Žychara Babrujska pakarali vialikim terminam źniavoleńnia za danaty ŭ kryptavalucie
Nabyŭ moc prysud 35-hadovamu žycharu Babrujska Dźmitryju Słuku, abvinavačanamu 4 lipienia ŭ «finansavańni terarystyčnaj dziejnaści» pavodle č. 1 art. 290-1 Kryminalnaha kodeksa. Sprava razhladałasia ŭ sudzie Zavodskaha rajona Minska, piša «Viasna». Praces vioŭ sudździa Dźmitryj Astapienka.
Jak było nibyta ŭstanoŭlena ŭ chodzie sudovaha śledstva, Dźmitryj Słuk, «20 žniŭnia 2021 hoda, budučy painfarmavanym ab terarystyčnaj nakiravanaści dziejnaści, ažyćciaviŭ jaje finansavańnie. U pryvatnaści, jon pieravioŭ kryptavalutu na virtualny kašalok dadzienaj arhanizacyi ŭ sumie ekvivalentnaj 2160 dalaraŭ ZŠA, što na momant ździajśnieńnia złačynstva skłała nie mienš za 5,4 tys. rubloŭ». Što heta za arhanizacyja, vyśvietlić pakul nie ŭdałosia.
Palitźniavoleny Dźmitryj Słuk byŭ zatrymany 10 lutaha 2023 hoda. Paśla 10 sutak u IČU na Akreścina jaho pieraviali ŭ SIZA-1 Minska. 16 sakavika jahonaje proźvišča było dadadziena ŭ śpis «asob, datyčnych da terarystyčnaj dziejnaści».
U vyniku sud pryznačyŭ pakarańnie ŭ vyhladzie pazbaŭleńnia voli na termin vosiem hadoŭ i šeść miesiacaŭ sa štrafam u pamiery 300 bazavych vieličyń (11,1 tys. rubloŭ).
Dźmitryj Słuk nie abskardžvaŭ žorstkaha prysudu i nieŭzabavie budzie etapavany dla adbyćcia pakarańnia ŭ adnu z kałonij.
Vylecieła ŭ nieviadomym kirunku śpikierka KR Anžalika Mielnikava25
Kamientary