Z pamierłymi možna budzie kamunikavać. Źjaviŭsia štučny intelekt, zdolny stvarać ličbavuju kopiju čałavieka
Re;memory — heta technałohija, jakaja moža całkam abličbavać čałavieka, tym samym dazvalajučy isnavać hetaj kopii viečna.
Paŭdniovakarejskaja kampanija DeepBrain vypuściła štučny intelekt, jaki moža stvarać virtualnuju i adnačasova zvyšrealistyčnuju (amal žyvuju) čałaviečuju kopiju, ź jakoj možna pa-sapraŭdnamu kamunikavać u farmacie videasuviazi.
Hety prajekt pad nazvaj Re;memory byŭ upieršyniu prezientavany na vystavie navinak elektroniki Consumer Electronics Show (CES) jašče ŭ studzieni 2023 hoda, dzie byŭ pryznany najlepšym u naminacyi «Virtualnaja i dapoŭnienaja realnaść».
Re;memory — heta technałohija, jakaja moža całkam abličbavać čałavieka, tym samym dazvalajučy isnavać hetaj kopii viečna. Pa zajavach jaje raspracoŭščykaŭ, jana ŭ pieršuju čarhu stvoranaja dla tych, chto pamiraje, albo ŭžo pamierłych ludziej i ich siemjaŭ.
«Jość ludzi, jakim padabajecca padobnaja ideja ab ułasnym uviekaviečańni, choć nie ŭsie ličać heta praŭdapadobnym. Taksama jość tyja, chto nievylečna chvory, naprykład, na rak. Jany zmohuć padzialicca svaimi ŭspaminami pierad śmierciu, kab siemji pamiatali ich zdarovymi i mahli ź imi pieryjadyčna bačycca. Čym bolš klijent vydatkuje času na svaju abličboŭku, tym bolš realistyčnym budzie jaho vobraz», — raspavioŭ u studzieni vydańniu Daily Mail Džef Merfi, mieniedžar pa raźvićci biznesu kampanii DeepBrain.
Dla stvareńnia virtualnaj kopii čałavieku nieabchodna naviedać śpiecyjalnuju studyju DeepBrain dla praviadzieńnia intervju sa štučnym intelektam. Re;memory praanalizuje i zapomnić hołas, źniešnaść, asablivaści charaktaru klijenta, a taksama vyvučyć jaho dziciačyja fatahrafii, asabistyja natatki, videazapisy i naohuł lubuju infarmacyju, źviazanuju ź im.
Pracedura zapisu zvyčajna doŭžycca kala siami hadzin. Paśla z kopijaj možna budzie kamunikavać u farmacie sapraŭdnaj videasuviazi ŭ režymie realnaha času. Heta budzie adbyvacca ŭ pamiaškańni z ekranam 400 calaŭ i jakasnym hukavym abstalavańniem.
Kampanija zajaŭlaje, što siemji pamierłych mohuć vybrać niekalki pasłuh, u liku jakich jość «dośvied uźjadnańnia», jaki imituje dni naradžeńnia, jubilei i inšyja śviaty z udziełam pamierłaha. Adzin taki «sieans uźjadnańnia» budzie kaštavać zvyš 1200 dalaraŭ (krychu bolš za 3 tysiačy bieł. rub.), a sam praces abličboŭki abydziecca ŭ sumu ad 12 da 25 tys. dalaraŭ (ad 33 da 64 tys. bieł. rub.).
«My papularyzujem paminalnyja słužby z udziełam štučnaha intelektu i prasoŭvajem novuju pachavalnuju kulturu», — adznačajuć u kampanii DeepBrain.
Pry hetym raspracoŭka vyklikała ŭ ludziej vielmi nieadnaznačnuju reakcyju. Niekatoryja nazyvajut vykarystańnie technałohii Re;memory «śpirytualizmam XXI stahodździa», a inšyja vykazvajuć mierkavańnie, što heta cyničnaje nažyvańnie na siamiejnym hory i sapraŭdny ździek ź ludziej.
«Heta dziŭnaja i ahidnaja ideja. Mnohija ludzi pierad śmierciu pišuć zvyčajnyja zaviaščańni ci viaduć dziońniki, što źjaŭlajecca najlepšym i etyčnym sposabam zachavać pra siabie pamiać, nie traŭmujučy svajakoŭ. Re; memory, naadvarot, pierachodzić hetuju miažu. Takoje adčuvańnie, što jaho zrabili tolki dla palavańnia na kašalki tych, chto biaduje», — raskazała ŭ svaim intervju Daily Mail Śju Hił, vałanciorka Cruse Bereavement Support, brytanskaj dabračynnaj arhanizacyi pa padtrymcy ludziej u suviazi sa strataj svajakoŭ.
Čytajcie jašče:
Źjaviłasia mahčymaść chutka stvarać svaje ŭłasnyja fotarealistyčnyja i animavanyja avatary
U Saudaŭskaj Aravii źjavicca vysokatechnałahičny chmaračos u formie kuba
Tvorca pieršych u śviecie hienna-madyfikavanychdziaciej raspavioŭ pra ich stan
«This f*cking AI». Pierakładčyk Łukašenki pry prezidencie AAE vykarystaŭ niedypłamatyčnaje słova8
Kamientary