Siaredzina tablicy i daŭhi. Jak žyvie niekali zorny BATE

Siaredniačok u tablicy

Byli hady, kali BATE ŭpeŭniena akupavaŭ pieršy radok u tablicy biełaruskaha čempijanatu. Tady dla kamandy byli trahiedyjaj lubyja miescy ŭ vyšejšaj lizie, akramia pieršaha, i ŭ pieryjad z 2006-ha pa 2018-ty kamanda nie ŭpuściła nivodnaha čempijonstva. Što ž zdaryłasia potym?

22 vieraśnia 2018 hoda pamior Anatol Kapski, niaźmienny kiraŭnik adrodžanaha BATE (kłub z takoj nazvaj isnavaŭ u Barysavie i z 1973 pa 1984 hady). Lehiendarnaha mieniedžara zamianiŭ jaho syn, 27-hadovy (na toj čas) Andrej Kapski. I tut vyniki kamandy pacichu pakacilisia pad adchon.

Z 2019 pa 2021 hady BATE braŭ srebra čempijanatu, siezon-2022 kłub skončyŭ na trecim miescy. Hety vynik, adnak, dazvalaje barysaŭčanam vystupić sioleta ŭ kvalifikacyi Lihi Čempijonaŭ, ale tolki praz toje, što pieršy i druhi pryziory vyški-2022 — «Šachcior» i «Enierhietyk-BDU» — stracili svaje miescy ŭ tablicy i adpaviedna ŭ jeŭrakubkach praz skandał z damoŭnymi matčami.

Ciapier ža, u siezonie-2023, BATE i ŭvohule idzie na piatym miescy ŭ tablicy. Novapaŭstały siaredniačok, naprykład, prajhraŭ 1:2 žodzinskamu «Tarpieda-BiełAZ», straciŭ ački ŭ ničyich z «Isłačču», mazyrskaj «Słavijaj», «Minskam» i «Enierhietykam-BDU». Ciapier kłub pieražyvaje sieryju z čatyroch hulniaŭ bieź pieramoh u biełaruskim čempijanacie, plus jašče i kryŭdnaja paraza ŭ finale biełaruskaha Kubka — kryŭdnaja, bo trafiej mocna padbadzioryŭ by kamandu.

Eks-trenier BATE pa fizičnaj padrychtoŭcy Chase Pastar Vierčyli niadaŭna tak vykazaŭsia pra los kłuba ŭ apošnija hady: «Na mnohaje paŭpłyvała śmierć takoha charyzmatyčnaha lidara, jak Anatol Kapski. Jaho niemahčyma zamianić, znajści čałavieka z takim dośviedam. Svaju rolu adyhrała pandemija i ekanamičnaja situacyja».

Pazbavilisia lidaraŭ

U pieršyja miesiacy pratestaŭ-2020 źjaviłasia videa, u jakim dziasiatki biełaruskich futbalistaŭ vykazvajucca suprać hvałtu. U paraŭnańni sa šmatlikimi inšymi vykazvańniami taho času hety rolik vyhladaŭ trochi strymana, ale ž, jak my bačym ciapier, i jaho chapiła spartovym čynoŭnikam, kab razzłavacca na niepakorlivych spartsmienaŭ nie na žart.

Paśla siezona-2022 u Minsportu skłali śpis «niepažadanych» hulcoŭ, jakija musili zastacca pa-za bortam u biełaruskim futbole. Siarod takich futbalistaŭ akazalisia i tyja, čyja dapamoha na poli ciapier była b dla BATE zusim nie lišniaj. 

Adznačym pierš za ŭsio asobu Stanisłava Drahuna — adnaho z topavych hulcoŭ BATE jašče časoŭ Anatola Kapskaha. Ołdy pamiatajuć tandem «Stasikaŭ» — Drahuna i jašče adnaho znakamitaha barysaŭčanina Ihara Stasieviča, jaki ciapier hulaje ŭ kazachskim «Atyrau». Niekalki tydniaŭ tamu 35-hadovy Drahun, jaki praz svoj status «niepažadanaha» tak i nie vyjšaŭ sioleta na pole, abviaściŭ pra zakančeńnie karjery.

Pavialičyć

Jość źviestki i pra toje, što kamandu pakinuŭ daśviedčany abaronca Maksim Bardačoŭ, jaki taksama trapiŭ u «čorny śpis». Taksama z BATE ŭ hety śpis trapili talenavity bramnik Dzianis Ščarbicki, paŭabaroncy Dźmitryj Biaśśmiertny i Daniła Niačajeŭ. Usie jany duža spatrebilisia b kamandzie, jakaja, nahadajem, ciapier mieścicca na piatym radku turnirnaj tablicy, a jašče i źbirajecca hulać u kvalifikacyi Lihi Čempijonaŭ.

Darečy, pra jaje: u aŭtorak projdzie losavańnie pieršaha raŭnda kvalifikacyi ŁČ, sami matčy startujuć 11 lipienia, to-bok mienš čym praź miesiac. Jakim da ich padydzie BATE? Pytańnie rytaryčnaje.

