«Ničoha nie natchniaje, ničoha nie viadzie napierad». Stali viadomyja vyniki zamoŭlenaha Kramlom sacapytańnia ŭ rasijskich rehijonach
U pačatku listapada adrazu ŭ niekalkich rehijonach Rasii (u tym liku na Dalokim Uschodzie i ŭ Centralnaj fiederalnaj akruzie) na zamovu Administracyi prezidenta Rasii praviali zakrytyja fokus-hrupy pra staŭleńnie miascovych žycharoŭ da vajny. Pra heta «Mieduzie» raspaviali dźvie krynicy, blizkija da Kramla i znajomyja z vynikami daśledavańnia.
Pa słovach krynic, danyja fokus-hrup vyrazna śviedčać ab tym, što rasijanie ŭžo «nie adčuvajuć aptymizmu z nahody svajoj budučyni i budučyni krainy».
«Heta nie sychod u apazicyju abo poŭnaje nieprymańnie «śpiecyjalnaj vajennaj apieracyi». Heta abyjakavaść i apatyja. Ničoha nie natchniaje, ničoha nie viadzie napierad. Tolki adčapiciesia ad nas, nie leźcie da nas», — patłumačyŭ adzin z surazmoŭcaŭ.
Jon padkreśliŭ, što hetyja nastroi, pa dumku zamoŭcaŭ sacapytańniaŭ, nie źviazanyja z paśpiachovym kontrnastupleńniem ukrainskich vojskaŭ i adstupleńniem armii Rasii z Chiersona.
U Kramli ličać, što rasijanie «stamilisia ad vajny ŭ pryncypie».
Taksama surazmoŭcy «Mieduzy», blizkija da Kramla i znajomyja z vynikami fokus-hrupaŭ, adznačyli, što rasijanie ŭsio čaściej zadajucca pytańniami ab pryčynach vajny (niahledziačy na aktyŭnuju pracu prapahandystaŭ): «Z čym źviazanyja ciažkaści, čamu jany adbyvajucca?»
Razam z tym vyniki zakrytych daśledavańniaŭ Kramla ŭskosna paćviardžajucca vynikami adkrytych kolkasnych apytańniaŭ, praviedzienych u pačatku listapada niezaležnaj sacyjałahičnaj kampanijaj Russian Field u Maskvie. Pa hetych źviestkach, tolki 19% respandentaŭ čakajuć, što ŭ najbližejšaj budučyni ich žyćcio palepšaje; 29% apytanych miarkujuć, što ich žyćcio pahoršaje; jašče 36% ličać, što ich žyćcio nie źmienicca. Taksama 57% apytanych pryznalisia, što naviny pra vajnu vyklikajuć u ich stomlenaść (u kancy lipienia pra takuju stomlenaść kazali tolki 41% respandentaŭ).
Akramia taho, padčas zakrytych fokus-hrup u rasijan pytalisia pra «hałoŭnyja bolevyja kropki», źviazanyja z vajnoj. Zhodna z vynikami, heta mabilizacyja, ekanamičnyja ciažkaści z-za sankcyj i, što adnosna niečakana, błakavańnie instahrama.
U Kramli, adnak, nie ličać, što ŭ najbližejšaj budučyni ŭ Rasii pačnucca maštabnyja antyvajennyja pratesty, śćviardžajuć krynicy «Mieduzy». «Ludzi da ŭsiaho pryvykajuć», — dadaŭ adzin z surazmoŭcaŭ, blizkich da Administracyi prezidenta RF.
Krynicy «Mieduzy», zrešty, nie vyklučajuć, što situacyja moža źmianicca, kali rasijskija ŭłady abvieściać pra novy, jašče bolš maštabny etap mabilizacyi.
Ciapier čytajuć
Mabilny Anžaliki Mielnikavaj z 19 sakavika znachodzicca na terytoryi Biełarusi28
Kamientary
čamu niečakana? instahram dla karystalnikaŭ addušyna była. mahčymaść na inšych pahladzieć i siabie prajavić.
nie chlebam ža adnym... a tut i chleba stała mienš, i začyniłasia čarhovaje adno vakno ŭ ciopły śviet