«Ciapier płatnaja čarha nie mienšaja za zvyčajnuju». Pieravozčyki raspaviali, jak płaciać tysiačy jeŭra za propuski i sutkami stajać na miažy

Pačynajučy z kanca vosieni minułaha hoda šmatkiłamietrovyja čerhi z hruzavikoŭ na miežach Biełarusi i ES stali zvykłaj źjavaj. Šturškom dla hetaha pasłužyŭ spravakavany biełaruskimi ŭładami mihracyjny kryzis. U vyniku jaho abvastreńnia polski bok vyrašyŭ zakryć punkt propusku «Bruzhi», dzie mihranty sprabavali šturmam prarvacca praź miažu. Zakryćcio punkta, jaki byŭ zdolny prapuskać za sutki da 580 hruzavikoŭ, tolki ŭskładniła situacyju z čerhami. 

U pikavyja dni ŭ zaležnaści ad punkta propusku kiroŭcy vialikahruzaŭ vymušanyja tracić na pierasiačeńnie miažy ź Biełarusi ŭ ES ad 2—3 da 10—12 sutak. Častka pieravozčykaŭ, kab nie marnavać stolki času na prastoi, pačała kuplać propuski, jaki dajuć prava na pazačarhovy ŭjezd na terytoryju aŭtadarožnych punktaŭ propusku praź dziaržaŭnuju miažu.

IP i jurydyčnyja asoby, jakija ažyćciaŭlajuć mižnarodnyja pieravozki, mohuć nabyć propuski terminam ad adnaho miesiaca da adnaho hoda. Miesiačny propusk kaštuje 25 b. v. (800 rubloŭ), propusk na paŭhoda — 100 b. v (3 200 rubloŭ), na hod — 150 b. v. (4 800 rubloŭ). 

Pavialičyć

Nabyć taki propusk mohuć jak biełaruskija, tak i zamiežnyja kampanii dy pradprymalniki. Zaŭvažana, što propusk vydajecca tolki na adzin transpartny srodak, tamu kali pieravozčyk choča, kab pierasiakać miažu biez čarhi mahli ŭsie aŭtamabili kampanii, to apisanuju vyšej sumu treba pamnožyć na ich kolkaść. 

Pieravozčyki, jaki vyrašyli skarystacca takoj pasłuhaj, kažuć, što da niadaŭniaha času takija vydatki na propusk byli apraŭdanymi. 

«Pieršyja miesiacy paśla taho, jak na hranicach pačali źbiracca vielizarnyja čerhi, vydatki na propusk akuplalisia vielmi chutka, bo heta dazvalała našmat chutčej zakryć pieravozku», — pryznajecca pieravozčyk. 

Adnak ź ciaham času situacyja pačała mianiacca, pakolki achvotnych kuplać daražeznyja propuski zamiest taho, kab sutkami stajać u čarzie, bolšała.

«Užo letam pačali źjaŭlacca davoli istotnyja čerhi z tych, chto jedzie pa propusku, ale heta ŭsio adno było značna chutčej, čym stajać u ahulnaj čarzie. Vosieńniu situacyja pahoršyłasia», — tłumačyć surazmoŭca.

Pa jaho słovach, naprykancy listapada ŭ punkcie propusku «Pryvałka» čarha hruzavikoŭ z propuskami raściahnułasia na čatyry kiłamietry, a dniami vyrasła da piaci kiłamietraŭ.

«Ciapier mašyn z propuskami nastolki šmat, što ŭ «płatnaj» čarzie davodzicca stajać pa 2—3 sutak, a ŭ biaspłatnaj — pa 5—6. Ciapier płatnaja čarha pa fakcie nie našmat mienšaja za zvyčajnuju, prosta ruchajecca jana chutčej za košt taho, što našyja pahraničniki zvyčajna zapuskajuć pa try mašyny z płatnaj čarhi i pa adnoj sa zvyčajnaj». 

Kiroŭca kaža, što mnohija aburanyja takoj situcyjaj: ty płaciš tysiačy jeŭra za pazačarhovy prajezd, a ŭ vyniku ŭsio adno sutkami staiš.

Pavialičyć

Inšy surazmoŭca, jaki jeździć pa propusku, taksama adznačaje, što apošnim časam u hetym usio mienš sensu, pakolki «płatnaja» čarha pastajanna raście.

«Adnosna chutka vyjechać ź Biełarusi časam atrymlivajecca tolki praz «Kazłovičy», a na «Pryvałcy» ad propusku tołku ŭsio mienš», — kaža pieravozčyk, jaki ŭ druhoj pałovie leta nabyŭ propuski adrazu na try aŭtamabili, jakija pracujuć na biełaruskim kirunku. 

«Kuplać propuski na hod nie navažyŭsia, choć heta krychu tańniej, bo ŭ biahučych umovach nieviadoma, što budzie praz hod, tamu kuplaŭ ich terminam na 6 miesiacaŭ. Ahułam daviałosia vykłaści na propuski amal 4000 jeŭra (9 600 rubloŭ). Pieršy čas byŭ zadavoleny, ale ciapier vyhladaje, što sensu ŭ takich vydatkach usio mienš, asabliva z ulikam taho, što z nabližeńniem novaha hoda źjaŭlajucca ŭsio novyja pieravozčyki, jakija navažvajucca nabyć propusk. Častka ź ich na sprobu kuplaje propusk terminam na adzin miesiac, kab možna było acanić, ci varta tracić na heta hrošy», — dzielicca surazmoŭca.

Čytajcie taksama: Miljony dalaraŭ štomiesiac. Kolki Biełaruś zarablaje na miažy

• 2
• 0
• 9
• 6
• 3
• 2
• 4
• 0