Treba adznačyć, što nie viadoma ni pra jakija publičnyja sproby BATE adstajać svaich hulcoŭ, takich patrebnych kłubu. Zrazumieła, taki krok patrabavaŭ by mužnaści, ale ž užo jość padobnyja prykłady. Zhadajem Ihara Kavaleviča, koŭča hrodzienskaha «Niomana», jaki paśla vyletu kamandy z rozyhryšu Kubka (darečy, vylataŭ «Nioman» ad BATE) prosta na pres-kanfierencyi zhadaŭ zabanienych hulcoŭ: «Nam nie chapaje Pasieviča, Laška, Žukoŭskaha… Voś ja prasiŭ u pieradačy. Kali tam razhledziać hetyja spravy?»

Prablemy z hrašyma

Nibyta ŭsiaho hetaha było mała, źjaŭlajecca bolš źviestak pra toje, što ŭ BATE nie ŭsio fajna z hrašyma. Častkova heta źviazana z tym, što kłub užo nie pieršy hod nie maje dostupu da Lihi Čempijonaŭ ź jaje pryzavymi. U Lizie Kanfierencyj, dzie BATE ŭdzielničaŭ apošnija dva siezony, kamanda abodva razy vylatała ŭ druhim kvalifikacyjnym raŭndzie, što taksama nie daje šansaŭ na dobryja pryzavyja. Viadoma ž, u takich umovach kłub vymušany skaračać vydatki.

Ale ž jość i rečy, jakija nie tak prosta zrazumieć. Insajdary śćviardžajuć, što prosta ciapier, paśla niekalkich miesiacaŭ i 11 turaŭ čempijanatu, Minsportu ŭsio jašče nie padpisała dla BATE płan raźvićcia, jaki dazvalaje kamandzie atrymlivać sponsarskija hrošy ad dziaržaŭnych pradpryjemstvaŭ.

I bolš za toje, pastupaje infarmacyja, što ŭ kłuba surjoznyja finansavyja prablemy i jość daŭhi i što paśla pieršaha koła čempijanatu asnoŭnuju kamandu mohuć čakać vialikija źmieny. Uskosnaje paćviardžeńnie hetamu — toje, što ź listapada 2022 hoda BATE nie hulaŭ na «Barysaŭ-Arenie», svaim chatnim stadyjonie, jaki nastolki važny dla kamandy, što niekali ŭ honar spačyłaha prezidenta kłuba jaje dumali nazvać «Kapski-Arenaj». Pavodle «Trybuny», adna z pryčyn hetaha — ekanomija: arenda «Barysaŭ-Areny» kaštuje 8500 rubloŭ za viečar, a arenda stadyjona «Haradski», dzie pakul hulajuć žoŭta-sinija, abychodzicca im u try tysiačy rubloŭ. Roźnica istotnaja.

Narešcie, zaŭziatary adčuvajuć, što ŭ BATE nie najlepšyja časy, i nie bałujuć kłub anšłahami. U hetym hodzie siaredniaja naviedvalnaść «Haradskoha» — 3131 čałaviek, pry tym što tam znojdziecca miesca dla 5402 hledačoŭ.

Da siońniašniaha BATE možna stavicca pa-roznamu. Šmat chto z zaŭziataraŭ byŭ rasčaravany, naprykład, udziełam prezidenta kłuba Andreja Kapskaha i inšych barysaŭčan u praŭładnych padziejach, sumnyja hulniavyja vyniki taksama nie natchniajuć pieražyvać za kamandu. Jak zaŭsiody ŭ takich situacyjach, chočacca šukać vinavatych, admaŭlacca ad kamandy i žyć svaim žyćciom — vybirać, praściej kažučy, samy prosty varyjant.

Ale prosta nahadajem skieptykam, što BATE Anatola Kapskaha — heta epocha, kłub, jaki prasłaviŭ biełaruski futboł u Jeŭropie, jaki pryciahnuŭ na stadyjony sotni (a da ekranaŭ — tysiačy) biełarusaŭ i dakazaŭ nam, što i našym futbołam možna hanarycca. I toje, što my bačyli apošnija hady, — heta pierš za ŭsio zabojstva vialikaj kamandy praz palityku, niaŭmieły mieniedžmient i źniešnija abstaviny, a nie naradžeńnie jašče adnaho prarežymnaha kłuba. 

«Majo žyćcio — taksama sucelnyja kampramisy». Kanstancin Kavieryn — pra biaśsille, BATE i svoj sposab nie ŭpaści ŭ depresiju

«U płanie mužčynskaj uvahi ja raśpieščanaja». Hetaja biełaruskaja futbolnaja fanatka źbiraje tysiačy prahladaŭ u instahramie

Hleb, Kutuzaŭ, Rumas? Chto vyratuje biełfutboł — razvažajuć admysłoŭcy

• 14
• 0
• 8
• 3
• 4
• 7
• 9
• 0