Turcyja — ad 3100 rubloŭ na dvaich, jość tury i ŭ Katar. Što prapanujuć turahienctvy pa rańnim braniravańni?
Samymi papularnymi zastajucca kirunki, jakija nie patrabujuć šenhienu i majuć pramyja aviaznosiny z Minskam. Turcyja, Jehipiet, Hruzija — mast chev. Adnak nie tolki imi abmiažoŭvajecca tursiezon.
Turcyja zastajecca samaj dastupnaj
Pajezdki pa sistemie «ŭsio ŭklučana» pačynajucca ad 3100 na dvaich čałaviek. Takaja cana — za 7 načej u trochzorkavym hateli na druhoj bierahavoj linii ŭ Kiemiery. Umova — lacieć u traŭni, bo čym bližej da piku siezona, tym daražejšymi buduć tury: naprykład, takija ž umovy ŭ červieni abyducca na 300 — 500 rubloŭ daražej.
Kali chočacca adpačyvać bližej da mora, to treba budzie zapłacić jak minimum 3200 za dvaich — heta startavaja cana tydnia adpačynku ŭ krasaviku za pieršuju bierahavuju liniju ŭ troch— abo čatyrochzorkavym hateli. Pucioŭki z anałahičnymi ŭmovami ŭ červieni buduć kaštavać na 400+ rubloŭ bolš.
Jehipiet — lidar pa roście cen na praciahu siezona
Tury ŭ hetuju krainu vyhadniej brać na 10 načej, čym na 7. Samyja tannyja daty, viadoma, da razharu siezona. Naprykład, na pačatku krasavika samaja tannaja pucioŭka ŭ Šarm-El-Šejch na dvaich abydziecca ŭ 3300 rubloŭ, tady jak taki ž varyjant u červieni padaražeje da 3780. Ale ž heta nie blizki da mora hatel na try zorki, što dla Jehipta davoli ryzykoŭna.
Aptymalny varyjant (pieršaja bierahavaja linija i piać zorak u Churhadzie) u krasaviku budzie kaštavać troški bolš za 3700 rubloŭ za dvaich, ale ž u pieršym miesiacy leta takaja ž pucioŭka vyraście ŭ canie na 600 rubloŭ.
Hruzija — tannaja, ale biez charčavańnia
Kali nieabchodnaje ciopłaje mora, to lacieć u Sakartvieła treba jak minimum u druhoj pałovie červienia. Tydniovyja tury na pačatku siezona kaštujuć ad 1300 dalaraŭ na dvaich. Hatel na try zorki ŭ Batumi, ale biez peŭnaha vidu z akna i biez charčavańnia.
Ź lipienia pa vierasień takoha ž typu pucioŭki padaražejuć na 113 dalaraŭ, ale ž buduć tańniejšyja varyjanty ŭ blizkim da Batumi kurorcie Kabuleci (ad 1330 dalaraŭ na dvaich).
Kali brać uzrovień vyšej, to z 15 červienia pa lipień cana za numar u čatyrochzorkavym hateli pobač z moram i sa śniadankami (u Hruzii sistema «ŭsio ŭklučana» nie nadta papularnaja) budzie kaštavać ad 1500 dalaraŭ na dvaich u Batumi i ad 1400 ŭ Kabuleci.
A ŭžo ŭ lipieni — pačatku vieraśnia ceny na takija tury padymucca da 1570 dalaraŭ i vyšej.
AAE — pakul samy darahi pramy kirunak
U krasaviku ceny na tury ŭ Emiraty na dvaich darosłych pačynajucca ad 4 tysiač rubloŭ. Dubaj, 8 načej u standartnym numary, hatel na 4 zorki. Cana biez charčavańnia.
Padobny varyjant na krasavik z «usio ŭklučana» — ad 5100 rubloŭ na dźvie asoby, ale ž u Šardžy i z pražyvańniem u trochzorkavym hateli.
U razhar turystyčnaha siezona (chacia Emiraty dazvalajuć pravieści adpačynak na mory ŭ lubuju paru hoda) ceńniki buduć kusacca: užo na pačatku traŭnia samaja tannaja pucioŭka na dvaich u kambinavany tur Dubaj — Šardža — 5200 na dvaich. Heta taksama 8 načej, taksama trochzorkavyja hateli i biez charčavańnia.
Na paru socień rubloŭ budzie tańniej adpačyć 7 načej zamiest 8. Što cikava, biełaruskija turfirmy pakul nie pradajuć AAE na leta, ale ž pradkazalna pucioŭki buduć nie tańniejšymi.
Novaja mahčymaść — Katar
Z sakavika čartarnyja rejsy buduć latać ź Minska ŭ Dochu, niekatoryja turahienctvy ŭžo aktyŭna pradajuć tury ŭ niazvykłaje dla biełarusaŭ miesca. Pakolki čartary buduć latać raz na tydzień, samym papularnym budzie adpačynak na 7 načej.
Samyja tannyja pucioŭki, viadoma, u sakaviku — za dvaich čałaviek treba addać bolš za 4500 rubloŭ, uklučany pieralot, pražyvańnie ŭ trochzorkavym hateli sa śniadankami.
U traŭni anałahičnaja pajezdka budzie ŭžo na 500-600 rubloŭ daražejšaja.
Čartarnaja prahrama Minsk — Docha pakul zapłanavanaja da 3 červienia — chutčej za ŭsio, jana budzie praciahnutaja. Za viasnu płanujecca ździejśnić 14 rejsaŭ pa subotach.
Čarnahoryja, Hrecyja dy Italija
Niekatoryja biełaruskija turahienctvy dahetul prapanujuć krainy Siarodziemnamorja, ale z vyletam z Varšavy i Vilni. Ceńniki na siezon vakacyj — prykładna takija ž, jak i na «pramyja» Jehipiet i Turcyju.
Tydniovaja pajezdka ŭ červieni ŭ Hrecyju kaštuje ad 3800 rubloŭ za dvaich. Vylet ź Vilni ŭ kurortny haradok Bienices na poŭdni vostrava Korfu, pražyvańnie ŭ trochzorkavym hateli pobač ź plažam, śniadanki ŭklučanyja. Heta minimum.
Siaredni ž adpačynak u pieršym miesiacy leta budzie kaštavać 5-6 tysiač rubloŭ na dvaich. Heta kali patrebny vid z numara na mora, śniadanki i viačery, a taksama pavyšany kamfort apartamientaŭ.
Ceny na italjanski adpačynak pačynajucca ad 3840 rubloŭ na 7 načej za dvaich, vylet z Varšavy. Try zorki ŭ Sicylii, numar z bałkonam i vidam na mora, ale biez charčavańnia (sa śniadankami cana padymiecca da 4044 rubloŭ). Takija pucioŭki aktualnyja na červień, u lipieni jany padaražejuć prykładna na 300 rubloŭ.
3081 rubiel — taki minimalny prajs na tydniovy adpačynak u Budvie ŭ červieni. Cana dla dvaich čałaviek, vylet taksama z Varšavy. Čatyry zorki, treciaja bierahavaja linija, charčavańnie nie ŭklučanaje. U lipieni tur u Čarnahoryju z takimi ž umovami budzie na 600 rubloŭ daražejšym.
«Naša Niva» — bastyjon biełaruščyny
PADTRYMAĆ
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary