U Biełaruś ekstradavali kilera bandy Marozava. Ciapier jaho rasstralajuć? A voś i nie
27 sakavika stała viadoma, što ŭ Biełaruś ekstradavali Viktara Reckaha — pavodle MUS, jon byŭ štatnym kileram bandy Marozava. Što ciapier moža čakać mužčynu? «Naša Niva» zapytałasia pra heta ŭ viadomaj biełaruskaj jurystki, jakaja ananimna prakamientavała situacyju.
MUS paviedamlaje, što Recki byŭ u bandzie z 1992 hoda. Jon adkazny za niekalki zabojstvaŭ i inšych ciažkich i asabliva ciažkich złačynstvaŭ. U 2005-m mužčynu abviaścili ŭ miždziaržaŭny vyšuk, a potym i ŭ mižnarodny vyšuk pa linii Interpała. U hety čas Recki žyŭ pa padroblenych dakumientach u Rasii i Kazachstanie, adzin ź jaho pašpartoŭ byŭ na imia Sašy Biełaha — hieroja znakamitaha sieryjała «Bryhada» pra kryminalnyja 90-ja.
Što čakaje Reckaha ŭ Biełarusi? Artykuł 139 Kryminalnaha kodeksu Biełarusi, jaki apisvaje pakarańni za zabojstva, praduhledžvaje i taki prysud, jak rasstreł.
Ale jurystka, ź jakoj my pahutaryli, kaža, što Reckaha nie mohuć rasstralać.
Reč u tym, što i Biełaruś, i Kazachstan, adkul ekstradavali mužčynu, źjaŭlajucca ŭdzielnikami Kišynioŭskaj kanviencyi ab pravavoj dapamozie i pravavych adnosinach pa hramadzianskich, siamiejnych i kryminalnych spravach. Zhodna ź joj, baki, abaviazanyja na ŭmovach kanviencyi vydavać adno adnamu asobaŭ, jakija znachodziacca na ich terytoryi, dla pryciahnieńnia da kryminalnaj adkaznaści abo vykanańnia prysudu.
Ale ž u hetaj kanviencyi jość artykuł 81, jaki datyčyć śmiarotnaha pakarańnia. Pavodle jaho, kali čałavieka vydajuć pa kanviencyi, tam, kudy jaho ekstradujuć, jaho nie mohuć pakarać śmierciu, kali takoje pakarańnie adsutničaje ŭ krainie, jakaja vydaje čałavieka.
U Kazachstanie śmiarotnaje pakarańnie adsutničaje, tamu Recki nie moža być asudžany na rasstreł u Biełarusi. Na kolki ž jaho pasadziać?
Šmat zaležyć ad taho, kali jon ździajśniaŭ zabojstvy. Da 1997 hoda ŭ biełaruskim Kryminalnym kodeksie nie było takoj miery pakarańnia, jak pažyćciovaje źniavoleńnie. Zakon nie maje zvarotnaj siły, i tamu za złačynstvy, ździejśnienyja da taho času, Reckamu nielha pryznačyć pažyćciovaje źniavoleńnie.
Ci moža havorka iści pra 25 hadoŭ? Taksama niezrazumieła. Heta norma źjaviłasia ŭ zakanadaŭstvie jašče paźniej.
Całkam mahčyma, što kiler marozaŭcaŭ atrymaje 15 hadoŭ.
Tak adbyłosia ź jaho «kalehaj» pa bandzie Siarhiejem Dzierbianiovym. Jaho znajšli ŭ 2019-m u rasijskim Uładzivastoku praz 15 hadoŭ pošukaŭ. Dzierbianiovu dali 15 hadoŭ źniavoleńnia — maksimalny mahčymy termin pry jaho abstavinach.
«Naša Niva» — bastyjon biełaruščyny
PADTRYMAĆ
Ciapier čytajuć
Fiodar Viktaravič i «Viktar Fiodaravič». Supracoŭnik «Varhiejminha» maje pašpart prykryćcia. Jaho žonka Volha Siamaška — viadomaja žurnalistka25
Kamientary