Adpaviedna apošniamu analizu, raźmierkavańnie dachodaŭ pamiž hrupami niamieckaha hramadstva stanovicca ŭsio bolš nieraŭnamiernym. Siaredni kłas skaračajecca. A razryŭ pamiž bahatymi i biednymi pavialičvajecca.
Instytut ekanamičnych daśledavańniaŭ imia Lejbnica pry Miunchienskim univiersitecie (Ifo) apublikavaŭ apošniaje daśledavańnie, u jakim źviarnuŭ uvahu na pavolnaje źmianšeńnie ŭ krainie siaredniaha kłasa. Kali ŭ 2007 hodzie da jaho adnosiłasia 65% nasielnictva, to praz 12 hadoŭ — u 2019 hodzie — hety pakazčyk skłaŭ 63%.
Vučonyja adznačajuć, što skaračeńnie miežaŭ siaredniaha kłasa adbyłosia jak z pryčyny sacyjalnaha prahresu, tak i zaniapadu.
Jak patłumačyŭ adzin z aŭtaraŭ daśledavańnia Fłaryjan Dorn (Florian Dorn), niahledziačy na toje, što spad vyhladaje adnosna ŭmieranym, jon značny ŭ paraŭnańni ź inšymi jeŭrapiejskimi krainami. U toj čas jak u 2007 hodzie siaredni kłas Hiermanii zajmaŭ 9-je miesca siarod usich krain ES, to ŭ 2019-m (apošnim hodzie pierad pandemijaj) jon apuściŭsia na 14-ju pazicyju.
U svaich raźlikach aŭtary vykarystoŭvali aznačeńnie siaredniaha kłasa dla pramysłova raźvitych krain Arhanizacyi ekanamičnaha supracoŭnictva i raźvićcia. Zhodna ź im, da siaredniaha kłasa adnosicca luby čałaviek, jaki maje ad 75 da 200% siaredniaha dachodu pa krainie.
Dla adzinokich u 2019 hodzie heta adpaviadała čystamu prybytku (z ulikam tranśfiertaŭ) ad 17 475 da 46 600 jeŭra za hod. Dla par bieź dziaciej dyjapazon składaŭ ad 26 212 da 69 900 jeŭra. Pary z dvuma dziećmi pa statystycy ličylisia siarednim kłasam, kali ich dachod składaŭ ad 36 698 da 97 860 jeŭra.
Aŭtary daśledavańnia źviartajuć uvahu, što isnuje razryŭ pamiž samaadčuvańniem ludziej i ich realnaj prynaležnaściu da siaredniaha kłasa. Tak, zhodna z apytańniami, bolš za 80% niemcaŭ adnosiać siabie da siaredniaha kłasa. Ale, pavodle danych Ifo, u 2019 hodzie tolki kala 26,1 miljona chatnich haspadarak u Hiermanii statystyčna byli siarednim kłasam. Heta składaje 63%, ci mienš za dźvie traciny ŭsich chatnich haspadarak.
Daśledčyki adznačajuć, što siaredni kłas u Hiermanii niasie najbolšy padatkovy ciažar u paraŭnańni ź inšymi krainami Jeŭropy. Jak zaŭvažaje kiraŭnik Centra makraekanomiki i daśledavańniaŭ Ifo Andreas Pajchiel (Andreas Peichl),
«pry hraničnym padatku pamieram kala 50 pracentaŭ ad sukupnaha dachodu ŭ niamieckaj sistemie padatkaabkładańnia i tranśfiertaŭ ludzi ź siarednim dachodam faktyčna atrymlivajuć tolki pałovu nastupnaha zaroblenaha jeŭra».
Pavodle jaho słoŭ, «bolšaja kolkaść pracy i bolš vysokaja pradukcyjnaść siaredniaha kłasa akuplajecca tolki ŭ vielmi abmiežavanaj stupieni». Ludzi ź siarednim dachodam znachodziacca na miažy svajoj ustojlivaści. U toj ža čas u niamieckaj sistemie padatkaabkładańnia i tranśfiertaŭ praca zvyš normy praktyčna nie akuplajecca dla ludziej ź nizkimi dachodami.
U daśledavańni adznačajecca, što ŭ Hiermanii ŭ 2019 hodzie 8% chatnich haspadarak adnosiłasia da katehoryi haspadarak z vysokim dachodam. U toj ža čas amal kožnaja treciaja chatniaja haspadarka (29%) uvachodziła ŭ hrupu ź nizkim dachodam.
Hetaja katehoryja źjaŭlajecca pieravažna častaj atrymalnicaj dziaržaŭnych tranśfiertaŭ (dapamoh, stypiendyj, piensij, kampiensacyj i h. d.), čym płacielščykami padatkaŭ i abaviazkovych uznosaŭ u fond sacyjalnaha strachavańnia.
Ifo nie zmoh acanić, jak źmianiłasia situacyja za hady karanavirusa. U hetyja hady, jakija supravadžalisia ekanamičnym spadam, fiederalny ŭrad akazvaŭ dapamohu kampanijam i spažyŭcam. U toj ža čas vidavočna, što padčas pandemii praz vysokuju inflacyju mnohim ludziam ź nievialikimi aščadžeńniami ci bieź ich daviałosia skaracić spažyvańnie.
Čytajcie jašče:
Niemcy nie padtrymlivajuć čatyrochdzionny pracoŭny tydzień
Daktary Hiermanii vystupajuć za pavyšeńnie kolkaści ambułatornych apieracyj
Hiermanija pieravodzić žytło na centralizavanaje ciepłazabieśpiačeńnie
Na sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?12
Kamientary