Aršaniec adsiadzieŭ 10 sutak za toje, što publična vyhuknuŭ «Žyvie Biełaruś!» i «Słava Ukrainie!»
Sudździa suda Aršanskaha rajona i horada Oršy Mikałaj Drahunoŭ 18 maja pastanaviŭ aryštavać na 10 sutak miascovaha žychara Aleha Masalskaha za nibyta praviedzieny im «pikiet», piša «Viciebskaja viasna».
Na sudovym pasiadžeńni Masalski rastłumačyŭ, što dniom 7 maja ŭžyvaŭ śpirtnyja napoi. Zatym jon nibyta pajšoŭ na aŭtobusny prypynak, dzie sustreŭ raniej jamu nieznajomaha mužčynu ŭ vajskovaj formie.
Vyrašyŭšy pravieryć, jak vajskoviec stavicca da padziej «u Biełarusi i Ukrainie», Masalski staŭ nibyta vykrykvać łozunhi «Žyvie Biełaruś!» i «Słava Ukrainie!».
Vajskoviec na sudzie paćvierdziŭ, što Masalski znachodziŭsia ŭ stanie ałkaholnaha apjanieńnia, staŭ nibyta da jaho čaplacca, pry hetym pačaŭ hučna vykrykvać «apazicyjnyja łozunhi». A jon patelefanavaŭ u milicyju.
Sud kvalifikavaŭ dziejańni Masalskaha jak «pikiet biez atrymańnia adpaviednaha dazvołu Aršanskaha rajvykankama». Za heta mužčynu pakarali aryštam na dziesiać sutak pa č. 1 art. 24.23 (Parušeńnie paradku arhanizacyi abo praviadzieńnia masavych mierapryjemstvaŭ) KaAP.
Pašpart Novaj Biełarusi pačnuć vydavać z 26 studzienia. Što viadoma i jak atrymać?102
Kamientary