Užyvańnie niezvyčajnaj marskoj istoty moža źmianić praces stareńnia
Vyniki novaha daśledvańnia na myšach pakazali, što ŭžyvańnie praduktaŭ z płazmałahienami mohuć zapavolvać pracesy stareńnia kletak i raźvićcia šmatlikich uzrostavych zachvorvańniaŭ.
Zhodna ź niadaŭnim daśledavańniem, praviedzienym u Kitai, u myšej, jakich karmili ekstraktami istoty z nazvaj «marski špryc», źnikali niekatoryja prykmiety stareńnia. Marskija šprycy (ci ascydyi) adnosiacca da tunikataŭ — padtypu marskich bieschrybietnych žyviolin, roznyja vidy jakich užyvajucca ŭ ježu ŭ roznych krainach pa ŭsim śviecie. Marskija šprycy atrymali svaju nazvu tamu, što jany, jak praviła, pyrskajuć vadoj, kali ich vyryvajuć ź ich salonaha doma.
Ekstrakty z marskoha špryca, jakimi karmili myšej, nazyvajucca płazmałahienami — heta typ lipidaŭ (tłuščoŭ), jaki źmiaščajecca ŭ miembranach kletak orhanaŭ čałavieka, takich jak mozh, nyrki, myšcy i lohkija. Jany vykonvajuć mnostva funkcyj, uklučajučy rehulavańnie abmienu infarmacyjaj pamiž kletkami, abaronu kletak ad paškodžańnia DNK i pamianšeńnie zapaleńnia.
Minułyja daśledavańni pakazali, što kolkaść płazmałahienaŭ u kryvi źmianšajecca z uzrostam i asabliva ŭ ludziej z chvarobaj Alchiejmiera — najbolš raspaŭsiudžanaj formaj uzrostavaj demiencyi.
Dyk što tam z płazmałahienami?
Značnaja kolkaść płazmałahienaŭ utrymlivajecca ŭ kurycy, śvininie, midyjach, hrabieńčykach i, viadoma ž, marskich šprycach, jakich jaduć u Karei i Japonii.
U svaim apošnim daśledavańni navukoŭcy davali płazmałahieny samkam myšej siaredniaha ŭzrostu ŭ značna bolš vysokich kancentracyjach (prykładna ŭ 300-500 razoŭ vyšej), čym zvyčajna ŭ porcyi, naprykład, kurycy abo hrabieńčykaŭ. Zatym jany acanili pamiać myšej i niekatoryja važnyja paramietry, jakija źmianiajucca ŭ mozhu z uzrostam, uklučajučy kolkaść niervovych stvałavych kletak, jakija stvarajuć novyja niejrony, a taksama kolkaść suviaziaŭ pamiž hetymi niejronami. Hetyja pakazčyki asabliva važnyja dla padtrymańnia zdolnaści vučycca, zapaminać i razvažać.
Vyjaviłasia, što ŭsie zhadanyja paramietry palepšylisia ŭ myšej, jakija ŭžyvali płazmałahieny ciaham dvuch miesiacaŭ. Akramia taho, u hetaj hrupy značna źmienšyłasia raźvićcio zapalenčych pracesaŭ u paraŭnańni z myšami z kantrolnaj hrupy na zvyčajnaj dyjecie. Zapaleńnie ŭzmacniajecca z uzrostam i ličycca važnaj pryčynaj paharšeńnia simptomaŭ chvaroby Alchiejmiera.
Daśledčyki taksama pakazali, što ŭ myšej palepšyłasia pamiać. Kab zrabić heta, jany źviarnulisia da testa, jaki patrabuje ad testujemych vykarystańnia sensarnych navykaŭ, u tym liku dobraha zroku.
Uličvajučy, što myšy z uzrostam, jak praviła, ciarpiać ad straty sensarnych navykaŭ (naprykład, ad ślepaty i straty słychu), tamu da hetych znachodak navukoŭcy prapanujuć stavicca aściarožna. Tamu što ŭjaŭnaje palapšeńnie pamiaci nasamreč moža być vynikam palapšeńnia tolki sensarnych navykaŭ, a nie samoj pamiaci.
Adnak isnuje taksama i bolš rańniaje daśledavańnie, padčas jakoha ludziej ź lohkimi kahnityŭnymi parušeńniami karmili płazmałahienami (na hety raz z hrabieńčykaŭ) dvojčy na dzień ciaham 24 tydniaŭ. Udzielniki pakazali palapšeńnie pamiaci, što, adnak, nazirałasia tolki ŭ padhrupie pacyjentaŭ žanočaha połu va ŭzroście da 77 hadoŭ. Pryčyna, pa jakoj heta spracavała tolki dla hetaj padhrupy, niezrazumiełaja i patrabuje dalejšaha vyvučeńnia z bolšaj hrupaj udzielnikaŭ.
Hierapratektary: preparaty, jakija zapavolvajuć stareńnie kletak
Navukoŭcy kažuć, što nieabchodnaja dadatkovaja praca. Važna vyśvietlić, jak płazmałahieny zatrymlivajuć stareńnie i ci vychodziać ich efiekty za miežy mozhu, uklučajučy inšyja važnyja orhany: naprykład, serca, myšcy i imunnuju sistemu.
Na siońniašni dzień jość danyja pra bolš jak 200 užo vyprabavanych na žyviołach hierapratektaraŭ. U mnohich daśledavańniach daśledčyki pakazali, što hierapratektary mohuć palepšyć pracu žyćciova važnych orhanaŭ. Było taksama pakazana, što niekatoryja ź ich zatrymlivajuć pačatak i ciažkaść uzrostavych chraničnych zachvorvańniaŭ, takich jak asteaartoz, chvaroby serca, asteaparoz i chvaroba Alchiejmiera ŭ łabaratornych žyvioł.
Nastupnym krokam źjaŭlajecca testavańnie hetych lekaŭ na ludziach, ale heta składana z-za sposabu testavańnia i dazvołu na vykarystańnie lekaŭ. Zvyčajna heta adbyvajecca ŭ ludziej z peŭnym zachvorvańniem i paśla taho, jak chvaroba była dyjahnastavanaja. Adnak hetyja preparaty, chutčej za ŭsio, daduć najlepšyja vyniki, kali ich prymać mienavita z metaj praduchileńnia ŭzrostavych chvarob.
Kab pravieryć ich, daśledčyki pavinny vyznačyć, chto znachodzicca ŭ hrupie ryzyki raźvićcia taho ci inšaha ŭzrostavaha zachvorvańnia, a zatym pravieści doŭhaje i darahoje vyprabavańnie. Ale navat kali hetyja daśledavańni buduć paśpiachovymi, zastajecca pytańnie ab ekanamičnaj metazhodnaści i biaśpiecy vykarystańnia hierapratektaraŭ dla prafiłaktyki zachvorvańniaŭ, źviazanych z uzrostam. Mahčyma, inšyja miery, takija jak palapšeńnie dyjety i fizičnyja praktykavańni, mohuć być takimi ž dobrymi, kali nie lepšymi srodkami.
Kamientary