Biełaruś naviedaŭ kiraŭnik supolnaści salezijanaŭ

Z 31 lipienia pa 1 žniŭnia 2006 h. u Biełarusi ź vizitam znachodziŭsia hienieralny nastajaciel tavarystva śviatoha Franciška Salskaha (supolnaści salezijanaŭ) don Paskual Čaves Viljanueva. U aeraporcie biełaruskaj stalicy vysokaha hościa sustrakali śviatary i moładź ź minskaj parafii sv. Jana Chryściciela ŭ Sierabrancy, dzie pastyrskaje słužeńnie niasuć ajcy salezijanie.

Dona Paskuala pryvitali tradycyjnymi chlebam-sollu i pieśniami ŭ vykanańni moładzi. Adna z parafijanak źviarnułasia da hienieralnaha nastajaciela - mieksikanca pa pachodžańni - z pryvitalnym słovam na jaho rodnaj ispanskaj movie.

Paśla viačery hienieralny nastajaciel skiravaŭsia ŭ centr moładzi ŭ Sierabrancy. Tam jaho čakali junaki i dziaŭčaty ź Minska i Smarhoni, dzie taksama pracujuć ajcy salezijanie. Padčas hetaj sustrečy, u jakoj brali ŭdzieł i pradstaŭniki starejšaha pakaleńnia, demanstravalisia słajdy, što apaviadali pra žyćcio i dziejnaść salezijanskich supolnaściaŭ u Biełarusi. Hučali śpievy ŭ vykanańni minskaha hurta "Niebaschił" z parafii sv. Jana Chryściciela i smarhonskaha hurta "Uśmieška". Svaje śpiavackija zdolnaści pakazali taksama minskija salezijanie a. Ihar i a. Alaksandr, jakija vykanali svojeasablivy bonus track: eŭcharystyčny himn Panis Angelicus. Paśla hetaha smarhonskaja moładź pakazała viasiołuju scenku pa matyvach biełaruskaj narodnaj pieśni "Kasiŭ Jaś kaniušynu", a moładź ź Minska zaviaršyła sustreču teatralnaju pastanoŭkaju pra žoŭty parason, asnoŭnaju dumkaju jakoj było toje, što ŭ žyćci treba zaŭsiody być radasnym i nieści hetuju radaść inšym ludziam. Paśla scenki ajcu Paskualu byŭ padaravany žoŭty parason z vyjavaju śviatoha dona Bosko. Hienieralny nastajaciel padzialiŭsia svaimi ŭražańniami i dumkami, što ŭźnikli ŭ jaho padčas sustrečy, i paśla supolnaj malitvy ŭdzialiŭ usim prysutnym błahasłaŭleńnie.

Paśla ranišniaj malitvy don Paskual Čaves Viljanueva sustreŭsia z Apostalskim administrataram Minska-Mahiloŭskaj archidyjacezii biskupam Antonijem Dziamjankam. Potym adbyłasia sustreča z salezijanami, jakija pracujuć u Biełarusi. Usie jany śpiecyjalna prybyli ŭ Minsk, kab mieć mahčymaść ubačycca sa svaim hienieralnym nastajacielem. Na hetaj sustrečy don Paskual asabliva padkreśliŭ, što prykład salezijanina, jaki jon pavinien davać svaim štodzionnym žyćciom, dapamahaje moładzi paznać Chrysta i adkryć svajo paklikańnie ŭ žyćci, jak vučyŭ hetamu zasnavalnik supolnaści śviaty don Bosko.

Paśla sustrečy adbyłasia vatyŭnaja śviataja Imša ŭ honar sv. Jana Bosko, jakuju celebravaŭ don Paskual Čaves Viljanueva u kaściole sv. Jana Chryściciela ŭ Sierabrancy. Pierad Imšoju hienieralny nastajaciel daŭ nievialikaje intervju dla staličnaha telebačańnia. Celebracyju Eŭcharystyi ŭpryhožvali śpievy ŭ vykanańni moładzi. U svajoj hamilii hienieralny nastajaciel nahadaŭ usim prysutnym słovy śviatoha Jana Bosko pra try božyja dary, jakimi źjaŭlajucca žyćcio, vychavańnie i viera, i pra toj hłybinny źmiest, jaki jany dla nas majuć. Na zakančeńnie śviatoj Imšy parafijanie źviarnulisia da dona Paskuala sa słovami pryvitańnia i padziaki, a taksama zaprasili jaho znoŭ pryjechać u Minsk dla aśviačeńnia niadaŭna zakładzienaha kaścioła sv. Jana Bosko. Darečy, u dzień pryjezdu hienieralnaha nastajaciela dazvoł na pabudovu hetaha kaścioła byŭ kančatkova uzhodnieny.

Paśla ŭračystaha abiedu z udziełam salezijanskaj siamji hienieralny nastajaciel pravioŭ sustreču z salezijanami sa Smarhoni. Viečaram 1 žniŭnia śviatary i moładź raźvitalisia z donam Paskualem u aeraporcie. Na raźvitańnie hienieralny nastajaciel vykazaŭ svaju vialikuju radaść ad taho, što sustreŭ u Biełarusi stolki ščyrych, adkrytych sercaŭ, i skazaŭ, što tut jon pakidaje častku svajho serca.

• 0
• 0
• 0
• 0
• 0
• 0
• 0
• 0