«Asoba, amal identyčnaja naturalnaj». Hirkin namiaknuŭ, što siońnia zamiest Pucina vystupaŭ dvajnik
Były «ministr abarony DNR» Ihar Hirkin (Strałkoŭ), a ciapier papularny ŭ Rasii błohier, jaki amal ad samaha pačatku praviadzieńnia pucinskaj «śpiecapieracyi» źjaŭlajecca surovym krytykam nie jaje samoj, a taho, jak jana robicca, apošnim časam dapuskaje vielmi vostryja vykazvańni ŭ tym liku i ŭ adras samoha Pucina. Vielmi dziorzka jon vykazaŭsia i siońnia, kamientujučy vystupleńnie rasijskaha lidara padčas naviedvańnia im Abuchaŭskaha zavoda ŭ Sankt-Pieciarburhu, zasumniavaŭšysia navat u realnaści asoby śpikiera.
Hirkin nie padzialaje pakaznoha aptymizmu Pucina, kali toj skazaŭ, što praca «abaronnych» pradpryjemstvaŭ daje padstavy mieć upeŭnienaść u rasijskaj pieramozie ŭ vajnie. Jon ličyć, što sama pa sabie kolkaść uzbrajeńniaŭ ničoha nie vyrašaje:
«Z rakietami SPA vajny jašče nichto nie vyjhravaŭ…, a rakiety «Chajmars» źbivać našymi rakietami nie vielmi atrymlivajecca (tak jak kolkaść rakiet — heta jašče nie ŭsio, treba jašče dastatkovaja kolkaść kompleksaŭ i dyvizijonaŭ, RŁS, navučanaha asabovaha składu, vojskaŭ SPA i jašče mnohaje inšaje)».
A paśla taho dziorzka padkreśliŭ svajo rasčaravańnie mienavita ŭ Pucinie i navat namiaknuŭ, što zamiest jaho vystupaŭ dvajnik:
«Ja ničoha i nie čakaŭ ad hetaha šyroka razrekłamavanaha vystupleńnia (asoby, amal identyčnaj naturalnaj). Tamu i nie rasčaravany. Zvyčajnaje bła-bła-bła ni pra što».
Kamientary