Biełaruski futbolny trenier znajšoŭ siamiejnaje ščaście ŭ dalokaj Indaniezii
Pra biełaruskaha treniera Aleha Kuźmianka, jaki ŭ svoj čas pracavaŭ z šeraham ajčynnych kamand i ŭ zbornaj Biełarusi, na Radzimie nie čuvać užo paru hadoŭ — z tych časoŭ, jak jaho i Ihara Kryvušienku zvolnili za drennyja vyniki ź indaniezijskaha kłuba «Piersikaba» vosieńniu 2021-ha. Ale «Trybuna» daviedałasia, što Kuźmianok zastajecca ŭ ekzatyčnaj dla bolšaści biełarusaŭ krainie dahetul, i navat puściŭ u joj karani.
U 1990-ja hady i na pačatku nulavych uradženiec Śvietłahorska Aleh Kuźmianok hulaŭ forvardam u niekalkich ajčynnych kłubach. U 1990-ja jon hulaŭ u mahiloŭskich kłubach «Dniapro» i «Tarpieda-Kadzina», dzie i dasiahnuŭ asnoŭnych pośpiechaŭ jak hulec. U 1992 hodzie jon staŭ srebranym pryzioram pieršaha ŭ historyi čempijanatu niezaležnaj Biełarusi, a ŭ «Tarpieda-Kadzina» z 45 miačami staŭ najlepšym bambardziram za ŭsiu historyju kłuba.
Paśla Kuźmianok hulaŭ za minskija «Darydu» i MTZ-RIPA, dzie taksama hraŭ nie apošniuju skrypku, a zakančvaŭ karjeru jak hulajučy trenier u «Haradziei».
Kančatkova pierastaŭšy hulać u 2010-m, jon staŭ trenieram. Pry hetym niekalki hadoŭ razam ź Iharam Kryvušenkam treniravaŭ žodzinskuju kamandu, a paśla navat nacyjanalnuju zbornuju — praŭda, nie vielmi ŭdała. I kali ŭ 2019 hodzie Kryvušenku zvolnili, razam ź im syšoŭ i Kuźmianok. A paśla taho abodva apynulisia na inšym kancy śvietu — u Indaniezii.
U śniežni 2019-ha Kryvušenka atrymaŭ pryznačeńnie na pasadu hałoŭnaha treniera indaniezijskaha kłuba «Piersikaba», a Kuźmianok znoŭ staŭ jaho pamočnikam. Adnak u ekzatyčnym čempijanacie biełaruskija koŭčy na top-uzrovień vyvieści kalektyŭ nie zmahli. Što ŭ 2020-m, što ŭ 2021-m hadach kłub ploŭsia ŭ chvaście pieršaj dziasiatki, što vidavočna nie zadavalniała bosaŭ. Urešcie Kryvušenku 23 listapada 2021 hoda zvolnili.
Kryvušenku paśla taho ničoha nie zastavałasia, jak viarnucca ŭ Biełaruś. A voś dla Kuźmianka ŭsio skłałasia vielmi niečakana. Jon zastaŭsia ŭ Indaniezii, i pryčyny hetamu byli zusim nie futbolnyja.
Jak akazałasia, Kryvušenku i Kuźmianka ŭ svoj čas abjadnaŭ nie tolki futboł, a i nie samyja radasnyja pieryjady ŭ asabistym žyćci Kuźmianka. Jašče ŭ 1990-ch jon ažaniŭsia i raźvioŭsia pieršy raz — z depresiŭnaha stanu paśla hetaha vyvieści jaho dapamoh jakraz Kryvušenka, ź jakim jany hulali ŭ «Tarpieda-Kadzina» u 1997 hodzie. Paśla ŭ Kuźmianka zdaryŭsia druhi šlub — znoŭ niaŭdały, choć, jak raskazali «Trybunie», Aleh vielmi kachaŭ žonku i navat jašče da viasiella padaryŭ joj pazadarožnik. Paśla razvodu Kuźmianku znoŭ było vielmi drenna maralna — i znoŭ vyciahnuŭ siabar Kryvušenka.
Ciapier ža ŭ Kuźmianka adbyŭsia treci šlub. Hetym razam — u Indaniezii. Nieŭzabavie paśla pryznačeńnia ŭ «Piersikaba», jašče na pačatku 2021-ha, trenier paznajomiŭsia ź miascovaj dziaŭčynaj, ź jakoj zakruciŭ raman, a potym i zrabiŭ joj prapanovu.
Čym zajmajecca žonka treniera, daviedacca nie ŭdałosia, adnak viadoma, što dziaŭčyna našmat maładziejšaja za svajho muža, a jaje baćka — bahaty i paśpiachovy pa miascovych mierkach biznesmien. A jašče ŭ siamji Kuźmianka, jakomu ŭžo 48 hadoŭ, źjaviłasia dzicia.
Hrošy zarablać Kuźmianok praciahvaje futbołam. U mai 2022 hoda jon viarnuŭsia ŭ «Piersikaba», jakim kiruje ciapier miascovy śpiecyjalist Adził Šaryn, — staŭ tam trenieram pa fizpadrychtoŭcy. U siezonie 2022/23 Kuźmianok zastajecca na pasadzie, a «Piersikaba» idzie na 13-m miescy paśla 27 z 34 matčaŭ.
U kamandzie Kuźmianka ličać svaim — pra heta dajuć zrazumieć šmatlikija fatahrafii i videa ŭ Instagram «Piersikaba». Znajšoŭsia tam i rolik pra toje, jak futbalisty padaryli trenieru tort z nahody 48-hodździa — napisana na im było Papa Oleg, što jašče raz daje zrazumieć, što treniera pavažajuć.
U Biełarusi Aleh Kuźmianok nie byŭ z časoŭ pierajezdu ŭ Indanieziju, choć suviazi z radzimaj i padtrymlivaje.
Kamientary