Jakija rasijskija party vykarystoŭvajucca dla pieravałki biełaruskich hruzaŭ
Pieršy namieśnik ministra transpartu i kamunikacyj Alaksiej Lachnovič raspavioŭ, jakija rasijskija party vykarystoŭvajucca dla pieravałki biełaruskich hruzaŭ, a taksama zakranuŭ pytańnie budaŭnictva ŭłasnaha terminała.
«My zadziejničali 19 rasijskich partoŭ u roznych rehijonach RF. Heta i kalidor «Poŭnač — Poŭdzień» u bok Astrachani i praz Kaśpijskaje mora, heta i party Sankt-Pieciarburha, party Čornaha i Azoŭskaha moraŭ. Taksama my pieravozim hruzy suchaputnym maršrutam u bok Kitaja. Pa vynikach pieršaha paŭhodździa ŭ nas skłalisia abjomy pieravałki hruzaŭ kala šaści młn ton praz party i kala 1,5 młn ton suchaputnym maršrutam na Kitaj», — skazaŭ Alaksiej Lachnovič u intervju telekanału «Biełaruś 1».
Najbolš zadziejničanyja, pa jaho słovach, vialiki port Sankt-Pieciarburha i inšyja party na Bałtyjskim mory.
«Jany majuć pieravahu abjomami i taryfami, tamu što, pa-pieršaje, adlehłaść pa čyhuncy vielmi karotkaja, pa-druhoje, dla asobnych vidaŭ hruzaŭ my atrymali źnižku na Bałtyku. Tamu, viadoma, Bałtyka siońnia pa-za kankurencyjaj», — patłumačyŭ Lachnovič.
Dumajuć taksama nad tym, kab vykarystoŭvać party Murmanska.
Pieršy namieśnik ministra kaža, što sioleta jany atrymali źnižki na čyhunačnyja taryfy dla pieramiaščeńnia hruzaŭ — ad 10% da 40% u zaležnaści ad kirunku.
«U tym liku atrymali źnižku dla asobnych vidaŭ hruzaŭ na vialiki port Sankt-Pieciarburha i samuju vialikuju źnižku na party Astrachani i suchaputny maršrut «Poŭnač — Poŭdzień» u bok Kaśpijskaha mora», — adznačyŭ Lachnovič.
A voś ci buduć biełaruskija ŭłady budavać svoj terminał, zdajecca, jašče nie vyrašana.
«Kali my budziem bačyć, što košt pieravałki nas zadavalniaje praź niejki terminał i praz peŭny rehijon, a taksama prajekt chutka akuplajecca, na praciahu 5—7 hadoŭ, to, viadoma, aŭčynka vartaja vyrabu», — patłumačyŭ čynoŭnik.
Akramia Rasii i Kitaja, siarod asnoŭnych napramkaŭ dla ekspartu biełaruskich tavaraŭ jon nazvaŭ krainy Łacinskaj Amieryki, Afryki, Indyju.
Što za čamadan nosić kala Łukašenki jahony achoŭnik? Nie, tam nie jadziernaja knopka20
Kamientary
Spadar Knyrovič paru dzion tamu vielmi dobra raspavioŭ stan spravaŭ jak ź biełaruskim kalijnym ekspartam, dyk i na suśvietnym rynku. Spojler: łahistyka dla biełkaliju istotna padaražeła, a košty i abjomy prypali, rentabielnaść imkniecca da nula, porta nia budzie, a huceryjeŭskija daŭhi kitajcam za słaŭkalij paviśli na biełaruskim biudžecie. Ŭ tyj ža čas kanadcy inviestujuć ŭ novyja radovišča i pašyrajuć svaju dolu na suśvietnym rynku.