Amazon, Hilton i inšyja kampanii dapamohuć sotniam tysiač ukrainskich biežancaŭ u Jeŭropie z pracaj
Bolš za 40 bujnych kampanij, u tym liku Amazon, Hilton i Marriott, abviaścili ŭ paniadziełak, što dapamohuć znajści pracu tysiačam ukrainskich uciekačoŭ u Jeŭropie.
Jak paviedamlaje dabračynnaja arhanizacyja Tent Partnership for Refugees, na sustrečy ŭ paniadziełak u Paryžy 41 kampanija abviaściła, što dapamoža čverci miljona biežancaŭ, jakija apynulisia ŭ Jeŭropie, najpierš žančynam z Ukrainy, znajści pracu abo prajści kursy i asvoić novuju prafiesiju, piša Bi-bi-si.
Haściničnyja sietki Hilton i Marriott International i jašče niekalki kampanij paabiacali pryniać na pracu 13680 biežancaŭ, najbujniejšyja suśvietnyja ahienctvy pa pošuku piersanału, u tym liku Adecco, ManpowerGroup i Randstad abaviazalisia dapamahčy znajści pracu 152 tysiačam biežancaŭ, a jašče adna hrupa vialikich firmaŭ paabiacała navučyć novym prafiesijach 86 tysiač biežancaŭ.
Adzin tolki hihant internet-handlu Amazon abiacaje ŭziać na pracu ŭ svaje adździaleńni ŭ Jeŭropie piać tysiač čałaviek, pry hetym stolki ž biežancaŭ firma abaviazałasia pryniać na pracu da kanca 2024 hoda i ŭ svajoj krainie, ZŠA.
U Jeŭropie ŭ adździaleńniach Amazon pracujuć 200 tysiač čałaviek; novyja rabotniki buduć zajmacca ŭ asnoŭnym vykanańniem zamoŭ na nizavym uzroŭni, ale, jak zapeŭniŭ vice-prezident kampanii Džej Afory Ahboka, zdolnyja ludzi, jakija pavyšajuć svaju kvalifikacyju, zmohuć i ruchacca navierch pa karjernaj leśvicy.
Dabračynnaja arhanizacyja Tent Partnership for Refugees zajmajecca kaardynacyjaj dapamohi pryvatnych kampanij uciekačam.
Vice-staršynia Jeŭrapiejskaj kamisii Marharycis Schinas skazaŭ na sustrečy ŭ Paryžy, što ciapier mnohija ź miljonaŭ uciekačoŭ, što apynulisia ŭ Jeŭropie, nie mohuć znajści pracu.
«I heta, niahledziačy na naš chraničny niedachop kvalifikavanaj pracoŭnaj siły, ich vysoki ŭzrovień adukavanaści, žadańnie zarablać na žyćcio i najaŭnaść dazvołaŭ na pracaŭładkavańnie pavodle dyrektyvy ES ab časovaj abaronie», — dadaŭ čalec urada Jeŭrasajuza.
«Hetaja biesprecedentnaja dapamoha z boku biznesu na ŭsim kantyniencie vielmi važnaja, jana dapamoža dziasiatkam tysiač ukrainak zabiaśpiečyć siabie i svaich rodnych va Ukrainie», — praciahnuŭ Schinas.
U krainach Zachodniaj i Centralnaj Jeŭropy ciapier, pavodle acenak AAN, znachodzicca kala šaści miljonaŭ ukrainskich uciekačoŭ, i pieravažnaja bolšaść ź ich — žančyny ź dziećmi.
Tent Partnership for Refugees adznačaje, što žančynam asabliva składana znajści pracu: da zvyčajnych prablem dadajecca i toje, što im treba kłapacicca pra dziaciej.
Kamientary