U Ispanii praz adsutnaść elektryčnaści abjavili nadzvyčajnaje stanovišča, situacyja zastajecca składanaj

Premjer-ministr Ispanii Pedra Sančes abviaściŭ režym nadzvyčajnaj situacyi ŭ troch rehijonach krainy, jakija źviarnulisia z prośbaj. Jon abjaviŭ, što Ministerstva ŭnutranych spraŭ biare na siabie kiraŭnictva ŭ Andałusii, Estremadury i Madrydzie.

Staršynia ispanskaha ŭrada zaklikaŭ hramadzian ustrymacca ad pajezdak i telefonnych zvankoŭ.

Mer Madryda Chase Łuis Marcinies Almiejda paprasiŭ nakiravać u stalicu Ispanii armiejskija padraździaleńni, kab vajskoŭcy dapamahli spravicca z nastupstvami maštabnaha adklučeńnia elektryčnaści.

Ispanski apieratar Red Electrica paviedamiŭ, što na adnaŭleńnie elektrazabieśpiačeńnia spatrebicca ad 6 da 10 hadzin. U svaju čarhu apieratar elektrasietki Partuhalii zajaviŭ, što na poŭnuju narmalizacyju pracy moža pajści tydzień.

«Padača elektraenierhii pastupova adnaŭlajecca va ŭsich elektryčnych zonach krainy, 45% padstancyj pieradajučych sietak ŭžo znachodziacca pad napruhaj», — udakładniajecca ŭ zajavie Red Electrica ŭ sacyjalnaj sietcy X.

Pastupovaje adnaŭleńnie elektraenierhii ź Ispanii stała mahčymym dziakujučy dapamozie Francyi i Maroka, ale składanaja situacyja zachoŭvajecca. Bolš za 5,5 tysiač MVt elektraenierhii ŭ Ispanii zabiaśpiečvajecca za košt aŭtanomnaj vytvorčaści abo źniešniaj padtrymki z boku Francyi, paviedamiła Red Electrica.

U Ispanii i Partuhalii zakrytyja apteki i kramy, uvieś hramadski transpart u krainie pierastaŭ pracavać, u aeraportach vystrojvajucca kiłamietrovyja čerhi na taksi, ludzi stajać u čerhach, kab zaradzić telefony. 

Bieznajaŭnaja apłata niedastupnaja: karty bolš nie prymajuć, a bolšaść bankamataŭ adklučanaja.

U kramach zakančvajecca vada, cana na paŭerbanki dachodzić da 12 tysiač jeŭra, nie ŭsiudy možna zapravicca, tamu što nasosy pracujuć ad elektryčnaści, u niekatorych miescach prablemy z kanalizacyjaj. Lifty abiastočanyja, mnostva ludziej zachrasła ŭ ich usiaredzinie biez mahčymaści vybracca.

Mabilnaja suviaź jašče abmiežavana pracuje, ale ŭ najbližejšyja hadziny mabilny internet adklučycca, bo paliva dla avaryjnych hienierataraŭ amal zakančvajecca.

35 tysiač čałaviek ź ciahnikoŭ, jakija stali na puciach paśla adklučeńnia elektryčnaści, płanuje evakujavać ispanski apieratar čyhunak Renfe. Bolš za 200 rejsaŭ skasavanyja abo zatrymanyja ŭ aeraporcie Lisabona ŭ Partuhalii.

Prykmiet kibierataki ŭ Ispanii i Partuhalii niama, zajaviŭ staršynia Jeŭrarady Antoniu Košta. Pa jahonych słovach, «apieratary elektrasietak u abiedźviuch krainach pracujuć nad pošukam pryčyny i adnaŭleńniem padačy elektraenierhii».

• 0
• 0
• 1
• 2
• 7
• 3
• 0
• 0