Krytyčnaja situacyja ŭ Homielskaj žanočaj kałonii №4: praz našeście mošak źniavolenyja chodziać u puchirach, ale pieradavać repielenty nie dazvalajuć
Z-za niebyvałaj pavodki ŭ Homieli ciapier niejmaviernaje našeście mošak. I kali ludzi na voli mohuć pakłapacicca pra siabie i nabyć, da prykładu, nieabchodnyja srodki dla abarony, to ŭ žančyn, jakija adbyvajuć terminy ŭ kałonii, takoj mahčymaści niama, piša «Štodzień».
Na ŭkusy mošak reakcyja moža być samaj roznaj — ad mocnaha śvierbu i razdražnieńnia, da vysokaj tempieratury i surjoznaj alerhičnaj reakcyi.
Pry hetym, jak paviedamlajuć svajaki źniavolenych, u kałoniju nie prapuskajuć nijakija srodki abarony — ich prosta nielha pieradavać pa praviłach režymu kałonii.
Nijakich maskitnych sietak tam, zrazumieła, niama. Pry hetym žyłyja baraki praktyčna ŭvieś čas znachodziacca na pravietryvańni. I moški litaralna hryzuć źniavolenych. Jak paviedamlajuć rodnyja asudžanych, u mnohich na ciele množnyja puchiry i alerhija. I jany strašna ad hetaha pakutujuć.
Takaja ž situacyja ŭ tak zvanaj «haścinicy dla praciahłych spatkańniaŭ», u jakuju pryjazdžajuć rodnyja asudžanych. Darečy, pa šmatlikich vodhukach, heta adna z najhoršych takich «haścinic» u sistemie DVP Biełarusi. U pakojach tam pastajannaja syraść. I kali pamiaškańnie tam nie adkryć na pravietryvańnie, to spać tam prosta nierealna. Ale kali heta zrabić — maškara ŭ pakoi litaralna kišyć.
Pry hetym administracyja kałonii pa-raniejšamu zabaraniaje da pranosu repielenty. Adziny varyjant — maksimalna namazać siabie toŭstym słojem maziaŭ. Ale hetaha chapaje tolki na paŭdnia. A ŭ bolšaści asudžanych niama i hetaj mahčymaści.
Kamientary