Minułaj nočču na značnaj terytoryi Ukrainy abviaščałasia pavietranaja tryvoha, vyklikanaja čarhovym nalotam rasijskich bieśpiłotnikaŭ — hałoŭnym čynam, «šachiedaŭ» iranskaj vytvorčaści. U pryvatnaści, upieršyniu paśla 25-dzionnaha pierapynku napad adbyŭsia na stalicu Ukrainy.
Jak paviedamili haradskija ŭłady Kijeva, na horad nakiroŭvalisia vosiem bieśpiłotnikaŭ, usie jany byli vyjaŭlenyja i źbityja siłami abarony. Pavodle papiarednich źviestak, achviar i razbureńniaŭ u vyniku ataki niama.
Hienieralny štab Uzbrojenych sił Ukrainy ŭ svajoj ranišniaj zvodcy ŭ piatnicu infarmuje, što ahułam Rasija minułaj nočču zapuściła pa Ukrainie blizu 10 BPŁA typu «Šachied-136». Vosiem ź ich byli źbityja.
Razam z tym, jak paviedamili ŭ administracyi Pałtaŭskaj vobłaści, u vyniku ŭdaru bieśpiłotnikam byŭ razburany abjekt cyvilnaj infrastruktury ŭ rajonie Pałtavy.
«Ratavalniki pracujuć nad tušeńniem pažaru. Papiarednie, paciarpiełych niama», — napisaŭ u svaim telehram-kanale kiraŭnik vobłaści Dźmitryj Łunin.
Ahułam za minułyja sutki rasijanie nanieśli pa terytoryi Ukrainy 23 avijacyjnyja ŭdary, paviedamlaje hienštab USU.
Jak praviła, Rasija vykarystoŭvaje paraŭnalna tannyja «šachiedy» dla vyjaŭleńnia miescaŭ raźmiaščeńnia ŭkrainskaj SPA, i paśla zapusku bieśpiłotnikaŭ niaredka staić rakietny abo avijacyjny ŭdar. Vierahodna, u suviazi z hetym Hienštab papiaredžvaje, što vierahodnaść rakietnych i avijaŭdaraŭ pa ŭsioj Ukrainie zachoŭvajecca na vysokim uzroŭni.
Kamientary