Za tydzień u Biełarusi zakrylisia 8 pryvatnych škoł, jašče 12 atrymali pradpisańni ab spynieńni dziejnaści
Za minuły tydzień u Biełarusi zakrylisia 8 pryvatnych škoł, jašče 12 atrymali pradpisańni ab spynieńni dziejnaści. Takija vyniki pravierak paśla incydentu ŭ adnoj z pryvatnych škoł stalicy, paviedamlaje ahienctva «Minsk-Naviny» sa spasyłkaj na telekanał «Biełaruś 1».
U pryvatnaj škole «Smart skuł» 15 vieraśnia zdaryŭsia incydent z navučencami, padčas jakoha adno dzicia paciarpieła. Pavodle słoŭ pieršaha namieśnika načalnika Hałoŭnaha śledčaha ŭpraŭleńnia Śledčaha kamiteta Biełarusi Alaksandra Ahafonava, u navučalnaj ustanovie nie adrazu vyklikali miedykaŭ paciarpiełaj dziaŭčyncy i pasprabavali pazbavicca ad śviedčańniaŭ zdareńnia.
— Mieła miesca zvyčajnaje biez nahladu bałaŭstvo dziaciej na pieramienie ŭ kłasie pamiž urokami. Pa nieaściarožnaści zrobleny streł šarykam sa spružynnaha cacačnaha pistaleta, škło, jakoje raźbiłasia, paraniła voka vučanicy, — rastłumačyŭ Ahafonaŭ.
Hałoŭny doktar 4-j dziciačaj kliničnaj lakarni h. Minska Vital Łužynski zapeŭniŭ, što zroku dziciaci ničoha nie pahražaje.
Što vyjavili padčas pravierak
Pa słovach dyrektara Departamienta kantrolu jakaści adukacyi Ministerstva adukacyi Biełarusi Michaiła Mirončyka, va ŭstanovie na zaniatkach prysutničajuć navučency 1, 2 i 4 kłasa — usiaho kala 25 čałaviek. Pry hetym dakumientacyju dla pravierki padać niama kamu: na miescy tolki piedahohi i dzieci, a pradstaŭnikoŭ administracyi niama. Pry hetym u Śledčym kamitecie ŭdakładnili, što kiraŭnictva «Smart skuł» častku dakumientacyi źniščyła.
Ministr adukacyi Biełarusi Andrej Ivaniec adznačyŭ, što častka pryvatnych navučalnych ustanoŭ siaredniaj adukacyi ŭ Biełarusi padtrymlivajucca z-za miažy i majuć anałahičnyja filijały, naprykład, u Prybałtyjskich dziaržavach.
— Viadoma, heta niedapuščalna, kab zamiežnyja dziaržavy jakim-niebudź čynam umiešvalisia ŭ adukacyju i vychavańnie našaha padrastajučaha pakaleńnia, — ličyć Ivaniec.
Što tyčycca škoły «Smart skuł», košt navučańnia ŭ joj za miesiac składaŭ 1200 rubloŭ, a praviaralniki nibyta vyjavili va ŭstanovie masu niedachopaŭ.
Pa słovach načalnika ŭpraŭleńnia pa adukacyi administracyi Centralnaha rajona h. Minska Iny Kamiejša, pravierka pakazała: pamiaškańnie, vyznačanaje jak stałovaja dla navučencaŭ «Smart skuł», nie adpaviadała normam, i tamu siertyfikat hatoŭnaści dla hetaj navučalnaj ustanovy padpisany nie byŭ. Zasnavalnik škoły zapeŭniŭ, što zaniatki nie viaducca, adnak akazałasia, što «Smart skuł» uvieś hety čas pracavała. U škole vyjavili i parušeńni sanitarnych norm.
Što buduć rabić ułady
Kiraŭnik Ministerstva adukacyi Andrej Ivaniec padkreśliŭ, što na biahučym tydni moža być pryniaty zakon ab licenzavańni pryvatnych navučalnych ustanoŭ, jaki daść mahčymaść navieści paradak u śfiery pryvatnaj adukacyi ŭ Biełarusi.
Miž tym, jašče da zdareńnia źjavilisia paviedamleńni pra sarvany pačatak navučalnaha hoda ŭ pryvatnych škołach. Sa škoł, jakija časova spynili pracu, adbyŭsia adtok vučniaŭ. Dzieci byli vymušanyja pierachodzić u inšyja škoły, u tym liku ŭ Minskuju mižnarodnuju himnaziju. Hetaja škoła, zasnavanaja Irynaj Abielskaj, byłoj lekarkaj Alaksandra Łukašenki, mierkavanaj maci Koli Łukašenki.
Kamientary
łukašienko nie jedinoždy voschvalał hitlera i jeho politiku.