Andrej Stryžak: Meta pieraśledu za danaty — źniščeńnie biełaruskaj salidarnaści

Andrej Stryžak usim tym, chto danaciŭ na BYSOL u 2020—2022 hadach, prapanuje vyznačyć, u jakoj zonie jany znachodziacca: u zonie biaśpieki ci ŭ zonie ryzyki. I dla kožnaha vypadku prapanuje kankretnyja kryteryi.

U zonie biaśpieki, pavodle jaho, znachodziacca tyja, chto:

• danaciŭ z karty zamiežnaha banka (za vyklučeńniem rasijskich);
  
  
• danaciŭ praz sajt BYSOL z karty zamiežnaha banka (za vyklučeńniem rasijskich) ci praz Paypal.

Tym nie mienš, navat takim ludziam, kali jany znachodziacca za miažoj, Stryžak usio adno nie rekamienduje naviedvać najbližejšym časam Biełaruś.

U toj ža čas u zonie ryzyki apynajucca tyja, chto:

• danaciŭ z karty biełaruskaha banka praz Facebook. Praŭda, u takim vypadku siłaviki bačać tolki sam fakt danata na niešta, u vypiscy z banka danat vyhladaje jak Facebook London — Fundraising. Adnak heta ratavała b tolki tady, kab usio rabiłasia ŭ adpaviednaści z zakonam i siłaviki vymušanyja byli b źbirać realnyja dokazy, a praktyka śviedčyć pra zusim inšaje;
  
  
• danaciŭ praz sajt BYSOL z karty biełaruskaha banka da ŭviadzieńnia sankcyj i błakavańnia takoj mahčymaści. U zonie ryzyki taksama płaciažy z kartaŭ rasijskich bankaŭ.

Mety raspačataj ciapier režymam kampanii, na dumku Stryžaka, nastupnyja: 

• pasiejać niedavier da biaśpieki publičnych zboraŭ;
  
  
• stvaryć iluziju źlivaŭ/uzłomaŭ/ułasnaj usiomahutnaści;
  
  
• źniščyć našu salidarnaść, jakuju ŭłada ŭsprymaje jak pahrozu.

Tym, chto znachodzicca ŭ zonie ryzyki, Stryžak rekamienduje pakinuć Biełaruś. Kansultacyi, jak heta možna zrabić, i mahčymaść vizavaj padtrymki ŭ vypadku pieraśledu dastupnyja praz haračuju liniju ŭ telehramie @help_bysol.

Što tyčycca zachadaŭ, jakija robiacca ciapier niepasredna fondam, to, pavodle Stryžaka, ciapier:

• viaducca pieramovy ab vydaleńni/utojvańni staronak zboru srodkaŭ, jakija zapuskalisia fondam u 2020—2021 hadach, kab zaścierahčy donaraŭ praz Facebook. Na hety momant opcyja vydaleńnia staronak zboru srodkaŭ niedastupnaja.
• danaty treba rabić biaśpiečnymi sposabami:

— z kartaŭ zamiežnych bankaŭ praz sajt BYSOL;

— praz Paypal (za vyklučeńniem kartaŭ biełaruskich bankaŭ);

— z kartaŭ zamiežnych bankaŭ praz Facebook (z adklučeńniem opcyi adlustravańnia danata na ŭłasnaj staroncy).

Pry hetym Andrej Stryžak zapeŭniŭ, što, niahledziačy na ŭsie ataki i sproby źniščyć biełaruskuju salidarnaść, jahonaja kamanda praciahvaje svaju pracu i pastajanna ŭdaskanalvajecca.

Kožny ŭdar uładaŭ staranna analizujecca, kožny incydent kładziecca ŭ asnovu rasśledavańnia i pa kožnaj niaštatnaj situacyi pravodzicca pravierka, niedachopy i vuzkija miescy sistemy likvidujucca.

Čytajcie taksama:

Krynicy: Jančeŭski prydumaŭ, kab prahramistaŭ za danaty 2020-ha nie sadzili, ale ździrali kampiensacyju ŭ dziesiacirazovym pamiery

Dev.by: U IT-kampanii prysłali śpisy supracoŭnikaŭ, jakija danacili ŭ fondy

• 7
• 5
• 2
• 2
• 17