Rasijski pradziusar Maksim Fadziejeŭ: Ja vielmi škaduju ab adnoj historyi z 2020-ha
Viadomy rasijski pradziusar, kampazitar i śpiavak Maksim Fadziejeŭ u žniŭni 2020 hoda, kali vyjavilisia złačynstvy łukašenkaŭskaha režymu, napisaŭ u instahramie, što nie moža maŭčać, bo žorstkaść i miarzotnaść, ź jakoj dziejničaje Łukašenka, nie paddajecca nijakamu analizu. «Palicyja, jakaja łamaje svaim ludziam kości, bjuć žančyn, dziaciej bieź źbiantežanaści. Ja ŭ šoku ad ubačanaha», — napisaŭ tady Fadziejeŭ. Jon vykazaŭ padtrymku hramadzianam Biełarusi, zaklikaŭ ich trymacca i zajaviŭ, što ŭsim sercam ź imi. Ale prajšło krychu bolš za dva hady, i ciapier užo zachapleńnie i spačuvańnie ŭ Fadziejeva vyklikajuć nie achviary, a ich katy.
Dniami Fadziejeŭ naviedaŭ Minsk i paśla pajezdki napisaŭ post u tym ža instahramie, dzie rassypaŭsia dyfirambami pierad tym samym Łukašenkam, jakoha tak klajmiŭ u 2020-m. Prytym arhumientacyja nie skazać kab aryhinalnaja, pradziusar apieluje da dobra «pranaftalinienaha» vobraza «baćki-zachavalnika», jaki ŭ amal niaźmiennym vyhladzie ekspłuatujuć užo chutka jak 30 hadoŭ:
«Hulajučy pa vulicach, zachodziačy ŭ vašy kramy i maleńkija kaviarni, ja ździviŭsia tamu, što Baćku ŭdałosia zachavać absalutna ŭsio, što było honaram savieckaha času — i lohkuju pramysłovaść, i sielskuju haspadarku, zavody. U nas u Rasii, na žal, mnohaje źbierahčy nie ŭdałosia. Mnohaje razburana, mnohaje razrabavana».
Načysta zabycca pra toje, što pisaŭ raniej, treba dumać, Fadziejeva prymusiła adčuvańnie prablem, ź jakimi sutyknułasia «słavianskaje adzinstva», i maralnyja aryjenciry pierad impieryjalizmam adstupajuć:
«Ja ščaślivy, što ŭ vypadku z Rasijaj i Biełaruśsiu ŭziaŭ vierch zdarovy sens i hienietyčnaja pamiać: histaryčna my ŭsie — adnoj kryvi. Dziakuj Bohu, što našy krainy siońnia — heta dźvie siastry i adzin kułak».
A što toj post 2020 hoda? Tłumačeńnie-samaapraŭdańnie tut taksama banalnaje: maŭlaŭ, mianie padstavili niadobrazyčliŭcy.
«U suviazi z hetym ja vielmi škaduju ab adnoj historyi z 2020-ha. U toj niespakojny dla Biełarusi hod u nas u ofisie na pasadzie kantent-mieniedžara pracavaŭ chłopiec ź Biełarusi. Majučy dostup da maich akaŭntaŭ, jon samavolna apublikavaŭ post, jaki nijak nie adlustroŭvaŭ maju pazicyju pa situacyi ŭ Biełarusi. Na žal, ja daviedaŭsia pra heta sa zvankoŭ ŚMI, jakija na mianie raptam pasypalisia».
Dva hady Fadziejeŭ heta trymaŭ u sabie i dzielicca hetaj historyjaj, jak śćviardžaje, upieršyniu. A supracoŭnik, «viadoma ž, biasśledna emihravaŭ u Polšču, pakinuŭšy mianie z kiepskim paślasmakam».
Naprykancy Fadziejeŭ paviedamlaje pra svoj namier adkryć u Biełarusi škołu vakału i rassypajecca ŭ kamplimientach biełarusam i navat biełaruskaj movie. Abiacajučy ciapier časta našu krainu naviedvać.
Kamientary