Kreml vykanaŭ umovy BiełaPAN

Infarmacyjnaja kampanija vyrašyła była admovicca ad zaprašeńnia da Miadźviedzieva. Ale Kreml zdaŭsia i pierajnačyŭ umovy intervju.

Siužet z zaprašeńniem biełaruskaj presy da Miadźviedzieva staŭ abrastać skandałami jašče zadoŭha da samoha intervju.

Spačatku — harčyčnik tutejšaha Mininfa čatyrom ŚMI, u tym liku trom hazietam, što zaprošanyja da rasijskaha prezidenta. Naturalna, kamientatary adrazu źviazali hetyja dźvie padziei.

A 20 listapada pra namier nie pasyłać svajho žurnalista na imprezu ŭ Barvichu zajaviła infarmacyjnaja kampanija BiełaPAN. Z tłumačeńniem: pres-słužba Miadźviedzieva vystaviła takija ŭmovy, što ŭdzieł karespandenta infarmacyjnaha ahienctva ŭ hetaj hutarcy straciŭ sens.

Toje, što pytańni zapatrabavali dasłać zahadzia — jašče paŭbiady. Apošniaj kroplaj stała ŭmova trymacca aficyjnaj stenahramy hutarki, jakuju centralizavana razašle pres-słužba Kramla. I raniej ničoha nie publikavać.

A tuju stenahramu moža praz try dni dašluć. Prysutnaść karespandenta infarmahienctva na miescy padziei zvodzicca da roli statysta.

Ad siabie dadam, što za piać hadoŭ styl dačynieńniaŭ rasijskaj dziaržavy z presaj značna dehradavaŭ.

U 2004 hodzie vaš pakorlivy słuha taksama ŭ jakaści pradstaŭnika BiełaPAN trapiŭ u hrupu žurnalistaŭ, jakich zaprasili ŭ Maskvu ad imia RIA «Naviny». Heta ŭradavaje ahienctva, i pijaraŭski intares rasijskich uładaŭ tut čytaŭsia niaŭzbrojenym vokam. Ale treba addać naležnaje: nam nichto nie nakidaŭ nijakich umoŭ. Adno što ludzi ŭ cyvilnym skazali prybrać fotaaparat, kali ja pasprabavaŭ zrabić zdymki na zakrytaj častcy terytoryi Kramla: maŭlaŭ, intaresy biaśpieki!

A tak pa haračych śladach ja bieśpieraškodna pieradaŭ na stužku navin BiełaPAN — častkova praz mabilnik, častkova mejłami — dziasiatka paŭtara zamietak. Uzrovień ža sustreč byŭ choć i nie prezidencki, ale dastatkova vysoki: pamočnik Pucina (i, pavodle viersii biełaruskaha načalstva, šery kardynał) Siarhiej Prychodźka, sakratar Rady biaśpieki Ihar Ivanoŭ…

Vysokija surazmoŭcy demakratyčna dazvalali karystacca dyktafonami. Pamiataju, tolki ŭ adnym miescy Prychodźka paprasiŭ: voś heta nie dla druku… A tak hałoŭnyja jaho dumki ja nadyktavaŭ praz sotavy redaktaru BiełaPAN adrazu ž, vyjšaŭšy z Kramla: što dasłoŭna, što ŭ pierakazie. Tak pracuje presa va ŭsich cyvilizavanych krainach. Palityki i čynoŭniki padładžvajucca pad zakony miedyjaśfiery, a nie naadvarot.

Z taje pary rasijskaja ŭłada mocna adkaciłasia nazad u sensie hałosnaści, zacisnuła svabodu ŚMI u svajoj krainie. Zaraz voś zamšełyja praviły chacieli nakinuć i biełaruskim miedyjam. Faktyčna źvieści prysutnaść ich žurnalistaŭ da masoŭki, anturažu pijar-akcyi.

Zrešty, demarš BiełaPAN imhnienna zajmieŭ plon. Litaralna praz dvaccać chvilin paśla taho, jak na sajcie internet-haziety BiełaPAN Naviny.by źjaviłasia niepryjemnaja dla Maskvy publikacyja,

u ofis infarmacyjnaj kampanii patelefanavali z pres-słužby Miadźviedzieva. I skazali, što pahadžajucca na apieratyŭnuju pieradaču infarmacyi z Barvichi. Biez usialakich stenahram dy inšych umoŭ.

Bilet u Maskvu karespandent BiełaPAN zdać jašče nie paśpieŭ.

Ciapier zastajecca čakać, što ž skaža ŭ paniadziełak Miadźviedzieŭ.

Alaksandr Kłaskoŭski.

• 0
• 0
• 0
• 0
• 0
• 0
• 0
• 0