Sparvańnie pčołaŭ, niabiesnyja fłaminha i inšyja pieramožcy prestyžnaha konkursu fatahrafij dzikaj pryrody FOTA
Samcy kaktusavych pčoł ablaplajuć samku. Ale chto ź ich akažacca tym ščaśliŭčykam, jaki zmoža ź joj sparycca? Hety vydatny zdymak, zrobleny Karyn Ajhnier, staŭ pieramožcam konkursu Wildlife Photographer of the Year u hetym hodzie, piša «Bi-bi-si».
Z adnaho boku, heta davoli techničnaja karcinka. Dla taho, kab patrapić u samuju hušču padziej, daviałosia vykarystoŭvać makraabjektyŭ. «Mnie daviałosia pravieści davoli šmat času, ležačy na žyvacie ŭ hrazi», — kaža Karyn.
Amierykanka stała tolki piataj žančynaj, jakaja vyjhrała hałoŭny pryz za 58-hadovuju historyju konkursu WPY.
«Nie toje kab ja śpiecyjalna heta šukała. Ja ŭžo šmat hadoŭ pracuju na ranča ŭ Paŭdniovym Techasie, i prosta vypadkova apynułasia ŭ hetym miescy. Ja ŭbačyła ŭsie hetyja maleńkija «vułkany» ŭ ziamli — asobnyja nory, vykapanyja samkami dla stvareńnia hniozdaŭ», — raspaviała jana «Bi-bi-si».
Kaktusavyja pčoły, jak vynikaje z nazvy, žyvuć na kaktusavych raślinach i vakoł ich. Samki źbirajuć pyłok, jaki pieratvarajuć u maleńkija šaryki i zachoŭvajuć u kamierach u hlebie. U hetych šarykach raźvivajucca ličynki, jakija zatym vybirajucca na pavierchniu i praciahvajuć repraduktyŭny cykł.
«Karcina cudoŭnaja, u joj stolki enierhii! Heta sapraŭdny «pavodzinny» zdymak. Za heta ja i lublu bieschrybietnych, — skazała Roz Kidman Koks, staršynia žury WPY. — Važnaja i kampazicyja. Što robić fatahrafiju zavieršanaj, dyk heta pčoły, jakija prylatajuć zboku. Jany i dajuć vam «saŭndtrek».
Maładym fatohrafam hoda dzikaj pryrody ŭ 2022 hodzie staŭ Katańju Vuciičajtanakorn z Tajłanda. Pieramožnaja praca 16-hadovaha fatohrafa — heta źniataja bujnym płanam hałava pałasacika Brajda i kitovych płaścin u jaho paščy, jakija vykarystoŭvajucca dla filtracyi ježy. Na ich fonie bačnyja sardziny, jakija sprabujuć vyratavacca ad kita. «Niejkim čynam sardzina zaskočyła ŭ łodku, — uspaminaje Katańou. — Mnie pašancavała. Ja padabraŭsia ŭ łodcy bližej, a kit zastavaŭsia nad vadoj kala chviliny».
WPY — adzin z najbolš prestyžnych konkursaŭ u suśvietnaj fatahrafii. Konkurs byŭ zasnavany ŭ 1964 hodzie časopisam BBC Wildlife Magazine, a ciapier jaho arhanizataram źjaŭlajecca Łondanski Muziej naturalnaj historyi. Sioleta na konkurs było padadziena 38575 rabot z 93 krain.
Nižej pradstaŭlenyja niekatoryja ź pieramožcaŭ u roznych katehoryjach.
«Śmierć Ndakasi». Brent Styrtan, Paŭdniovaja Afryka
Brent Styrtan — viadomy fotažurnalist. Na jaho fatahrafii adlustravanyja apošnija momanty žyćcia Ndakasi, hornaj haryły, jakaja była vyratavanaja ŭ dvuchmiesiačnym uzroście. Jaje zhraju zabili brakańjery z mafii, jakaja zajmajecca nielehalnaj vytvorčaściu draŭnianaha vuhalu ŭ Nacyjanalnym parku Virunha ŭ Konha. Ndakasi znachodzicca na rukach u svajho vyratavalnika i apiekuna Andre Baŭma.
«Niabiesnyja fłaminha». Dziundzi Takasaha, Japonija
Hetyja fłaminha źniatyja vysoka ŭ Andach na najbujniejšym u śviecie sałančaku Ujuni. Tut taksama znachodzicca adzin z najbujniejšych u Balivii lityjevych rudnikoŭ, što stavić pad pahrozu budučyniu fłaminha. Kab zrabić hety zdymak, japonskamu fatohrafu Dziundzi Takasaha pryjšłosia pieranieści vyšynnuju chvarobu, ale jaho namahańni prynieśli jamu pieramohu ŭ katehoryi «pryrodny artystyzm».
«Voziera, jakoje pamiraje». Daniel Nuńjes, Hvatemała
Daniel Nuńjes vykarystaŭ robata, kab zachapić kantrast pamiž lesam i vodaraściami na krai hvatemalskaha voziera Amatytłan. Cyjanabakteryi ŭ vadzie razmnažajucca z-za prysutnaści zabrudžvalnych rečyvaŭ, takich jak ściokavyja vody, što vyciakajuć z horada Hvatemała. Zdymak pieramoh u katehoryi «vodna-bałotnyja ŭhodździ».
«Padajučaja zorka». Toni Vu, ZŠA / Japonija
Toni Vu zafiksavaŭ hetuju scenu la bierahoŭ Japonii. Na joj vyjaŭlenaja hihanckaja marskaja zorka ŭ momant nierastu. Ihołkaskuryja ruchajuć kaniečnaściami i razhojdvajuć svajo cieła, mahčyma, kab nakiravać ikrynku i śpiermu ŭ padvodnuju płyń, dzie jany zmohuć apładnicca. Zdymak pieramoh u naminacyi «Padvodnaja zdymka».
«Palaŭničy na kažanoŭ». Fiernanda Kanstancina Marcines Bielmar
Fiernanda Kanstancina Marcines Bielmar zrabiŭ hety zdymak u miescy, viadomym jak Piačora visiačych źmiej u Mieksicy. U pryciemkach tysiačy kažanoŭ pakidajuć piačoru ŭ pošukach nasiakomych. Kali jany laciać, sa ścien piačory spuskajucca i źvisajuć połazy, sprabujučy zdabyć sabie ježu. Zdymak pieramoh u naminacyi «Pavodziny: amfibii i reptylii».
«Miadźviedžy dom». Dźmitryj Koch, Rasija
Dźmitryj Koch zrabiŭ hety zdymak na vostravie Kalučyn, jaki znachodzicca ŭ Čukockim mory ŭ Arktycy. Biełyja miadźviedzi — i na piarednim płanie, i ŭ tumanie, jaki visić nad zakinutymi budynkami. Dźmitryj, jachtsmien, chavaŭsia na vostravie ad štormu. Jon vykarystaŭ nievialikaha robata, kab padabracca da drapiežnikaŭ. Zdymak pieramoh u katehoryi «Dzikaja pryroda ŭ horadzie».
Akaŭnt Kabančuka ŭzłamali — ale ci biełaruskija śpiecsłužby?6
Kamientary