Palitviaźnia-emihranta sprabavali zavierbavać. Voś jak da jaho padstupalisia
Valancin Łabačoŭ vyzvaliŭsia z kałonii zimoj 2023 hoda, ciapier žyvie ŭ Varšavie.
Łabačoŭ bolš za dziesiać hadoŭ zajmaŭsia ŭ Mahilovie hramadskaj i palityčnaj dziejnaściu. Jon śćviardžaje, što ŭvahu śpiecsłužbaŭ pryciahnuŭ zadoŭha da vybaraŭ 2020 hoda, jak piša «Radyjo Svaboda».
«Jašče ŭ 2010 hodzie sa mnoj jašče tady pravodziŭ hutarki, nie pamiataju proźvišča, ale zvali jaho Andrej Ryhoravič. A kali ciapier ja ŭžo adbyŭ termin, viarnuŭsia dachaty, pierajechaŭ u Polšču, ad jaho mnie ŭ «Adnakłaśnikach» pastupili dziŭnyja prapanovy», — śćviardžaje były viazień.
Łabačoŭ pakazvaje skrynšoty svajoj pierapiski z «Adnakłaśnikaŭ». Sa słoŭ Valancina, jahony surazmoŭca tam — supracoŭnik KDB.
U hetych dyjałohach surazmoŭcy dyskutujuć ab patryjatyźmie i lubovi da Biełarusi. Na repliku Valancina ab tym, što jon «pracuje na karyść biełaruskaha naroda», mierkavany supracoŭnik śpiecsłužbaŭ adkazvaje prapanovaj abjadnać vysiłki.
«Toje, što ty nazyvaješ dabrom dla naroda, — heta iluzija, jakuju stvarajuć za hrošy pradažnyja psieŭdapalityki, im Radzimu pradać — vokam nie mirhnuć. Sapraŭdnyja patryjoty — za jaje niezaležnaść, cełasnaść i kvitnieńnie. Kali nam pa darozie, to možam ruchacca razam. Kali nie — vybačaj za turboty», — prapanoŭvaje surazmoŭca Łabačovu.
I paviedamlaje, što sa svajho boku abiacaje «adekvatnuju dapamohu i ščyryja stasunki» i dadaje, što «razam my možam šmat zrabić».
«Prapanuju tabie pahladzieć film «Zorhie»
Były palitviazień śćviardžaje, što nie admaŭlaŭsia adrazu ad prapanoŭ pahavaryć, bo chacieŭ daviedacca, čaho kankretna choča ad jaho mierkavany supracoŭnik KDB i jakija namiery i płany śpiecsłužbaŭ.
U pierapiscy Łabačoŭ zaznačyŭ, što kali supracoŭniki KDB chočuć zavieści na jaho čarhovuju spravu ci abviaścić vyšuk, to ŭ Biełaruś jon pakul nie płanuje viartacca.
«Ja ciabie nie zavu ŭ Biełaruś, spraŭ u dačynieńni da ciabie nam nie treba. Ty čałaviek idejny, ale trapiŭ pad peŭny ŭpłyŭ. Ja prapanoŭvaju ŭ pieršuju čarhu ščyryja adnosiny i zrabić niešta karysnaje dla Radzimy, kali dla ciabie heta nie pustyja słovy. Kali budzie atrymlivacca, to hatovy dapamahčy finansava», — abiacaje byłomu palitviaźniu surazmoŭca.
Jon taksama prapanoŭvaje pahladzieć film «Zorhie» (pra savieckaha špijona ŭ Japonii. — «NN»). «Heta sapraŭdny patryjot Radzimy, ty možaš nie horš», — śćviardžaje mierkavany supracoŭnik śpiecsłužbaŭ.
U adkaz Valancin prapanavaŭ jamu pahladzieć film «Čekist» — rasijski film 1992 hoda, dzie hałoŭny hieroj — načalnik ČK, jaki biare ŭdzieł u vyniasieńni śmiarotnych prysudaŭ sotniam ludziej.
«Kankretnych prapanoŭ, što ja mušu rabić, nie prahučała. Ja chacieŭ vyvieści jaho na hetuju temu, ale nie ŭdałosia. Vidać, kali b ja pahadziŭsia, tady b atrymaŭ dalejšyja instrukcyi. Ale ja ŭpeŭnieny, što jany pišuć nie tolki mnie. Miarkuju, što niechta moža i pahadzicca na takoje «supracoŭnictva». Ja navat dumaŭ pra toje, kab pahadzicca, a zatym raskryć ich ahienturu. Ale nie vyjšła», — kaža były viazień.
«Ludzi musiać być pilnymi»
«Svabodzie» stała viadoma, što prapanovy «ŭzajemavyhadnych stasunkaŭ» pastupali i inšym biełarusam — jak aktyvistam, jakija jašče zastajucca ŭ Biełarusi, tak i byłym viaźniam. Adnamu ź ich, naprykład, prapanavali zaviazać kantakt z pałkom Kalinoŭskaha. Toj, ź jahonych słoŭ, admoviŭsia.
«Nam, pravaabaroncam, infarmacyja pra vierbavańnie byłych palitviaźniaŭ nie pastupała pakul. Choć nie sumniavajusia, što takoje moža być, uličvajučy ich dośvied pracy i peŭny prafiesijanalizm, viedańnie psichałohii, padychodaŭ da ludziej — maju na ŭvazie supracoŭnikaŭ KDB. U nas jość infarmacyja ad ludziej u Biełarusi, jak ich «ciahajuć» na roznyja hutarki i prapanoŭvajuć «supracoŭnictva». Heta tyčycca i ludziej, jakija ŭ 2020 hodzie danacili na roznyja fondy, a ŭ 2022—2023-ch u ich pačalisia prablemy z KDB. Čałaviek vypłaciŭ peŭnuju sumu hrošaj, ale ad jaho nie adčapilisia i prapanavali «supracoŭnictva», — prakamientavała pravaabaronca «Viasny» Alena Maślukova.
Surazmoŭca dadała, što aktyŭna sprabujuć vierbavać ludziej taksama supracoŭniki kałonij, dzie adbyvajuć pakarańni palitviaźni.
«Tam u ich šyroki instrumientar represij u vypadku admovy. Heta i paharšeńnie ŭmoŭ utrymańnia, i artykuł 411 (niepadparadkavańnie administracyi), pavodle jakoha možna pradoŭžyć termin. I ad hetaha, na žal, nichto nie moža być zastrachavany», — kaža Alena Maślukova.
Jana zaklikaje ludziej być pilnymi nie tolki pry asabistych razmovach ci hutarkach u kampanii, ale i ŭ sacyjalnych sietkach i vykazvańniach tam.
Kamientary