Pieršy zavočny prysud u Biełarusi — Hierasimieni i Apiejkinu prysudzili pa 12 hadoŭ pazbaŭleńnia voli
Sami abvinavačanyja na sudzie nie prysutničali, jany za miažoj. Kab sudzić praciŭnikaŭ, jakija znachodziacca za miažoj, łukašysty śpiecyjalna źmianili zakanadaŭstva.
Alaksandry Hierasimieni — 12 hadoŭ kałonii ahulnaha režymu, Alaksandru Apiejkinu — 12 hadoŭ pazbaŭleńnia voli ŭzmocnienaha režymu.
U Hierasimieni aryštavanyja taksama hrošy na rachunkach — bolš za 48 tysiač dalaraŭ, mašyna Land Rover, mabilnyja telefony iPhone i «Samsunh», kvatera, mašynamiesca, chaładzilnik, akustyčnaja sistema.
Usio heta pajšło ŭ košt pahašeńnia hramadzianskaha pazovu.
Heta pieršy prysud u Biełarusi pa kryminalnaj spravie, jakaja rasśledavałasia ŭ ramkach tak zvanaj śpiecvytvorčaści.
Hierasimieni i Apiejkinu byli inkryminavanyja zakliki da mier abmiežavalnaha charaktaru (sankcyj), inšych dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś.
Bok abvinavačvańnia paličyŭ, što «nieadnarazovyja zakliki da mižnarodnych arhanizacyj z boku fihurantaŭ pryviali da admieny niekatorych spartyŭnych mierapryjemstvaŭ na terytoryi Biełarusi». Taksama była naniesienaja «škoda nacyjanalnaj biaśpiecy Biełarusi ŭ palityčnaj i sacyjalnaj śfierach».
U pryvatnaści, byŭ admienieny čempijanat Jeŭropy pa rovarnym sporcie na treku. Biełaruskaj fiederacyi viełasipiednaha sportu naniesieny materyjalny ŭron na sumu 86,6 tys. rubloŭ. Taksama byli admienienyja čempijanat śvietu pa chakiei z šajbaj 2021 hoda, čempijanat śvietu pa sučasnym piaciborji 2021 hoda.
Usiaho im naličyli škodu ŭ 853,5 tys. rubloŭ.
Zhodna z materyjałami spravy, abvinavačanyja ŭ žniŭni 2020 hoda stvaryli nie zarehistravanaje va ŭstanoŭlenym paradku na terytoryi Respubliki Biełaruś abjadnańnie «Biełaruski fond spartyŭnaj salidarnaści». Praź jaho z dapamohaj ŚMI i internetu «raspaŭsiudžvalisia zahadzia łžyvyja źviestki i vydumki pra padziei, jakija mieli miesca na terytoryi Respubliki Biełaruś pierad i paśla vybaraŭ prezidenta».
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im1
Kamientary