńnia mabilizacyi? «Naša Niva» raspytała ekśpierta pa pytańniach biaśpieki Alaksandra Alesina i paprasiła prakamientavać kiraŭnika BISS Piatra Rudkoŭskaha.
Pavodle «sajuznaj damovy», Biełaruś abaviazanaja vajavać u vypadku, kali Rasija padvierhniecca ahresii.
«U vypadku z Ukrainaj nieabchodna, kab Viarchoŭnaja Rada abjaviła vajnu Rasii abo Dziaržaŭnaja Duma Rasijskaj Fiederacyi zajaviła, što jana znachodzicca ŭ stanie vajny z Ukrainaj. Tady ŭstupaje ŭ siłu Sajuznaja damova Biełarusi i Rasiei, pa jakoj baki abaviazvajucca abaraniać terytoryi adzin adnaho jak svaje ŭłasnyja, — tłumačyć Alaksandr Alesin.
— Tolki tady Biełaruś abjaŭlaje mabilizacyju, razhortvaje svajo vojska, zdymaje techniku z zachoŭvańnia i pačynaje vajennyja dziejańni.
Pakul Rasijskaja Fiederacyja nie źmianiła status apieracyi sa «śpiecyjalnaj vajennaj» na «vajnu» i nie ŭviała vajennaha stanovišča, to toje, što adbyvajecca ŭ Rasii, źjaŭlajecca pryvatnaj spravaj hetaj krainy, dla Biełarusi nijakich pravavych nastupstvaŭ być nie moža», — tłumačyć jon.
Ci moža tak stacca, što vajna ŭsio ž budzie abvieščanaja adnym z bakoŭ? «U takim vypadku Biełaruś budzie abaviazana pačać vajennyja dziejańni na baku Rasijskaj Fiederacyi i ŭ jakaści pieršaha kroku — abjavić mabilizacyju», — kaža ekśpiert.
Alaksandr Alesin ličyć, adnak, što imaviernaść takoha raźvićcia padziej nie vielmi vialikaja.
«Rasija vusnami Pucina zajaviła, što jana nie budzie mianiać status śpiecyjalnaj vajennaj apieracyi, heta nie ŭ jaje intaresach», — miarkuje Alesin.
«Praz terytoryju Ukrainy praciahvajecca tranzit rasijskaha hazu i inšych resursaŭ. I za heta Ukraina, jak ni paradaksalna, praciahvaje atrymlivać ad Rasii hrošy. Častku hetych srodkaŭ jana vykarystoŭvaje dla viadzieńnia bajavych dziejańniaŭ suprać Rasii», — źviartaje ŭvahu ekśpiert.
Navošta ž Pucin abjaviŭ «častkovuju mabilizacyju»?
«U Rasii vielmi vialiki front i im nie chapaje siły. Niekatoryja ŭčastki navat prykrytyja nie vajskovymi čaściami, a siłami Nacyjanalnaj hvardyi, SACHRa.
Ukraina akazałasia bolš surjoznym supiernikam, čym dumali ŭ Rasii.
Paśla apieracyi pad Charkavam Rasija ŭśviadomiła, što biez dadatkovych sił jana niazdolnaja ŭziać pad kantrol Ukrainu, uziać tuju terytoryju, jakuju jana sabie paznačała.
Kali vieryć słovam Siarhieja Šajhu, zaraz mabilizujecca tolki 300 tysiač. Takaja mabilizacyja sapraŭdy častkovaja, tamu što hrošaj treba vielmi šmat na heta, a Rasija adčuvaje ekanamičnyja ciažkaści. I zaraz moža sabie dazvolić tolki takuju kolkaść ludziej, jakich jana moža ŭzbroić, dać zarobak i zabiaśpiečyć sacyjalnym pakietam.
Uličvajučy, što samyja maładyja, pracazdolnyja, tyja, chto jašče nie vyznačyŭsia ŭ žyćci, nie majuć dastatku, častka ź ich paličyć, što heta sposab zarobku. Hrošy, jakija buduć naličanyja, vialikija.
Ciapier u Rasii jašče jość niekatoraje biespracoŭje z-za zakryćcia niekatorych pradpryjemstvaŭ i sankcyj. Takim čynam, rašajecca i druhaja prablema. Sacyjalna niebiaśpiečny elemient, moładź, jakaja straciła pracu, moža być pryzvanaja na vajskovuju słužbu», — padsumoŭvaje Alaksandr Alesin.
Palitołah, kiraŭnik BISS Piotra Rudkoŭski taksama ličyć, što mabilizacyja ŭ Biełarusi małaimaviernaja.
«Pa maich acenkach, zaraz dubl dva ŭ stasunku da taho, što było 24 lutaha: Pucin z-za pravału tak zvanaj «śpiecapieracyi» abjaŭlaje novuju vajennuju kampaniju ź vidaźmienienymi metami i z uklučeńniem mabilizacyi.
Łukašenka, anałahična jak u lutym, uzmacniaje prarasijskuju i antyzachodniuju rytoryku i hetym, chutčej za ŭsio, jaho «padtrymka» abmiažujecca.
Adpadaje taksama nieabchodnaść pradstaŭlać biełaruskuju terytoryju z-za inšaj hieahrafii vajennych dziejańniaŭ.
Biełaruś i Rasija — sajuznyja dziaržavy. Tam jość davoli raspłyvisty punkt pra toje, što «ataka na adnu z členaŭ Sajuznaj dziaržavy razhladajecca jak ataka na Sajuznuju dziaržavu u cełym» i što ŭ takim vypadku buduć prymianiać adpaviednyja miery.
Praktyčnaje značeńnie hetaha zapisu minimalnaje: pa-pieršaje, z-za raspłyvistaści farmuloŭki. U čym majuć zaklučacca hetyja «miery»? Naprykład, Łukašenka moža hučna asudzić «ataku na sajuźnika».
Pa-druhoje, usio bačna pa funkcyjanavańni ADKB. U adroźnieńnie ad Sajuznaj dziaržavy, hetaja arhanizacyja śpiecyjalna stvorana dziela kalektyŭnaj abarony ŭ vypadku vonkavaj pahrozy. Armienija ŭžo dva razy źviartałasia z prośbaj abaranić ad Azierbajdžana. I ničoha.
Tak što tut u kančatkovym płanie ŭsio budzie zaležać ad niefarmalnych uzhadnieńniaŭ. Łukašenka, kali jaho nie prycisnuć całkam, nie budzie ŭ heta leźci», — tłumačyć palitołah.
Čytajcie taksama:
U Rasii prachodziać akcyi suprać mabilizacyi. Udzielnikam pratestaŭ pahražajuć turmoj da 15 hadoŭ
Rasija aficyjna pryznała, što za 7 miesiacaŭ straciła bolš vajskoŭcaŭ, čym za 4 hady Afhanistana i Pieršuju čačenskuju
Maskva śpiašajecca z fejkavymi refierendumami, množyć pahrozy. Ci moža być atamny ŭdar? I što aznačajuć sinchronnyja zajavy Łukašenki?
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary