Sudździa suda Maskoŭskaha rajona Minska Alena Šylko 1 kastryčnika aštrafavała na 12 bazavych vieličyń (420 tys. rubloŭ)
pastara carkvy «Novaje žyćcio» Relihijnaha abjadnańnia abščyn chryścijan poŭnaha Jevanhiella ŭ Respublicy Biełaruś Viačasłava Hančarenku, paviedamiŭ juryst carkvy Siarhiej Łukanin.
9 vieraśnia namieśnik prakurora Maskoŭskaha rajona Kirył Mazoŭka ŭ adpaviednaści z art. 23.1 Kodeksa ab administracyjnych pravaparušeńniach i pałažeńniami zakona ab pažarnaj biaśpiecy skłaŭ na Hančarenku pratakoł ab administracyjnym pravaparušeńni ŭ suviazi z admovaj viernikaŭ dapuskać u chram pradstaŭnikoŭ vykanaŭčaj ułady. Hetaje rašeńnie, pryniataje na ahulnym schodzie viernikaŭ, dziejničaje ź listapada 2007 hoda i źjaŭlajecca formaj pratestu suprać niezakonnych, na dumku Łukanina, sudovych pastanoŭ, jakija pastajanna vynosiacca pa spravach carkvy, patłumačyŭ juryst.
Jon adznačyŭ, što 30 vieraśnia pry razhladzie spravy ŭ sudzie pastar nie pryznaŭ siabie vinavatym, nazvaŭ dziejańni carkvy vymušanymi. «My i nadalej nie budziem dapuskać čynoŭnikaŭ u budynak carkvy», — padkreśliŭ Łukanin. Jon nie vyklučaje, što ŭ takoj situacyi mahčymy kryminalny pieraśled pastara.
10 sakavika 2008 hoda sudździa Maskoŭskaha rajona Taćciana Matyl aštrafavała Hančarenku na 350 tys. rubloŭ za admovu vykonvać prakurorskaje pradpisańnie ab dopusku ŭ chram supracoŭnikaŭ MNS.
Hramadzianskaja sprava pamiž carkvoj i Minharvykankamam pa pytańni znosu budynka pa Kavalova, 72, viałasia z kastryčnika 2005 hoda. U kastryčniku 2006 hoda vierniki praviali 23‑dzionnuju haładoŭku, padčas jakoj Hančarenku zaprasili ŭ Administracyju prezidenta i prapanavali vyrašyć situacyju ŭ sudzie. U studzieni 2009 hoda Vyšejšy haspadarčy sud paćvierdziŭ zakonnaść rašeńnia harvykankama ab adabrańni ziamielnaha ŭčastka abščyny z nastupnym vykupam budynka carkvy za 37,5 młn. rubloŭ.
16 sakavika ŭłady prapanavali viernikam abmierkavać pytańnie budaŭnictva ŭ rajonie MKAD — vulicy Šaranhoviča novaha budynka carkvy na ŭčastku płoščaj kala 0,4 ha, jaki ŭ čatyry razy mienšy za raniej vydzieleny. Na ahulnym schodzie 5 maja vierniki adnahałosna prahałasavali suprać hetaj prapanovy. Jany ličać, što vyrašeńnie pytańnia ab vydzialeńni abščynie novaha ŭčastka zojmie da dvuch hadoŭ i zapatrabuje ad carkvy nie mienš čym 100 tys. dołaraŭ ZŠA, a zbudavańnie novaha chrama — nie mienš čym 3 młn. dołaraŭ.
22 žniŭnia staličnyja ŭłady ŭručyli pradstaŭnikam abščyny akt pryjomki‑pieradačy budynka carkvy, jaki vierniki admovilisia padpisać. Z 24 žniŭnia jany viaduć u chramie biesterminovaje kruhłasutačnaje malitoŭnaje dziažurstva.
Kamientary