Iłan Mask patrapiŭ u skandał, vyrašyŭšy parazvažać pra vajnu, Ukrainu, Rasiju i Krym
Multymiljarder Iłan Mask vyrašyŭ vykazacca ŭ svaim tvitary na temy mižnarodnaj palityki, čym vyklikaŭ vialiki skandał.
Spačatku Mask vykazaŭsia pra toje, jakija, na jaho dumku, mohuć być umovy miru pamiž Maskvoj i Kijevam. Pavodle jaho, heta mahčyma tady, kali:
— pravieści novyja vybary ŭ anieksavanych rehijonach pad nahladam AAN. Rasija sychodzić adtul, kali takaja budzie vola naroda;
— Krym farmalna źjaŭlajecca častkaj Rasii, jak heta było z 1783 hoda (pakul «Chruščoŭ nie zrabiŭ pamyłku»);
— harantujecca vodazabieśpiačeńnie Kryma;
— Ukraina zastajecca niejtralnaj.
Svaim padpisčykam u tvitary Mask prapanavaŭ prahałasavać za ci suprać hetaha płana. Jon taksama zajaviŭ, što mahčymym, choć i małavierahodnym varyjantam raźvićcia kanfliktu, na jahonuju dumku, źjaŭlajecca jadziernaja vajna.
Naturalna, takija prapanovy, jakija pry ich pryniaćci aznačali b dla Pucina choć i drobnuju ŭ paraŭnańni ź pieršačarhovymi płanami, ale pieramohu, ukraincy i ludzi, prychilnyja im, sustreli ź vialikim abureńniem.
Na tvit Maska siarod inšych adreahavali viadomyja ŭkrainskija palityki: daradca kiraŭnika Ofisa prezidenta Ukrainy Michaił Padalak, były pasoł Ukrainy ŭ Hiermanii Andrej Mielnik i navat sam prezident Ukrainy Uładzimir Zialenski. Ichnija dopisy byli ci rezka asudžalnymi, ci iraničnymi.
Z boku ž zvyčajnych karystalnikaŭ situacyja sparadziła šmat žartaŭ, miemaŭ, fotažab.
A akcyi maskaŭskaj kampanii Tesla paśla prapanovy jaje ŭładalnikam «mirnaha płanu» abrynulisia amal na 9%.
Sam ža Mask na hetym nie spyniŭsia. Jon paśla publikacyi svajoj apytanki paskardziŭsia na ataku botaŭ, a zatym napisaŭ, što žychary Danbasa i Kryma pavinny sami vyrašać, chočuć jany być z Rasijaj ci nie — i prapanavaŭ padpisčykam pahadzicca ci nie pahadzicca z hetym śćviardžeńniem.
Zatym biznesmien dadaŭ, što Rasija pravodzić mabilizacyju, a pakolki nasielnictva Rasii ŭtraja bolšaje za nasielnictva Ukrainy, to «pieramoha Ukrainy ŭ tatalnaj vajnie małavierahodnaja».
Syn Piatkievič viarnuŭsia z ZŠA, zajmajecca kansultacyjami pa kryptavalucie. I zaadno padpracoŭvaje stažoram u BDU11
Kamientary