Беларускі футбольны трэнер знайшоў сямейнае шчасце ў далёкай Інданезіі
Пра беларускага трэнера Алега Кузьмянка, які ў свой час працаваў з шэрагам айчынных каманд і ў зборнай Беларусі, на Радзіме не чуваць ужо пару гадоў — з тых часоў, як яго і Ігара Крывушенку звольнілі за дрэнныя вынікі з інданезійскага клуба «Персiкаба» восенню 2021-га. Але «Трыбуна» даведалася, што Кузьмянок застаецца ў экзатычнай для большасці беларусаў краіне дагэтуль, і нават пусціў у ёй карані.
У 1990-я гады і на пачатку нулявых ураджэнец Светлагорска Алег Кузьмянок гуляў форвардам у некалькіх айчынных клубах. У 1990-я ён гуляў у магілёўскіх клубах «Дняпро» і «Тарпеда-Кадзіна», дзе і дасягнуў асноўных поспехаў як гулец. У 1992 годзе ён стаў срэбраным прызёрам першага ў гісторыі чэмпіянату незалежнай Беларусі, а ў «Тарпеда-Кадзіна» з 45 мячамі стаў найлепшым бамбардзірам за ўсю гісторыю клуба.
Пасля Кузьмянок гуляў за мінскія «Дарыду» і МТЗ-РIПА, дзе таксама граў не апошнюю скрыпку, а заканчваў кар'еру як гуляючы трэнер у «Гарадзеі».
Канчаткова перастаўшы гуляць у 2010-м, ён стаў трэнерам. Пры гэтым некалькі гадоў разам з Ігарам Крывушэнкам трэніраваў жодзінскую каманду, а пасля нават нацыянальную зборную — праўда, не вельмі ўдала. І калі ў 2019 годзе Крывушэнку звольнілі, разам з ім сышоў і Кузьмянок. А пасля таго абодва апынуліся на іншым канцы свету — у Інданезіі.
У снежні 2019-га Крывушэнка атрымаў прызначэнне на пасаду галоўнага трэнера інданезійскага клуба «Персiкаба», а Кузьмянок зноў стаў яго памочнiкам. Аднак у экзатычным чэмпіянаце беларускія коўчы на топ-узровень вывесці калектыў не змаглі. Што ў 2020-м, што ў 2021-м гадах клуб плёўся ў хвасце першай дзясяткі, што відавочна не задавальняла босаў. Урэшце Крывушэнку 23 лістапада 2021 года звольнілі.
Крывушэнку пасля таго нічога не заставалася, як вярнуцца ў Беларусь. А вось для Кузьмянка ўсё склалася вельмі нечакана. Ён застаўся ў Інданезіі, і прычыны гэтаму былі зусім не футбольныя.
Як аказалася, Крывушэнку і Кузьмянка ў свой час аб'яднаў не толькі футбол, а i не самыя радасныя перыяды ў асабістым жыцці Кузьмянка. Яшчэ ў 1990-х ён ажаніўся і развёўся першы раз — з дэпрэсіўнага стану пасля гэтага вывесці яго дапамог якраз Крывушэнка, з якiм яны гулялі ў «Тарпеда-Кадзіна» у 1997 годзе. Пасля ў Кузьмянка здарыўся другi шлюб — зноў няўдалы, хоць, як расказалi «Трыбуне», Алег вельмi кахаў жонку i нават яшчэ да вяселля падарыў ёй пазадарожнік. Пасля разводу Кузьмянку зноў было вельмi дрэнна маральна — i зноў выцягнуў сябар Крывушэнка.
Цяпер жа ў Кузьмянка адбыўся трэці шлюб. Гэтым разам — у Інданезіі. Неўзабаве пасля прызначэння ў «Персiкаба», яшчэ на пачатку 2021-га, трэнер пазнаёміўся з мясцовай дзяўчынай, з якой закруціў раман, а потым i зрабiў ёй прапанову.
Чым займаецца жонка трэнера, даведацца не ўдалося, аднак вядома, што дзяўчына нашмат маладзейшая за свайго мужа, а яе бацька — багаты і паспяховы па мясцовых мерках бізнэсмен. А яшчэ ў сям'і Кузьмянка, якому ўжо 48 гадоў, з'явілася дзіця.
Грошы зарабляць Кузьмянок працягвае футболам. У маі 2022 года ён вярнуўся ў «Персiкаба», якiм кіруе цяпер мясцовы спецыяліст Адзіл Шарын, — стаў там трэнерам па фізпадрыхтоўцы. У сезоне 2022/23 Кузьмянок застаецца на пасадзе, а «Персiкаба» ідзе на 13-м месцы пасля 27 з 34 матчаў.
У камандзе Кузьмянка лiчаць сваiм — пра гэта даюць зразумець шматлікія фатаграфіі і відэа ў Instagram «Персiкаба». Знайшоўся там i ролiк пра тое, як футбалiсты падарылi трэнеру торт з нагоды 48-годдзя — напісана на iм было Papa Oleg, што яшчэ раз дае зразумець, што трэнера паважаюць.
У Беларусi Алег Кузьмянок не быў з часоў пераезду ў Інданезію, хоць сувязі з радзімай і падтрымлівае.
Сястра Калеснікавай прапанавала ў Брусэлі тры крокі, якія трэба зрабіць для вызвалення палітвязняў27
Каментары