Pamierła aktrysa i palityk Hlenda Džeksan. Jana luta nienavidzieła Marharet Tetčer
Brytanskaja aktrysa i palityk Hlenda Džeksan pamierła na 88-m hodzie žyćcia paśla niepraciahłaj chvaroby. Pra heta paviedamiŭ jaje ahient Łajneł Łarnier, jak piša Bi-bi-si.
Džeksan stała mižnarodnaj zorkaj u 1970-ch, kali atrymała «Oskar» za filmy «Zakachanyja žančyny» i «Z šykam». Jašče dva razy jana naminavałasia na «Oskar», a taksama atrymała premii BAFTA i « Załaty hłobus» za tyja ž filmy.
Bolšaść filmaŭ i pastanovak u jaje karjery pryjšlisia na pieryjad da 1992 hoda, kali jana pakinuła scenu i z hałavoj nyrnuła ŭ palityku.
Džeksan vybrałasia ŭ parłamient ad Partyi lejbarystaŭ, dzie zaŭsiody zastavałasia ŭ tradycyjnym levym kryle partyi. Pavodle jaje słoŭ, jana była hatovaja «rabić usio, što lehalna, «dla procidziejańnia palitycy Tetčer», jakaja, na jaje dumku, źniščała Brytaniju.
Z Marharet Tetčer źviazany i samy sprečny momant u jaje palityčnaj karjery. U krasaviku 2013 hoda parłamient sabraŭsia, kab ušanavać pamiać byłoj premjer-ministarki, jakaja pamierła niezadoŭha da hetaha.
Ale Džeksan nie bačyła pryčyn strymlivać emocyi i vielmi žorstka vykazałasia na adras Tetčer, jakaja, na jaje dumku, «naniesła krainie žachlivuju sacyjalnuju, ekanamičnuju i duchoŭnuju škodu».
Kansiervatyŭnyja siabry parłamienta byli raźjušanyja, kali śpikier admoviŭsia vyklučyć jaje vykazvańni z rehłamientu. Adzin palityčny kamientatar abvinavaciŭ levych lejbarystaŭ u «drobiaznaści», «dziacinstvie» i «samadurstvie» ŭ svaich nievysakarodnych napadkach na pamiać Žaleznaj łedzi.
U 1997 hodzie Džeksan uvajšła va ŭrad Toni Błera, dzie stała cieniavoj ministarkaj transpartu. Praz dva hady niaŭdała sprabavała vybracca meram Łondana i pahražała vystavić svaju kandydaturu suprać Błera na vybarach lidara partyi, ale i tut pośpiechu nie damahłasia.
Džeksan pakinuła palityku ŭ 2015-m, a ŭ nastupnym hodzie viarnułasia na scenu paśla 25-hadovaha pierapynku. 80-hadovaja aktrysa syhrała ŭ «Karali Liry» ŭ pastanoŭcy Debary Uornier.
Pašpart Novaj Biełarusi pačnuć vydavać z 26 studzienia. Što viadoma i jak atrymać?76
Kamientary