Film «Tetrys»: jak zamiežnyja biznesmieny kuplali pravy na suśvietna viadomuju hulniu ŭ savieckaha inžyniera
Nasamreč heta film pra niečakanaje siabroŭstva pamiž dvuma mužčynami z roznych suśvietaŭ — kapitalizmu i kamunizmu. Stužka atrymałasia nie nadta zachaplalnaj, ale roŭnaj i vytrymanaj u svaim tonie i stylistycy, miescami navat zabaŭnaj. Na sajcie recenzij Rotten Tomatoes 80% sa 148 vodhukaŭ krytykaŭ stanoŭčyja, ź siaredniaj acenkaj 6,6/10.
Tetris byŭ stvorany ŭ 1984 hodzie, i z taho času pradadziena bolš za 520 miljonaŭ jaho kopij. Mała chto viedaje, što hetu hulniu prydumaŭ saviecki inžynier Alaksiej Pažytnaŭ (ciapier jamu 67 hadoŭ i jon žyvie ŭ ZŠA). U centry siužeta novaj stužki ad Apple+, jakaja vyjšła 31 sakavika, — historyja Pažytnava, raskazanaja zamiežnikami.
Dakładniej, heta nie zusim historyja Pažytnava: hałoŭny hieroj — hałandski pradprymalnik Chenk Rodžers, jaki zmahajecca za toje, kab kupić u Alaksieja pravy na hulniu. U 1988 hodzie na vystavie ŭ Łas-Viehasie Chenk bačyć na susiednim stendzie «Tetrys» i razumieje, što heta patencyjny chit. Chenk rašaje nabyć pravy na hulniu i daviedvajecca, što jaje prydumaŭ inžynier z Maskvy.
Ale Saviecki Sajuz — kraina, zakrytaja dla zamiežnikaŭ, i vykupić pravy na štości ŭ pryvatnaj asoby niemahčyma, nie spytaŭšy dazvołu ŭ KDB. Naturalna, śpiecsłužby ŭbačać u namierach Chenka pahrozu samomu kamunizmu. «Hieroj choča padzialicca svajoj znachodkaj sa śvietam, ale traplaje ŭ niebiaśpiečnaje pavucińnie chłuśni i karupcyi za žaleznaj zasłonaj», — tak adznačyła kampanija Apple ŭ apisańni da filma.
Biezumoŭna, film pakaža ŭsie viadomyja stereatypy pra žyćcio ŭ Savieckim Sajuzie: surovyja interjery, sproby kupić džynsy z-pad krysa i žyćcio hramadzian «na karyść radzimy». Dla siaredziny 80-ch dekaracyi vyhladajuć nadzvyčaj zmročna, ale takoj była aŭtarskaja zaduma. Darečy, film byŭ całkam źniaty ŭ Šatłandyi, i «krajavidy Maskvy» źniatyja tam ža.
Pobač z pradprymalnym, žyćcielubivym i poŭnym aptymizmu Chenkam Rodžersam Alaksiej Pažytnaŭ vyhladaje davoli kantrasna — jon «cichi hienij», jaki nie stavić u žyćci niejkich ambicyjnych met. Ale kali pačnie razharacca mižnacyjanalnaja biznes-zavarucha, stanie zrazumieła, što pamiž hierojami bolš padabienstvaŭ, čym zdajecca na pieršy pohlad.
U stužcy źjavicca navat Michaił Harbačoŭ (Mećju Marš), jaki razmaŭlaje pa-rusku z akcentam, — i nie dla fonu, a kab akcentavać uvahu na palityčnym pierałomie, namiečanym harbačoŭskaj palitykaj. Takim čynam, historyja z «Tetrysam» stanovicca pradvieśnikam vialikich pieramien, što adbuducca ŭ dzievianostyja.
Siarod niedachopaŭ filma možna nazvać nadzvyčaj zabłytanuju jurydyčnuju historyju kupli pravoŭ, u jakoj hladač chutka zhubicca (miž inšym, heta historyja i jość ruchavikom siužeta, tamu nazirać za jaje raźvićciom, mała što razumiejučy, časami budzie stomna). A siarod pieravah — aryhinalnaje ŭplacieńnie hrafičnych elemientaŭ tetrysa i muzyki kampjutarnych hulniaŭ 80-ch. Heta dobra pracuje na karyść atmaśfiery i zadaje hullivy i lohki ton. Pry hetym z druhoj pałovy stužki ŭ joj vyrazna zahučać zusim inšyja noty — zmročnyja i napružanyja. Ale ŭ ahulnaj kanvie filma navat jany nie buduć usprymacca praźmierna dramatyčna.
«Tetrys» nie pretenduje na ŭznaŭleńnie histaryčnych padziej (šmat što z sapraŭdnaj historyi pravoŭ na «Tetrys» u im źmieniena), nie pakazvaje navatarskaha bačańnia savieckich realij i nie prapanuje nievierahodnych siužetnych pavarotaŭ. Ale hety dastatkova lohki i vytrymany ŭ svajoj stylistycy film čarhovy raz nahadvaje pra toje, nakolki niaprostyja časam byli adnosiny Savieckaha Sajuza z astatnim śvietam. I nakolki nasamreč niaciažka parazumiecca ludziam navat z roznych kancoŭ śvietu, kali ŭ ich jość ahulnyja kaštoŭnaści.
Čytajcie jašče:
U amierykanskim filmie pakazali vielmi dziŭnuju Biełaruś FOTY
Top sieryjałaŭ ad žurnalistaŭ «Našaj Nivy». Niekatoryja ź ich dakładna stanuć adkryćciom dla vas
Ciapier čytajuć
«Adpuścicie, kali łaska, syna!» Amierykanca z amniezijaj, jaki nielehalna pryjechaŭ u Biełaruś, nie addajuć maci5
Kamientary