U mini-sieryjale «Kansultant», što vyjšaŭ u kancy lutaha, dvoje maładych ajcišnikaŭ sprabujuć vyśvietlić tajamnicy novaha bosa, jaki pavodzicca, jak toj djabał. Rolu złoha načalnika vykonvaje dvuchrazovy ŭładalnik «Oskara» Krystaf Valc — akcior, u jakoha adnolkava dobra atrymoŭvajecca być i miłym, i strašnym. Sieryjał pretenduje na zvańnie mistyčnaha trylera, jaki ŭzdymaje šerah aktualnych pytańniaŭ, što datyčać žyćcia ŭ karparacyjach i naohuł kapitalizmu, ale atrymlivajecca ŭ najlepšym vypadku krychu zajmalnaj satyraj.
Sieryjał «Kansultant» źniaty pa adnajmiennaj knizie chorar-ramanista Bentli Litła, jakaja vyjšła ŭ 2016 hodzie. Niekatoryja ŭbačyli ŭ hieroju Valca satyru na Iłana Maska, ale heta chutčej sproby hledačoŭ pravieści paraleli z sučasnaściu, a nie zadumka aŭtara knihi.
Historyja razhortvajecca ŭ Łos-Andželesie, u kampanii CompWare, jakaja raspracoŭvaje kampjutarnyja hulni typu Candy Crush. U joj raptoŭna pamiraje dyrektar — małady hienij z Paŭdniovaj Karei. Amal adrazu paśla taho, što zdaryłasia, źjaŭlajecca kansultant, jaki stanovicca novym bosam, — Rehus Pataf.
Choć jon śćviardžaje, što niabožčyk pryznačyŭ jaho svaim pierajemnikam, u historyi Patafa jość padazronyja detali, pačynajučy z taho, što jon, zdajecca, nie viedaje, jakija pradukty naohuł stvaraje kampanija, i zakančvajučy tym, što ŭ internecie pra jaho ŭvohule niama nijakaj infarmacyi.
Razhadać tajamnicy novaha bosa sprabujuć dva nieabyjakavyja supracoŭniki — asistentka Elejn i hiejm-dyzajnier Krejh. Pry hetym uciahnutaść apošniaha ŭ rasśledavańnie pahražaje sapsavać jaho adnosiny ź niaviestaj. Ci atrymajecca ŭ hierojaŭ raskryć, kim nasamreč jość «kansultant»?
Historyja pra «złoha bosa»
Sieryjał hruntujecca na viedańni taho, što kožny čałaviek u niejki momant svajho žyćcia sutykaŭsia z taksičnym kiraŭnikom i pačynaŭ razvažać, u čym pryroda takich pavodzin.
Pataf — jakraz taki kiraŭnik: jon telefanuje svaim rabotnikam pasiarod nočy, zvalniaje ludziej ź invalidnaściu i tych, chto pracuje addalena i nie moža apieratyŭna pryjechać u ofis, i padstryhaje paznohci za pracoŭnym stałom. A taksama jon moža być i zabojcam.
Niekalki sieryj hladač budzie zadavacca pytańniami: Pataf trymaje ŭ svaich rukach karjeru Krejha i Elejn abo ich žyćci? Ci maje jon zvyšnaturalnyja zdolnaści abo sens sieryjała ŭ tym, što štučnaja ijerarchija na pracoŭnym miescy daje lubomu načalniku iluziju ŭłady?
Aŭtary śviadoma nie pakazvajuć, ci źjaŭlajecca toje, što my bačym, zvyšnaturalnym złom abo prosta vielmi drennymi pavodzinami. Krystaf Valc sapraŭdy dobry ŭ hetaj roli, bo ŭ jaho ź vialikaj pierakanaŭčaściu atrymoŭvajecca być to miłym i śmiešnym (bo «Kansultant» — heta častkova i kamiedyja), to strašnym i pahroźlivym (bo najpierš heta tryler).
Adnak u toj ža čas hulnia Valca pradkazalna dobraja i absalutna dla jaho typovaja, a tamu chutka pierastaje zdavacca vybitnaj.
Tryler, satyra ci… prosta čarhovy ničym nie admietny sieryjał?
«Kansultant» — nie toj sieryjał, u jaki vy nastolki zahłybiciesia, što zabudzieciesia pra toje, što hladzicie kino. Usio, što ŭ im adbyvajecca, usprymajecca chutčej jak parodyja ci alehoryja na šmatlikija vobrazy, jakija my sustrakajem u žyćci, a nie jak aryhinalnaja historyja.
Žanr zajaŭleny jak tryler, navukovaja fantastyka i čornaja kamiedyja — heta značyć, što časam hladač zacikaŭleny najnoŭšymi technałohijami, časam adčuvaje mistycyzm ci napružanaść, a časam bačyć štości žorstkaje, pužalnaje ci ahidnaje.
Pry hetym satyra, mahčyma, najbolš jarki kampanient «Kansultanta», bo hety «tryler» — u pieršuju čarhu pra žachi karparatyŭnaj kultury.
Rehus Pataf šmat u čym — parodyja na sučasnaha biznes-lidara, jaki chutka vyjaŭlaje słabaści inšych i manipuluje imi. Tak, Elejn patrebna dobraje CV, a Krejh — razumny, ale lenavaty chłopiec, jaki vystupaje suprać lubych prajaŭ ułady, što pahražajuć jaho dobramu samaadčuvańniu. Rehus, biezumoŭna, skarystajecca hetymi słabaściami.
Što da pavarotaŭ siužeta — ź imi niama prablem, u kožnaj 30-chvilinnaj sieryi z hierojami adbyvajecca štości absalutna niečakanaje. Tym nie mienš, ton «Kansultanta» zastajecca lohkim i paviarchoŭnym. Jon nikoli nie dachodzić da sapraŭdnych žachaŭ čornaj kamiedyi, i padziei razhortvajucca, nie zakranajučy hledača pa-sapraŭdnamu i nie pakidajučy mocnych uražańniaŭ. Humar sieryjała taksama svojeasablivy: časta absurd i žorstkaść vydajucca za niejkaje padabienstva da žartu.
Šou achviaruje źviaznym siužetam dziela jarkich scen hvałtu abo varjactva bosa. Ź ciaham času hetyja epizody stanoviacca pradkazalnymi i nie robiać nijakaha ŭražańnia.
Akramia hetaha, «Kansultant» pretenduje na abmierkavańnie aktualnych sacyjalnych prablem, kali hieroi zadajucca pytańniami: chto vinavaty ŭ tym, što dzieci stralajuć u darosłych paśla taho, jak hulajuć u videahulni, i ci hatovy ludzi «pradać dušu djabłu» dziela pavyšeńnia na pracy. Ale sieryjał nie budzie šukać adkazaŭ na hetyja pytańni.
Vam taksama mohuć być cikavyja:
Što pahladzieć. «Noli» (Nolly) — historyja lehiendy brytanskaha TB
Samy niedaacenieny sieryjał hoda. Čamu varta pahladzieć «Raździaleńnie», kali vy jaho prapuścili
«Try sasny» (Three Pines) — novy detektyŭny sieryjał pra kanadskuju hłybinku
Top sieryjałaŭ ad žurnalistaŭ «Našaj Nivy». Niekatoryja ź ich dakładna stanuć adkryćciom dla vas
Kamientary