NYT nazvaŭ dziasiatki pskoŭskich desantnikaŭ, jakija zabivali ŭkraincaŭ u Bučy
Žurnalisty identyfikavali dziasiatki rasijskich vajskoŭcaŭ, jakija zabivali mirnych ludziej u Bučy, havorka idzie pra bajcoŭ 234-ha desantna-šturmavoha pałka.
U ŚMI praanalizavali zapisy telefonnych razmoŭ, dakumienty, intervju i tysiačy hadzin videa, jakija pakazvajuć, jak rasijskaje desantnaje padraździaleńnie zabiła dziasiatki ludziej na vulicy Jabłonskaj u Bučy ŭ sakaviku.
U pryvatnaści, akupanty adbirali mabilnyja telefony ŭ achviar i adrazu telefanavali ŭ Rasiju ci na rasijskija telefonnyja numary.
Pavodle źviestak ŚMI, jość dokazy taho, što ździajśniali źvierstvy ŭ Bučy rasijskija desantniki 234-ha pałka.
Heta vidać, u pryvatnaści, ź simvoliki, jakuju akupanty sprabavali schavać na vajskovaj technicy, pakinutaj u Bučy dakumientacyi i asabistych zapisaŭ rasijan.
Tak, na adnym z papiarovych zapisaŭ pakazany numar vajskovaj čaści pskoŭskich desantnikaŭ — v/č 74268. Taksama paśla siabie akupanty pakinuli narukaŭnyja znaki pałka.
Adznačajecca, što telefony niekatorych achviar na Jabłonskaj akupanty vykarystoŭvali dla asabistych zvankoŭ amal adrazu paśla zabojstva. Akramia taho, techniku hetaha pałka fiksavali ŭ miescach abstrełu achviar.
Uvohule žurnalisty identyfikavali 22 akupantaŭ z 234-ha desantna-šturmavoha pałka.
Žurnalistam taksama ŭdałosia identyfikavać cieły 36 achviar rasijan na vulicy Jabłonskaj u Bučy.
U ŚMI taksama apublikavali kartu vyjaŭlenych ciełaŭ.
Nielha być upeŭnienymi, što mienavita hetyja ludzi zabili tych ci inšych ludziej u Bučy, adnak pra znachodžańnie 234-ha pałka va Ukrainie śviedčać i inšyja danyja.
U pryvatnaści, pierad uvarvańniem rasijski pałkoŭnik hetaha pałka Arciom Haradziłaŭ byŭ u Biełarusi siarod rasijskich vajskoŭcaŭ. Padobnaha da Haradziłava kamandzira taksama fiksavali ŭ Bučy. Jon z dvuma achoŭnikami chadziŭ pa vulicach horada kala cieł mirnych ukraincaŭ.
Paśla deakupacyi Kijeŭščyny, kali źvierstvy akupantaŭ u Bučy stali vidavočnymi, 8 krasavika Haradziłava i inšych rasijskich harłarezaŭ uznaharodzili ordenami «Mužnaści».
234-ty połk uvachodzić u skład 76-j hvardziejskaj desantna-šturmavoj dyvizii, jakuju Ofis hienprakurora padazraje ŭ źvierstvach u Bučy.
U listapadzie infarmacyjnaje ahienctva Associated Press apublikavała rasśledavańnie pra toje, jak rasijskija vojski ŭ pačatku sakavika ździajśniali masavyja zabojstvy ŭ Bučy pad Kijevam.
Ofis hienprakurora Ukrainy padazraje ŭ vajennych złačynstvach u Bučy vajskoŭcaŭ 76-j hvardziejskaj desantna-šturmavoj dyvizii, jakoj kamandavaŭ hienierał-major Siarhiej Čubarykin. Jaho vyšejšy načalnik — hienierał-pałkoŭnik Alaksandr Čajko — kamanduje vojskami Uschodniaj vajskovaj akruhi RF.
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»5
Kamientary