Tango T600: mikraaŭto dla dvuch čałaviek.
Vonkava raspracoŭka amierykanskich aŭtavytvorcaŭ vyhladaje nie vielmi. Tango T600 padobny da aŭtamabila, jaki razrezali napapałam. Samoj idei ŭžo bolej za 40 hadoŭ.
Jak zaŭvažaje aŭtar idei, jon chacieŭ pačać masavy vypusk dvuchmiesnaha aŭtamabila mietrovaj šyryni, kab zrabić revalucyju ŭ pajezdkach na pracu ŭ Paŭnočnaj Amierycy. Padličana, kali b tolki kožny 10-y pasažyr u ZŠA pierasieŭ na takoje aŭto zamiest pikapa abo ŭsiedarožnika, mnohija miehazatory ŭ hadzinu pik stali b historyjaj. Ale ŭ toj čas ideja nie była realizavanaja, bo nie znajšłosia sponsaraŭ i inviestaraŭ.
Pieršy aŭtamabil Tango T600 byŭ vypuščany ŭ 2005 hodzie, i jaho atrymaŭ akcior Džordž Kłuni. Da 2008 hoda kampanija vyrabiła ŭsiaho 10 aŭtamabilaŭ, kožny ź jakich byŭ pradadzieny ŭ siarednim pa 121 000 dołaraŭ. Rekłamnaja kampanija z udziełam Kłuni vyklikała značnuju cikavaść u srodkach masavaj infarmacyi. Adnak heta nie pryviało da ŭkładańnia damovy na pramysłovuju vytvorčaść, u masavy prodaž aŭto tak i nie vyjšła.
Na praciahu ŭsioj historyi kampanii Commuter Cars mieła abmiežavanyja finansavyja resursy. Kožny raz, kali jana atrymlivała prybytak, inviestavała hrošy ŭ daśledavańni i vytvorčyja mahutnaści dla svaich budučych aŭtamabilaŭ. Kali ŭ 2007 hodzie ŭ kampanii było dastatkova finansavańnia, jana naniała vosiem pracaŭnikoŭ i mahła vyrablać adzin aŭtamabil štomiesiac.
Vytvorca zajaŭlaje, što T600 adpaviadaje patrabavańniam biaśpieki honačnych aŭtamabilaŭ NASCAR i źjaŭlajecca samym biaśpiečnym aŭtamabilem u śviecie. T600 manieŭruje ŭ ščylnym patoku, jak matacykł, i moža vykarystoŭvać luby razryŭ, kab ruchacca napierad.
Jon navat moža pracisnucca pamiž mašynami na dźviuch zvyčajnych pałosach. Zdolny źmiaścić dvuch pasažyraŭ u tandemnym raźmiaščeńni siadzieńniaŭ, jon zajmaje ŭsiaho čverć standartnaha parkovačnaha miesca i moža parkavacca bokam.
Commuter Cars zajaŭlaje, što ciažkaja akumulatarnaja batareja Tango i nizki darožny praśviet — 280 mm zabiaśpiečvajuć ustojlivaść i stabilnuju kiravanaść. Kala dźviuch tracin masy pratatypa ŭ 1400 kh prypadaje na batarei, zdvojenyja ruchaviki i kantroler, ustalavanyja ŭnizie ramy. Commuter Cars zajaŭlaje, što sieryjnyja madeli važyli b mienš, ad 1000 da 1130 kh. Ruch zabiaśpiečvajecca dvuma elektraruchavikami.
Commuter Cars adznačaje, što ad zvyčajnaj razietki bolšuju častku zaradu možna atrymać za hadzinu abo poŭnuju zaradku mienš jak za 3 hadziny. Z dapamohaj vonkavaj zaradnaj pryłady na 200 ampier Tango možna zaradzić da 80% prykładna za 10 chvilin.
Zajaŭlenaja mahutnaść aŭtamabila składaje 600 k. s. Dalnaść chodu na śvincova-kisłych batarejach — da 128 km, na lityj-ionnych — 240 km. Da chutkaści ŭ 60 milaŭ (97 km) aŭto razhaniajecca za 3,2 siekundy. Maksimalnaja chutkaść — 240 km za hadzinu.
Na žal, aŭtamabil nie vyjšaŭ u masavuju vytvorčaść. Tamu ciapier jaho košt składaje kala 300 tysiač dołaraŭ, i cikavaść da jaho prajaŭlajuć tolki kalekcyjaniery.
Čytajcie jašče:
Biełaruskija krasoviery ad «BiełDžy» źjavilisia ŭ aŭtasałonach. Pa jakoj canie?
Kamientary